Зөрчлийн тухайн хуулийн шинэчлэсэн найрууллагад Ц.Гарамжав гишүүний оруулсан санал өндөрөө авч, олон нийтийн бухимдлыг төрүүлээд байна. Тэгвэл үүнд эсрэг талын байр суурьтай, илүү нухацтай талаас нь хандаж байгаа хүмүүс байгааг ч онцлох нь зүйтэй. Тухайлбал, зарим хүн гүтгэлэгт ямар нэг хуулийн зохицуулалт зайлшгүй байх хэрэгтэй. Хүний нэр төр гэдэг хамгийн эрсдэлтэй, чухал зүйлийн нэг, үүнийг сүүлийн өдрүүд хүмүүс ихэд тунгааж өөр хоорондоо талцаж байгаа нь асуудлыг эргэн нухацтай бодоход хүргэж байна гэх. Нөгөөтэйгүүр хамгийн орхигдож болохгүй, өнөөдрийн нийгэмд хаягдаад байгаа сэдэв Ц.Гарамжав гишүүний ачаар дахин сөхөгдөж байгаа нь сайн зүйл гэж дийлэнх хүмүүс үзэж байна. 

Ганцхан жишээг иш татан оруулъя.

Сэтгүүлч Г.Мөнхбаясгалан: Би Сэтгүүлзүйд хайртай учраас Зөрчлийн тухай хуулийг дэмжиж байна

Тэрбээр "Би 20 жил энэ салбарт ажилласан. Сайн муу бүгдийг нь мэднэ. Яагаад гэвэл өөрөө биеэрээ туулсан учраас. Харин Зөрчлийн тухай хуулийн хувьд би салбараа сөрж байна. Тиймээ, би сэтгүүлчдийнхээ эсрэг байр суурьтай байна. Яагаад.... Энэ хууль батлагдвал магад хамгийн түрүүнд би өөрөө унана. Үүнийгээ ч мэднэ. Гэхдээ өөрсдийн хувийн эрх ашгаас илүү бусдын эрх ашгийг хүндлэх ёстой. ХҮНИЙГ ГҮТГЭЖ БОЛОХГҮЙ. ГҮТГЭЛЭГ ГЭДЭГ ХАРДАХ ЭРХ БИШ. МЭДЭХ ЭРХ Ч БИШ..Сэтгүүлчид яагаад өнөөдөр муу нэртэй байдаг вэ гэхээр бидний зарим нь мөнгө аваад захиалгаар хүнийг гүтгэдэг... Дарга тэгж бич гээд байхад бичихгүй байж болдоггүйн зовлон олон сэтгүүлчид тулгарч байгаа. Үүнээс салахын тул энэ хууль хэрэгжих ёстой. Тэр захиалга өгөөд байгаа дарга чинь 100 саяар торгуулахгүйн тулд чамд дарамт захиалга өгөхөө болино. Нөгөө талаас сэтгүүлч бид хариуцлага хүлээж сурья. Сэтгүүлч гэхээрээ л хариуцлагаас хол, юу ч хийж болдог балмад байхын нэр биш.Салбараа цэвэрлэж ариутгаж авмаар байна шүү дээ. Иргэдийн үнэнийг мэдэх эрхийг үнэн бодит мэдээллээр хангадаг болохоос гүтгэлэгээр хангадаггүй. Намайг юу л гэж бодвол бод. Би энэ удаа салбараа сөрж байна. Би МАН-д хайртайдаа, Гарамжавт дурласандаа биш Сэтгүүлзүйд хайртай” гэсэн юм.

Тэгвэл энэ заалтыг оруулж ирсэн Ц.Гарамжав гишүүний тухайд олон нийт, хэвлэл мэдээллийн эсэргүүцлээс болж Хууль зүйн байнгын хороон дээр гаргасан торгуулийг нэмэгдүүлэх зарчмын саналаа татаж аваад байна. Мөн тэрбээр “Хүний нэр төр мөнгөөр үнэлэх боломжгүй учраас л Зөрчлийн хуулийн торгуулийн дээд хэмжээнд тулган нийгмийн анхаарлыг энэ асуудалд хандуулахыг зорьсон болохоос үзэл бодлоосоо ухарсан зүйл үгүй билээ” гэж байр сууриа илэрхийллээ.

Өөрөөр хэлбэл, хүний нэр төрд халдах, гүтгэх гэдэг зүйл ямар эрсдэлтэй болохыг ард олон, хэвлэл мэдээллийнхний анхааралд аваачих гэсэн түүний зорилго ийнхүү биелэлээ олжээ. Гэвч зарим хүний хувьд байдлыг гартаа авч, эсрэгээрээ Ц.Гарамжав гишүүний нэр төрд халдаж байгааг уншигч та ажиглаж байгаа биз ээ.

Бүр тодруулбал, нэр бүхий гишүүдээс хуулийн төсөл дээр ажлаагүй гишүүн байж хөндлөнгөөс ийм санал оруулж ирсэн нь буруу мэтээр ярьж байгаа нь олон нийтийг өөртөө татаж, “ангийн анд”-аа түлхэж унагах гэсэн бохир арга мэт харагдаж байна. Мөн энэ асуудлын хэд, хэдэн эмэгтэй гишүүд байгаа ч Ц.Гарамжаваар халхавч хийн чимээгүй өнгөрч байгаа нь нууц биш юм.

Д.Дуулим