Угаасаа А.Зулаагийн зөв, телевизийн захирлын охин л аавынхаа сувгаар “Зулаа доогуур зураас ...”, “Та баасан уу?”гэж ярьж чадна. Гэхдээ яадаг юм, хөгжмийн нэвтрүүлэг хөтлөлтөнд Зулаагийнх гэдэг стиль, жанар нэмэгдсэн шүү дээ. Аав нь Монголын анхны хувийн чөлөөт телевизийг үүсгэн байгуулж тэр чигтээ мандсаар эрхэм гишүүнээс элчин сайдаар одсон бол охин нь өв залгамжлагчаар тодорсон.

25 дугаар суваг телевизээ удирдан буйр суусан бүсгүй нэг мэдэхэд З.Алтайг өвөө болгов. Чөлөөт сэтгэлгээтэй бүсгүй нөхөр сонголтондоо тун “гадаад” стилиэр хандаж. Түүний нөхөр Ц.Цэнгүүн хэмээх энэ залуу эдийн засагч мэргэжилтэй, ХБНГУ-д бакалавр магистр хийжээ. Орчин цагт ховорхон блицтэй  энэ залуу Таван толгойн хөрөнгө оруулалтын захирлаар ажилладаг гэдгийг хүмүүс тэр бүр мэддэггүй. Бараг л уурхайн тархийг “баздаг” залуутай суусан бүсгүй тун жавхаалаг харагдаж байна.

Хоёр хүүхдийн ээж болсон А.Зулаа болзож яваад манай дуранд өртсөн нь энэ. Угийн сэргэлэн бүсгүй маань нэгэн сонирхолтой ажил эхлүүлээд буй. Дэлхийд бестселлэр болоод буй хүүхдийн хоолны номын эрхийг тэр худалдаж аван орчуулсан байна. Тун удахгүй А.Зулаагийн нэвтрүүлсэн жороор ээжүүд хоол хийж эхлэх нь байна. Төрж тэлсэн болгон галбираа хадгалах гэж үхэлдэн зүтгэхээс хүүхдэдээ эрүүл хоол өгч буй эсэхдээ анхаарч дэлхийн туршлага судалдаг нь юу л бол. А.Зулаагийн энэхүү ажил олон хүний талархлыг хүлээж хүлээлт үүсгээд байна. Нөхөр, эхнэр хоёр салбар салбартаа л тэсрэлт хийх нь дээ. 

Эх сурвалж: www.grandnews.mn