Улсын харцага Б.Пүрэвсайхантай гэргий Б.Шижиртуяа нар 

Улсын заан Д.Бумбаяр хоёр охиноо хоёуланг нь бөх залуучуудтай суулгаж зээ нарынхаа хөлд дарагдаад байгаа сурагтай. Оны өмнөхөн хоёр дахь зээгээ өлгийдөж авсан Д.Бумбаяр заан бөх хүргэчүүлийнхээ хөлд дарагдсан шинэхэн оноо өнгөтэй угтсанаа ойр тойрныхондоо дуулгасан байна. Бага охин Б.Идэрмаа нь Улсын заан Ч.Батзоригийн хүү Б.Дэнзэнсамбуу хэмээх сүрлэг сайхан нэртэй, сүртэй сайхан ч бие хаатай хүүтэй сууж хүүтэй болсон цаг өнгөрсөн жилийн явдал.  

Улсын заан Ч.Батзоригийн хүү Б.Дэнзэнсамбуу гэргий Б.Идэрмаагын хамт 

Араас нь зааны том охин Б.Шижиртуяа улсын залуу харцага Б.Пүрэвсайхантай сууж оны өмнөхөн анхны охиноо өлгийдөж аваад удаагүй байгаа аж.  Улсын харцага Б.Пүрэвсайхан Ч.Батзориг зааны төрсөн ахынх нь хүү бөгөөд ийн ах дүү хоёрын бөх хөвгүүд зааны хүргэчүүл болоод байгаа билээ. Ийнхүү жил дараалан бөх хүргэчүүлтэй зээ нартай болсон Д.Бумбаяр зааны бага хүргэн, Ч.Батзориг зааны хүү Б.Дэнзэнсамбуу Японы сумод суралцдаг бөгөөд ирээдүйд Аса, Хакухо нарын орыг залгах сайн сумочин болохын төлөө бүхнээ зориулж буй гэнэ лээ. Харин Улсын харцага Б.Пүрэвсайхан хадам аавынхаа удирдлага дор бэлтгэл сургалтаа хийж хадам аав, ах нарынхаа хүсэж мөрөөдөж явсан улсын хамгийн том цолонд хүрэхээр бэлтгэгдэж байгаа нэгэн гэж болно. Ингээд ирээдүйн аварга өнөө цагийн шилдэг харцага маань анхны хүүхдээ өлгийдөж аваад аав болсон баяртай мэдээг дуулгахад таатай байна.

Эх сурвалж: www.grandnews.mn