Хууль зүйн сайд Д.Дорлигжавын охин Д.Сарангэрэл, найз залуу Б.Сэрээтэр нар Турк улсад харамсалтайгаар амиа алдсан тухай мэдээлэл монголчуудыг цочирдуулаад байна. Хосууд энэ сарын 7-нд Истанбулын Бешикташ дүүрэгт байрлах 5 одтой зочид буудалд байрласан байсан бөгөөд орой нь хамтдаа далайн түрлэг харах зориулалттай зассан нарийн замаар алхалж яваад Б.Сэрээтэр ус руу унаж, түүний араас амийг нь аврах гэсэн Д.Сарангэрэл ус руу үсэрч орон, хамтдаа амиа алджээ. Тэдний цогцосыг энэ сарын 11-ны өдөр аврах албаныхан далайгаас гаргаж авсан байна. Үерхэж дотносоод удаагүй байсан хосууд Туркийн нийслэл Истанбул хотод Валентины баяраа тэмдэглэх болзоо тогтоон, тус улсад оччихоод байхад ийм эмгэнэлт явдал болжээ.

Сэрээтэр нь АПУ-гийнхны бага дүү гэдгээрээ олонд танил, “Шунхлай”-гаар овоглодог, MTS-ийн П.Бат-Эрдэнийн том хүү, Швейцарын Женев дахь Вебстерийн их сургуульд суралцдаг. Гурван жилийн өмнө “Хөрөнгийн бирж”-ийн гүйцэтгэх захирал асан Х.Алтайн эхнэр Ц.Авиддарийн дүү Ц.Мандаргуатай сууж, С.Анурка хэмээх өвөрмөц нэртэй хөөрхөн охинтой болсон. Албан ёсоор хурим найр хийгээгүй ч хосууд Швейцарт анхны амьдралаа эхлүүлж охиноо өлгийдөн авч байжээ. Гэвч 2 жилийн өмнө хосууд салсан бөгөөд Б.Сэрээтэр эрхэм сайдын охин Д.Сарангэрэлтэй үерхээд удаагүй байжээ.

Хууль зүйн сайд Д.Дорлигжавын охин Д.Сарангэрэл нь жил жилийн наадмаар аав, ээжтэйгээ хөтлөлцөн наадмын асар юуг чимдэг, ёстой гэрэл цацруулсан охин байв. Эрхэм сайд хүү, охин хоёртой бөгөөд Д.Сарангэрэл аавын амин хайртай, эрх танхи охин байлаа. Хясаанд нуусан сувд мэт үзэсгэлэнт тэрээр гадаадад сургууль төгссөн гэхээс өөр тодорхой мэдээлэл байдаггүй. Ийм сайхан удам судартай бол удам судартай, боловсрол мэдлэгтэй бол боловсрол мэдлэгтэй, цэцэг шиг хоёр сайхан хос залуу насны хайр дурлалд умбаж, амьдрал эхлүүлэх гэж яваад бурханы оронд явсанд харамсаад баршгүй. Аав ээж, ар гэрийнхэнд нь чин сэтгэлийн угаас гүн эмгэнэл илэрхийлье!

Эх сурвалж: Grandnews.mn