УИХ-ын чуулганы нэгдсэн хуралдаанд оролцсон гишүүдийн 84.1 хувь нь УИХ-ын гишүүн Ө.Энхтүвшинг Шадар сайдаар томилохыг дэмжин, баталлаа. Санал хураалтад нийт 69 гишүүн оролцсоноос 11 нь дэмжих боломжгүйгээ эсрэг кноп дарж илэрхийллээ.

Томилгоог хийхийн өмнө гишүүд саналаа хэлэв.

УИХ-ын гишүүн Т.Аюурсайхан: Дэмжихгүй. Парламентад байгаа залуучууддаа дэндүү муу муухайгийн үлгэр жишээ үзүүлж байна.  Таны хүүхэд улс төрд явж байгаа юм билээ.

Та Ерөнхий сайдад өрсөлдөж, хамт олноороо дүнгээ тавиулсан. Ерөнхий сайдыг томилох болоход орж ирээгүй. Тэгсэн хэрнээ зарчим үнэт зүйл ярих дуртай. Шадар сайд болохгүй гэсэн, нүх болгон руу ороод байдаг хүн биш ээ гэсэн. Гэтэл өнөөдөр нөхцөл байдал өөрчлөгдсөн гэж тайлбарлалаа. Таны хэлсэн үг үргэлж өөрчлөгдөх юм байна. Тийм учраас дэмжихгүй байгаа юм.

Та намын даргаар ажиллаж байсан, бид шинэчлэлийн хөдөлгөөн өрнүүлж байсан. Та дарга хийж чадаагүй. Ганц удаагийн албан тушаал юу юм бэ. Ерөнхий сайдтайгаа та хэр гар нийлж ажиллах юм. Улс төрийн булхай луйвар ингэж явах юм бол засаж чадахгүй. Ичиж амьдрах хэрэгтэй. Зөнөж байгаа бол зөв зөнөх хэрэгтэй.

Түүний энэхүү үйлдлийг иргэд ёсзүйгүй хэмээн шүүмжилж байна. Ер нь чуулганы танхимд гишүүн үг хэлэхдээ ард түмнээ, өөрийгөө, төр ёсоо хүндэтгэж хүндэтгэлтэй ханддаг. Гэтэл Т.Аюурсайхан мэтийн хүмүүс гишүүн болмогцоо энэ мэт авир гаргаж байгаа нь олон нийт тэр дундаа ахмадуудын бухимдлыг төрүүлж байгаа нь дамжиггүй. Гэхдээ камерийн өмнө, олон нийтийн өмнө дүр эсгэх ёстой гэж байгаа юм биш. Зөвхөн хувь хүний бага ч гэсэн ёсзүйтэй байж, ард түмэн төрөө хүндэтгэж элдэв хүний санаанд оромгүй доромжлол хараалыг хэлэхгүй байгаасай гэж хүсэх юм.