Монгол Улсын Ерөнхийлөгч Халтмаагийн Баттулга энэ сарын 28-нд буюу өнгөрсөн баасан гарагт өөрийн улс төрийн зөвлөхөөр Ерөнхий сайд асан Н.Алтанхуягийг томилсон байна. Тэрбээр тамгын газрын даргаараа УИХ-ын дарга асан З.Энхболдыг томилсон бол энэ удаа дээрх томилгоог хийв. Түүнчлэн гадаад зөвлөхөөрөө Гадаад хэргийн сайд асан Л.Пүрэвсүрэнг үргэлжлүүлэн ажлуулахаар болж байгаа гэх мэдээлэл бий. Л.Пүрэвсүрэнгийн хувьд Ц.Элбэгдорж ерөнхийлөгчийн гадаад бодлогын зөвлөхөөр ажиллаж байсан туршлагатай бөгөөд төрийн залгамж халаа гэдэг утгаараа салбараа мэддэг хүнд нь даатгаж байгаад улс төрийн хүрээнийхэн ам сайтай байгаа аж. Шинэ ерөнхийлөгчийн багт УИХ-ын дарга, ерөнхий сайд, гадаад хэргийн сайдын албыг хашиж байсан хүмүүс багтаж байгаагаас харахад хүчирхэг баг бий болох нь ээ.