Ирэх есдүгээр сарын 6-наас 7-ны өдрүүдэд Монгол Улсын Ерөнхийлөгч Халтмаагийн Баттулга тэргүүтэй төлөөлөгчид Владивостокийн Русский арал дээр болох Дорнын эдийн засгийн III чуулга уулзалтад /ДЭЗЧУ/ оролцоно. Энэ тухай тус чуулга уулзалтын цахим хуудаст мэдээлснийг ТАСС агентлаг уламжлав. 

Энэ талаар Монгол Улсаас ОХУ-д суух бүрэн эрхэт Элчин сайд Б.Дэлгэрмаа Москвад ОХУ-ын Ерөнхийлөгчийн зөвлөх Антон Кобяковтой уулзах үеэрээ мэдээлжээ. Тэрбээр мэдээлэлдээ “Долдугаар сарын 7-нд бүх ард түмнээсээ сонгогдсон Монгол Улсын шинэ Ерөнхийлөгч Х.Баттулга ДЭЗЧУ-д тус улсын төлөөлөгчдөө тэргүүлэн оролцох ба Ерөнхийлөгчийн хувиар Орост анх удаагаа айлчилж байгаа нь энэ юм” хэмээн дурдсан байна.

Талууд ДЭЗЧУ-ын ажил хэргийн хөтөлбөрийн хүрээнд хоёр орны бизнесийн салбарын төлөөлөгчдийг оролцуулсан Орос-Монголын дугуй ширээний ярилцлага зохион байгуулах боломжийг хэлэлцэн ярилцсан байна. Монгол Улсын төлөөлөгчдийн бүрэлдэхүүнд 120 орчим албан тушаалтан, бизнесийн төлөөлөгч багтжээ.