-Засгийн газраа огцруулах кноп дарсан 33 гишүүний дийлэнх нь сайд болохыг санаархаж байна-

Өнөөдөр МАН-ын бага хурал хуралдаж Монгол Улсын 30 дахь Ерөнхий сайдын нэрийг тодруулах учиртай. Мэдээж Ерөнхий сайдад хэний нэр яригдаж байгаа нь таамаг төдий байгаа ч дахин  дахин дурьдах нь илүүц биз. Гэхдээ Ерөнхий сайдад хэн очихоос шалтгаалж их юм шийдэгдэнэ.

Хамгийн наад зах нь  яамдын сайд нар хэрхэн өөрчлөгдөх нь Ерөнхий сайдад хэн сонгогдсоноос шалтгаалах асуудал болоод байна. Эх сурвалжуудын таамгаас харахад Засгийн газраа огцруулах кноп дарсан 33 гишүүний дийлэнх нь сайд болохыг санаархаж байгаа бол сайдаараа үлдэх сонирхолтой хэсэг байгааг ч онцлох нь зүйтэй биз. Тухайлбал, Эрчим хүчний сайд П.Ганхүү, Батлан хамгаалах яамны сайд Б.Бат-Эрдэнэ, ХХААХҮ-ийн сайд П.Сэргэлэн, БОАЖ-ын сайд Д.Оюунхорол нар сайдаар үлдэж магадгүй байгаа аж. Гэхдээ хотын фракци буюу М.Энхболдын фракци ялагдвал байдал арай өөрөөр эргэх юм.

Тодруулбал, ХХААХҮ-ийн сайдын албан тушаалыг хоёр ч гишүүн горилж байгаа гэх. Г.Занданшатар, Х.Болорчулуун.  Х.Болорчулууны хувьд хувьдаа гурилын үйлдвэртэй учраас ашиг сонирхлын зөрчил үүсээд байгаа бол Г.Занданшатар Гадаад харилцааны яаман дээр ч санаатай байгаа гэнэ.

Харин БОАЖ-ын сайдын суудалд Д.Цогтбаатар, Б.Саранчимэг нарын нэр яригдаж байгаа юм. Гэвч тэд хоёр өөр фракциас дэмжлэг авч буй учир яалт ч үгүй Ерөнхий сайдаар хэн очихоос шалтгаалж тэдний горьдлого биелэлээ олох юм.

Ингээд цааш хөвөрвөл,  БСШУС-ын сайдад Ц.Цогзолмаа гишүүн очихоор тохироо хийгдэж, ХНХЯ-ны сайдаар Л.Оюун- Эрдэнэ, О.Содбилэг нар өрсөлдөж буй сурагтай.

Хамгийн сонирхолтой нь Засгийн газрыг унагахад том амбийц гаргасан Т.Аюурсайханы нэр ЗГХЭГ-ын даргад яригдаж байна.

Улмаар, Эрүүл мэндийн сайдад Д.Сарангэрэл, Хуульзүйн сайдаар Ш.Раднаасэд, Уул уурхай, хүнд үйлдвэрийн сайд Даш.Зоригт,  Сангийн сайдад Ц.Даваасүрэн, Ч.Хүрэлбаатар, Барилга хот байгуулалтын сайдад Я.Содбаатар гэсэн нэрс эхнээсээ дуулдаж байна. Мөн дэд сайд Б.Цогтгэрэл, Б.Энхбаяр, Х.Булгантуяа нар суудалдаа үлдэхийн тулд их л чармайж байгаа сурагтай шүү.

Д.Дуулим