Цагааны Цэгмидийн хүү жүжигчин Ц.Төмөрбаатарын том хүү Т.Анар аавынхаа үргэлжлэл болж дэлгэцийн урлагт хүчин зүтгэж яваа нэгэн. Анх аавтайгаа зургадугаар ангид байхдаа танилцаж байсан тэрбээр нэгэнтээ “Манай хойд эцэг, ээж, аав гурвуулаа сууж байгаад надад миний төрсөн эцгийг хэлсэн.

Хойд эцгийгээ л ааваа гэж бодож явтал төрсөн эцэг чинь энэ хүн шүү гээд ороод ирэхээр юу болоод байгааг мэдэхгүй төөрчихдөг юм билээ. Хэсэг бодсоны эцэст  өсгөсөн эцэг, төрсөн эцэг  гэж  хоёр хүн байгааг ойлгосон. Тэр үед дөнгөж зургадугаар анги төгсөж байсан болохоор амьдралын нарийн ширийн зүйл ойлгоогүй, тооноос өөр зүйл мэддэггүй, байгаль шинжлэлийн сонгонд явдаг, ном л их уншдаг хүүхэд байлаа. Тийм болохоор хүлээн авахад сэтгэлзүйн хувьд бэлэн биш байсан. Гэхдээ хүн чинь их муухай юм. Төрсөн эцгээ гэж мэдүүт их сонин сэтгэгдэл төрөөд аав руугаа явмаар ч  юм шиг. Ёстой л хүний хүүхэд хүрэн бөөртэй гэдэг яг үнэн.

Гэхдээ миний хойд эцэг муу хүн байгаагүй. Намайг өдий зэрэгтэй хүн болгосон. Бурхан болсон л доо, хөөрхий минь. Би өөрийгөө хоёр аавтай гэж бодож явдаг. Миний төрсөн эцэг бол яалт ч үгүй миний удам судар, гарал угсаа, нөгөө аав минь болохоор намайг ухаан суулгаж хүн болгосон хүн. Бага байхдаа аав яагаад намайг хаяад явчихсан юм бол гэж боддог л байсан. Хүний амьдралд юу эс тохиолдохыг тэр гэхэв. Үл ойлголцол, асуудал байсан л байлгүй. Хамгийн гол нь урлагийн хүмүүст ямар нэгэн золиос заавал байдаг бололтой. Одоо энэ салбарын жаргал зовлонг зах зухаас нь мэдэрч, даваа нугачаа даваад ирэхээр үүнийг ойлгож, аавыгаа зөвтгөх тал руугаа орж байна. Би 2010 оноос “Чонын алтан шагай” гэдэг кинонд тоглоод, үргэлжлээд “Улаан эрэг”, “Ану хатан”, “Улаан дөрвөлжин” гээд олон сайхан кинонуудад тоглосон. Энэ хоёр жилийн хугацаанд гэртээ 64 удаа хоносон байдаг. Бусад үед нь хөдөө натурт гараад явчихсан. Ингээд ирэхээр үр хүүхэд, хань ижил, гэр бүлийн тогтвортой байдал алдагдаж эхэлдэг. Одоо л аав намайг яагаад орхиод явсныг ойлгож байна” хэмээн ярих  Т.Анар аавтайгаа усны дусал шиг адилхан юм билээ.

Тэрбээр мөн л аавынхаа түүхийг давтаж,  анхны амьдралдаа цэг тавьж, хэнзхэн хайртайгаа учраад удаагүй байгаа аж. Анхны эхнэрээсээ хөөрхөн  охинтой Т.Анар ажил мэргэжлийг нь ойлгох охин олж авсан бололтой. Сүүлийн үед хаана ч явсан хэнзхэн хайрын эзнээ гараас нь тавихгүй тас зуураастай явж харагдана лээ. Ямартай ч түүний цаашдын уран бүтээлд амжилт хүсье.

М.Сонор