Ерөнхийлөгчийн тамгын газрын дарга З.Энхболд нь өөрийн цахим хуудсандаа "Сангийн сайд Чимидийн Хүрэлбаатарын төрсөн ах нар болох Чимидийн Гантулга, Чимидийн Гансүх, мөн зөвлөх К.Дэмбэрэл нар Увс аймгийн Бөхмөрөн сумын Хотгор шанагын уурхайг Солонгосын компанид 2 сая доллараар заржээ" хэмээн нийтлээд байна. Харин АМГТГ-аас дээрх хүмүүсийн эзэмшдэг хайгуулын болон тусгай зөвшөөрөлтэй компани өмнө нь болон одоогоор бүртгэгдээгүй байгаа талаарх албан бичгийг Сангийн сайд Ч.Хүрэлбаатар өөрийн цахим хуудсандаа дэлгэлээ. Тэрээр “Би болон манай ах нар ямар нэг Уул уурхайн лиценз өмнө нь болон одоо эзэмшиж, зарж байгаагүйг батлах баримт. Сайт руу орж шалгана уу?!!!” хэмээн нийтэлж, “Гүтгэнэ, гүтгэнэ гэхэд арай дэнэдэж байна” гээд цагдаагийн байгууллагад гомдол гаргаж, шалгуулахаа мэдэгджээ. Сангийн сайд Ч.Хүрэлбаатар Хууль, цагдаагийн байгууллагад ийнхүү гомдол гаргавал Ерөнхийлөгчийн тамгын газрын дарга З.Энхболд Зөрчлийн тухай хуулиар “Хүний нэр төр, алдар хүндийг гутаан доромжилсон худал мэдээллийг нийтэд дэлгэсэн, эсхүл мэдээллийн хэрэгсэл, нийтийн сүлжээгээр тараасан” хэрэгт унах бололтой.