Шударга өрсөлдөөн, хэрэглэгчийн төлөө газар /ШӨХТГ/-аас хууль зөрчсөн шатахуун импортлогч нэр бүхий аж ахуйн нэгжүүд шатахууны үнэ нэмсэнд хариуцлага тооцох талаар мэдээлэл хийлээ.

Энэ үеэр “Магнай трейд”, “Сод Монгол”, “Тэс Петролиум” гэсэн компаниуд хомсдол үүсгэж, үнээ өөрчилсөн хэмээн мэдэгдлээ. Тиймээс ШӨХТГ-аас удаа дараа хууль зөрчиж байгаа компаниудын эрхийг түдгэлзүүлэх санал гаргаж байгаагаа дуулгасан бөгөөд “Магнай трейд” компанийн эрхийг цуцлах саналыг өнөөдөр Уул уурхай, хүнд үйлдвэрийн яаманд хүргүүлэх аж. Шатахуун импортлох тусгай зөвшөөрлийг цуцлах санал хүргүүлж байгаа үндэслэлээ тэд "Удаа дараа үнээ нэмж, хоёр удаа зөрчил гаргасан" хэмээн тайлбарласан юм.