УИХ-ын гишүүний сэнтийд залрахаасаа ч өмнө хэвлэлийн хуудаснаа цөөнгүй гарч байсан Н.Номтойбаяр төрийн түшээ болсноосоо хойш бол байнга гарах болсон. Бэлтэй хүний хүүхэд тэрбээр үе үе сахилгагүйтчихдэг зуршлаасаа болон сайн гэхээсээ саараар илүү бичигддэг.  Хэлсэн үг нь хий багатай ч, хийж ирсэн үйлдлүүд нь түүнийг хэн болохыг илчилдэг гэхэд болох юм. Ард түмнийхээ итгэлийг тээн их хурлын суудалд тухалсан ч тэр Н.Номтойбаяр нэрээ юмтайбаяр гэж хэлүүлэхэд хүрээд байна. Улс орон, ард түмнийхээ өмнө хүлээсэн үүрэг хариуцсан ажлаа хийхээс урьтан гадаад дотоодын буудлуудыг дуусгаж байгаа УИХ-ын эрхэм гишүүн Н.Номтойбаярыг “Скандал” буландаа онцоллоо. Нас залуу цус шингэн гэхэд хэнээс ч дутахгүй скандал дүүрэн үйлдэл, адармаатай амьдарлыг туулж яваа нэгэн юм гээч. Түүнийг скандал дүүрэн амьдралын баримтаас нь сонирхоцгооё.

Скандал1: Угаагчаас төрийн түшээ болсон нь  

“Монголын алт” компанийн захирал Б.Нямтайширын хүү Н.Номтойбаяр угаагч хийж байсан гэвэл та итгэх үү? Монголын алдар цуутай хүмүүс дунд гадаадад сурч байх хугацаандаа байр савныхаа мөнгийг олохын тулд угаагч хийсэн хүн ямар их байдаг гээч. Угаагч, зөөгчөөс анх ажлынхаа гарааг эхэлсэн Н.Номтойбаяр арван жилээ төгсөөд л 17 настай Америкт хөл тавьж байсан гэдэг. Эрдэм номд шамдахын хажуугаар ажил хийж, анх мөнгөний үнэ цэнийг мэдэрсэн гэж ярьдаг Н.Номтойбаяр гурван сар угаагчаар ажилласан гэдэг. Бүр мянга орчим оюутанд үйлчилдэг хоолны газар гурван сар угаагч хийхдээ өөрөө хөдөлмөрлөж олсон мөнгөнийхөө амтыг илүүтэй мэдэрсэн хэмээдэг.  Түүнийг нь мэдэхгүй хүмүүсийн хувьд Н.Номтойбаяр худлаа ярьж байна гэлцэх юм билээ. Ямартай ч аяга угаагч хийж байсан хүн өнөөдөр төрийн түшээ болтлоо гэрлийн хурдаар өндөрлөгт гарсан байх юм гээч.

Скандал2: Хэлгүй” гишүүдийн нэг Н.Номтойбаяр

Парламентын “хэлгүй” гишүүдийн нэг, хамгийн залуу гишүүн Н.Номтойбаярыг “ах” нарынхаа дэргэд уурлаж, гараараа ширээ шаасан нь содон тохиодол болсон.

Н.Алтанхуяг Ерөнхий сайд байх хугацаанд МАН-ын Засаг дарга нарыг яагаад батлахгүй байгаа талаар мэдээлэл хийх үеэр тун ширүүхэн маргаж ширээгээ шаасан тохиолдол болсон. Ингэж л анх удаагаа шахуу үг хэлэхдээ үйлдлээрээ ууртайгаа харуулсан Н.Номтойбаярыг гишүүнээр сонгогдоход нь төр засах хэмжээнд хүрээгүй шавилхан нэгэн гэж харах хандлага үнэндээ нийтлэг байсан. Ордны зөөлөн сандалд тухлахаас өмнө түүнийг “МАК”-ын "нялх Сэнгүм", "нусгай жаал" гэх зэрэг олон хочтой байсан. Тэгвэл одоо бол Номтойбаяр нэрээ юмтайбаяраар солиод байгаа билээ.  

Скандал3: УИХ-ын гишүүн Н.Номтойбаяр хүн хутгалж, хүүхэн хүчинджээ

Төрийн ордны хойно байрладаг "Le Triskell" бааранд одоогоос хоёр жилийн өмнө УИХ-ын гишүүн Н.Номтойбаяр хүн хутгалжээ гэх яриа олон нийтийг цочроогоод авсан нь тухайн үеийн хамгийн том сенсааци болж байлаа.

Түүний ачаар “Мунзүй” хочит Г.Нямдорж олонд нийтэд алдартай болж хэвлэл мэдээллийн нүүр хуудас, цэнхэр дэлгэцийн урилгагүй зочноор уригдаж, цаашлаад шоронд хүртэл дахин яваад ирсэн билээ. Бие бие рүүгээ хутга барьж дайрсан гэх энэхүү хэрэг тухайн үедээ шуугиан тарьж байсан ч одоо бол мартагдсан. Харин Н.Номтойбаяр гишүүний хутганд нэгэн хамгаалагч өртөж биеийн байдал нь нэлээд тааруухан байж байгаад гадаад руу явж эмчлүүлээд сураг алдарсан.

“Мунзүй” хочит Г.Нямдоржтой ээлжлэн хэвлэл мэдээлэл мэдэгдэл хийж байсан Н.Номтойбаярын но үүгээр дууссангүй үргэлжилсэн юм. Түүнийг хүүхэн хүчиндэж, хүн дарамталж байсныг илчилсэн  “Мунзүй” хочит Г.Нямдоржтой дээхнэ үедээ тун дотно найзууд байсан гэх бөгөөд эрхэм гишүүнийг мөнгөөр зодон байж олж авсан зөөлөн суудлаас нь арай л ховхолчихоогүй. Тэмцэлдсээр байгаад дйилсэн. Харин нь хэн нь үнэн, хэн нь худал хэлээд байхыг нь ойлгохгүй болтол нь тэмцэлдсэн “Мунзүй” хочит Г.Нямдорж эцсийн дүнд аавынд морилж энэ хэрэг дуусгавар болсон.

Скандал4: Хүүхнээс болж хүнийг ална гэж сүрдүүлсэн нь

Хийж бүтээснээрээ биш, зугаа цэнгэлээрээ өрсөлдөж, эцэст нь эхнэр хүүхнүүдээ хоорондоо булаацалдаж бие биенээ доромжилж, ална хядна хэмээн сүр дуулиан зарласан П.Энхмөнх , эрхэм гишүүн Н.Номтойбаяр нар хэр ёс зүйтэй улс вэ гэдгээ олон нийтэд үг үйлдлээрээ үргэлж баталдаг. Бие биенээсээ хүүхэн шуухантай орооцолдсоноороо нээх их давж гараад байхгүй энэ хоёр бэл нүнжигтэй аавын хүүхүүдийн хэрүүл анх ингэж эхэлсэн. П.Энхмөнх өөрийн фэйсбүүктээ “Номтойбаяр миний голоод хаячихсан хүүхнийг аваад суучихсан. Ха ха ха” гэж бичсэнээр ээлжит хэл амандаа ороогдсон удаатай.

Түүний голсон гээд байгаа хүүхэн нь МАК-ийн эрх тайж Н.Номтойбаярын гэргий асан Б.Мандухай байлаа. Ийнхүү үүнийг сонссон эрхэм гишүүн уураа барьж яадан П.Энхмөнх рүү  “Яасан олон юм ярьдаг юм бэ. Ална шүү” гэж залгасан тухай өөрийн твиттер хуудаснаа жиргэсэнээр Н.Номтойбаярын ээлжит шуугиан дэгдлээ. Хутга шөвөгний асуудал намжаагүй байхад ахиад л авгай хүүхний асуудал үүсгэсэн Н.Номтойбаяр их хуралд ганц үг ган хийхгүй хэрнээ авгай хүүхнүүдийнхээ талаар ээрч муурахгүй, эргэлзэж тээнгэлзэхгүй, хольж солихгүйхэн шиг эхнэр хүүхнүүдээ өмөөрөх юм гээч гэх яриа энэ үед газар авсан байлаа. Гэвч хийчихээд хийгээгүй гэж гүрийхийн оронд идсэн хоолондоо сав болж хэлсэн үг хийсэн үйлдэлдээ эзэн болох нь эр хүний нэг чанар шүү. Н.Номтойбаяр ямартай ч бүсгүйчүүдэд тун өгөөмөр, зөөлөн ханддаг нэгэн.

Скандал5: Н.Номтойбаяр Л.Оюун-Эрдэнийг мад тавив

Албан тушаалыг гуйгаад эс олдвол гуядаад авч болно гэдгийг утгаар нь харуулсан УИХ-ын гишүүн Н.Номтойбаяр НАМЗХ-ын ерөнхийлөгч болох гэж санаархаад бүтсэнгүй. Угтаа бол НАМЗХ-ын ерөнхийлөгчөөр Л.Оюун-Эрдэнэ ажиллаж байгаа хэдий ч түр хугацаагаар гадаад сурахаар явж эзгүй байх үеэр Н.Номтойбаяр эзгүйчлээд авсан юм.

Бүр цаашлаад ерөнхийлөгчийн албан тушаалд давхар санаархсан Н.Номтойбаяр өнгөрсөн шинэ жилийн “Алтан сарнай” наадмын үеэр түүнээ дэлгэсэн.  Тухайн үед хэн ч анзаараагүй гээд л бодчих. Юу гэвэл наадмын урилган дээр “Ерөнхийлөгч Н.Номтойбаяр” гээд дурайтал биччихсэн байсан байна. Уг нь мань эр үүрэг гүйцэтгэгч нь байсан юм л даа. Сэргэлэн нь л хоолоо олж иддэг хойно Л.Оюун-Эрдэнийг эзгүйд боломжийг төгс ашигласан байгаа юм чинь. Ингэж мад тавиулсанаа Л.Оюун-Эрдэнэ мэдээ ч үгүй явж байгаад саяхан сургуулиа төгсөж ерөнхийлөгчийн суудалдаа лавхан суугаад авсан сурагтай. Энэ үйлдлээс болсон уу МАН-ын залуус хоорондоо тун тааруухан болж хоёр талцсан гэж дуулдсан.

Скандал6: Н.Номтойбаярын нууц хүүтэй юу?  

Хорь ч хүрээгүй байхдаа аав болсон Н.Номтойбаяр том болсон хүүтэй гэдгийг тэр бүр хүмүүс мэддэггүй. Өөрөөсөө нэлээд эгчмэд бүсгүйтэй анхны амьдралаа зохиосон Н.Номтойбаярыг өвөө болгох хүү Мөнгөншагай нь Нямтайшир ноёнтны эрх шар хэмээдэг. Н.Номтойбаярыг аав гэж дуудахаас илүүтэй эмээ өвөө дээрээ өссөн Мөнгөншагай найз бүсгүйтэй.

Хоёр жил гаран үерхэж байгаа найз бүсгүйдээ бөгж бэлэглэснийг харвал Н.Номтойбаяр тун удахгүй өвөө болж мэдэх нь байна шүү. Өвөө болж байж л намба сууж ач зээгээ харсан үедээ л ном журмандаа орох нь гэгдэх Н.Номтойбаярыг өвөө болохыг нь хүлээх үлдээд байна.

Скандал7: Мянгаа ноёнтоны халааг Н.Номтойбаяр авах уу?

Монгол жижигхэн тэр дундаа Улаанбаатар бүр жижигхэн. Тэр дундаа олны танил эрхмүүдийн толгой эргэм хайр дурлалын түүхийг сөхөхөд тун амархан гаргалгаатай. Нэгээс нөгөөд цэцэг дамждаг эрхмүүдийн тоо ч тодорхой болчихсон. Цэцэг дамждаг эрхмүүдийн эгнээнд Н.Номтойбаяр яахин багтахгүй байх билээ. Хэдэн баячуулын зугаа цэнгэлийн хатан хаануудыг ээлж дараалан сольж голсон эрхмүүд болох Ц.Мянганбаяраас Н.Номтойбаяр хүртэл үргэлжлэнэ. Тэгвэл нас яваад намба суусан Ц.Мянганбаяр ноёнтоны халааг Н.Номтойбаяр авч байгаа гэх яриа сүүлийн үед газар аваад буй. Үүнийгээ батлах мэт Мянгаа ахынхаа дөрөв дэхь хатан Д.Ариунцэцэгтэй хүртэл романсдаад авсан нь саяханы явдал. Харин Мянгаа ах нь үүнийг сайшаасан уу, буруутгасан уу бүү мэд. Ямартай ч Мянгаа ахынхаа халааг авч байгаа Номтойбаярын амрагийн явдлыг ээлж дараалан хүргэж байна.

Насаар эгчмэд Мөнгөншагай хүүгийнх нь ээж бүсгүй одоогийн байдлаар нууц. Хүүхэд байхдаа шахуу эгчмэд бүсгүйд дурлаж аав болсон Н.Номтойбаярын албан ёсны анхны буюу албан бусаар хоёр дахь гэргий нь Ш.Туяа гэх бүсгүй. Өндөр боловсролтой дулаахан төрхтэй энэ бүсгүй Н.Номтойбаярт хөөрхөн охин төрүүлж өгсөн. Өдгөө ахлах ангийн сурагч болсон Сүндэрьяа хэмээх охинтой хосууд багагүй хугацаанд хамт амьдарч хайрын түүхээ хэлхэж явсан гэдэг. Антрологич хэмээх ховор мэргэжилтэй Ш.Туяа сүүлийн үед цэнхэр дэлгэцээр үзэгдэж харагдах болсон бөгөөд Н.Номтойбаяраас хойш хүнтэй суугаагүй ганц бие ээж хэвээрээ байгаа.

Харин удаах гэргий буюу гурав дахь эхнэр Б.Мандухайн тухайд анхны амьдралаа топ модель Д.Пүрэвсүрэнгийн экс П.Цэгцбаатартай эхлүүлж, хөөрхөн охин тэвэрсэн. Угсаа гарал сайтай, бэлтэй айлын бийлэгжүү охин. Хувиараа бизнес эрхэлж хажуугаар нь Н.Номтойбаярт хүү, охин төрүүлж өгсөн Мандухай дэгжин гоёлоо өмсөөд дээгүүр хараад алхвал баргийн миссүүдээс дутахааргүй сайхан бүсгүй. Хажууд нь Н.Номтойбаяр суганд нь орохоор намхан харагддаг байсан шүү. Ийнхүү гурав дахь эхнэрийн нүүр харж дөрвөн хүүхдийн аав болж байж намба суулаа хэмээн Н.Номтойбаярыг хүлээж байсан ч тэр хэн бүхний итгэлийг алдсан юм. Бие хаа, царай зүсээрээ Н.Номтойбаярыг ёстой л чимж явсан гурав дахь гэргий Мандухайгаа нялх биетэй байхад нь мисс бүсгүйтэй холбогдсон нь Д.Ариунцэцэг байлаа. Тэр гэргийгээсээ салахдаа хоосон орхисонгүй. Тансаг хаус "G Class" үлдээсэн гэнэ лээ.

Ц.Мянганбаяр ноёнтон өр ширэнд баригдаж үстэй толгойгоо зулгааж суухад экс эхнэрүүдийнх нь зарим нь амьдрал зохиож хэд хэдэн хүүхдийн ээж болсон байна. Харин зарим нь нэг залуугаар нөгөө залууг сольсон шиг залуу халуун насныхаа гоо үзэсгэлэнг ашигласан шиг амьдарч байна цаана чинь. Экс гэргий Д.Ариунцэцэг нь Номтой ноёнтоны овоо хараанд өртөж бас болоогүй хэсэгтээ хэлхэлдээд авсан. Монголын сор болсон миссүүдийн гурван бүсгүйг эхнэрээ болгож сор болсон бүсгүйчүүдийг өвөр түрийндээ оруулаад авсан Мянгаа ноёнтоны халааг Номтойбаяр авч байгаа гэж болно. Хаана ямар сайхан ганц бие ээжүүд байна тэднийг онилдог Номтойбаяр Д.Ариунцэцэгтэй өнгөрсөн жил романсдаж олны хараанд хэд хэдэн удаа өртөөд авсан. Бас болоогүй гадаадын хэд хэдэн улс дамжин аялаж зугаалаад амжсан Д.Ариунцэцэг өдгөө мөн л хүүхнүүдийн эрлэг “Баян” Базараатай хамтын амьдралаа эхлүүлээд байгаа билээ. Одоогоос хоёр жилийн өмнө эрхэм гишүүн Н.Номтойбаярын заншсанаар Сингапурт, Малайзаар тойрон аялж амрагласан.

Тэгвэл энэ жил дуучин Агийтай Хонгконгоор аялж зугаалж яваад онгоцны буудал дээр олзлогдож бас болоогүй Мянгаа ахынхаа замналаар машин бэлгэлдэг уламжлалыг нь өвлөн авч Агийд машин бэлгэлэснийг хэзээд анхдагч байдаг “Гранд” сэтгүүл онцолсон байна. Хүүхнүүдтэй амраглахдаа хил дамнан болзсон ч олны хараанд өртчихдөг Н.Номтойбаярын янаг амрагийн явдал хэзээ дуусаж улс төрийнхөө ажилд орох бол гэж хүлээсэн сонгогчид нь дөрвөн жил хүлээж байна.

Скандал8: Н.Номтойбаяр янагийн ягаан өмднөөс салахаа байлаа

Янаг амрагийн явдал нь дийлдэхгүй байгаа УИХ-ын гишүүн Н.Номтойбаяр ягаан, улаан өнгийн өмднүүдийг илүүд өмсөх болсон. Баяр наадмаар ч тэр энгийн үед ч тэр ягаан, улаан өмдөө ээлжлэн өмсдөг болж. Ийн янагийн ягаан өмдтэй янагхан гишүүнд итгэл алдарсан сонгогчид нь “Биеэ засаад гэрээ, гэрээ засаад төрөө гэдэг логикоор бол төр төвхнүүлэх нь бүү хэл гэрээ засаж амжихгүй яваа хөөрхий Н.Номтойбаяр хөөрхий”  гэж дуу зохиох дээрээ тулаад байна. Амрагийн явдлаа зохицуулахгүй бол дараагийн сонгуульд баяртай ч гэж мэдэх нь байна шүү, эрхэм гишүүнээ!

Амандаа алтан халбага зууж төрсөн МАК-ын өв залгамжлагч маань Их хурлын гишүүн болсон биш зураг шиг охидыг тэрэг шиг дайрч, шунхан улаан залуу насыг гялтагнуулж явна. Харин улс төрд ороод албан ёсны эхнэр ч авч, хэсэг томоожих гэж үзсэн ч угийн мөн чанарыг улс төрийн дэвжээ ч өөрчилж болохгүй юм гээч.

М.Сонор

Эх сурвалж: www.grandnews.mn