“ТБД”-гийн бэр болох шахсан бүсгүй

Олны танил хүмүүсийн дурлал хайрыг дамжуулахдаа үргэлж шуурхай байдаг “Гранд” та бүхэнд шинэ хосуудыг танилцуулж байна. “Гурван найз” киноны гуниг гудиггүй салхин сэнс шиг савсагануур хархүүгийн дүрээр олонд хайрлагдсан Цэрэндалай буюу Анхаа охидын сонирхлыг татдаг дүр. Одоо л өөрийгөө голонгуй “Бүр харахаас дургүй хүрээд, өндөр болоод үсээ ингэж хуваагаад залуу болохсон” гэж “Авьяаслаг Монголчууд” шоуны тайзны ард үглэж зогсоо болохоос. “Шоубиз” нэвтрүүлгээр шогийн мэдрэмжээ, олон олон киногоороо оройгүй их авьяасаа гайхуулсан тэрбээр хамгийн сүүлд Б.Мишээл хэмээх залуу жүжигчинтэй болзож дуранд өртөж байв. “Үүлэн үст”-ийн клипээр гарч ирсэн бүсгүй бас ч үгүй байр суурьтай авьяаслаг найз залуутайнх оюутан байхаасаа олон кинонд гол дүр бүтээсэн байдаг. Гэвч тэд нэгэнт салж бүсгүй хадамд гарч, үрийн зулай үнэрлэж “сайн ах”-тай ахгүй сайхан амьдрах чадалтай гэдгээ харуулсан билээ. Тэгвэл Анхаа энэ удаад шинэ найз бүсгүйгээрээ “MCS”-ийн Ж.Оджаргалын эгчийн охиныг онилжээ. Ээж шигээ нүдэнд дулаахан бүсгүй өмнө нь “ТБД Андууд”-ийн Д.Тэрбишдагвын хүүтэй үерхэж сүй тавьсан гэгдэж байв. Хамтдаа наадамлан, халамжтай гэгч нь алхалж явсан нь хоёр жилийн өмнөх явдал. Гэвч мөн л сүй тавихын даваан дээр хоёр тийш болсон билээ. Тэрнээс хойш бүсгүй ганцаар явсаар, бэлтэй айлын охидод нүдтэй хүмүүсийн харцанд тунасаар байсан юм.

Эцэстээ жүжигчин залууг сонголоо
Нас хэлэлцбэл үе тэнгийн байж мэдэх хоёр эцэст нь энэ амьдралд бие биенээ олсон бололтой. Анхаагийн уран яруу мэдрэмж ямар ч бүсгүйг “умруулахаар” гэдэг. Байдаг л барааны саван шиг залуусаас урлагийн хүн өөр л дөө. Сониноос, дуучин хуурчингууд ихэвчлэн баян айлын хүргэн, бүр хадам ээжийнх нь нөхөр болсон байдгийг бид мэднэ. Жүжигчин хүн бийлэгжүү айлд бэр ордгоос хүргэн болсон нь ховор. Эмэгтэй хүн бол дутуу байсан ч тэрийгээ “эмэгтэй” гэдэг тодотголоороо нөхөж болдог бол эр хүнд хүчирхэг байх бас дахин хүчирхэг байх шалгуур тавигддагаас бардам зангаа хааяа дарах хэрэг гардаг биз. Тэр тусмаа жүжигчин, яг салбартаа тодорч яваа залуус энэ тал дээр амбицтай ханддаг. Анхаа ямар ч байсан бүх бардам зангаа хойш нь тавин “баян” шошготой айлын охинтой романслаж эхэлж. Бүсгүйг хүмүүс бие давхар уу гэлцэх болсон. Тийм бол галт тэрэг аль хэдийнэ хөдөлсөн гэсэн үг.

Эх сурвалж: "Гранд сэтгүүл"