Монголын хүүхдийн дууны ертөнцөд алтан үсгээр бичигдэн үлдсэн бяцхан охин Т.Амина хорин жилийн дараа анхны бие даасан тоглолтоо хийв. Бидний насныхан хүүхэд байхын түүний фэн. Интернэтгүй бага насны маань дэлгэцийн гүнж байв шүү дээ. Ойрд шоу тоглолт зорьж очин үзээгүй “UB Palace”-т тэр тоглохоо зарласан. Хямралын үед танхим дүүрнэ, дүүрэхгүй гэж тоглолтоос өмнө сенсааци дэгдсэн байлаа. Жижиг газар цөөн үзэгчид өндөр үнээр тоглох тактикаас тэр татгалзсан нь бүр ч үзэх сонирхлыг төрүүлэв.
Балчир ахуйдаа 21 аймгаар аялан тоглолт хийж байсан “баавартай” хүн шүү дээ. За ингээд концертын танхимд очлоо. Үзэгчид пиг дүүрэн, хөгжлийн бэрхшээлтэй иргэд ч олноор иржээ. Урилгын суудалд гял цал зочид ч байв. Зочдын байдлыг харахад 8 настай балчраас 80 настай буурал хүртэл энэ бүсгүйг таньдаг болох нь илэрхий. Ашгүй удаан хүлээж чилсэнгүй, тоглолт эхэллээ.
Богинохон цагаан даашинзтай Т.Амина бүжиглэсээр гарч ирэв. Одоо харах нь ээ Монгол Биеонси гэмээр галбирлаг юм гээч. Ер нь түүнийг богино хувцас, иймэрхүү “аальгүй” даашинзтай том болсноос нь хойш харж байгаагүй юм байна. Харин багадаа бол богино цагаан даашинз, том тууз үсэндээ зангидчихсан дэгдэж л явлаа. Эхний хэсэг тэр чигээрээ халуухан, хурц, дайчин тавилттай, хэмнэл өндөр цоглог өрнөв. Үзэгчид ч доргин өндөлзөж байлаа.
Урт шаргал даашинзтай даруухан Т.Амина.
Хос багана нь чи бид хоёр оо ... гэж ирээд л уянгалав. Энэ хэсэгт гэр бүл, нутаг ус, арван жилийн гэнэн хонгор нас нүдний өмнүүр жирэлзэн өнгөрөв.
Ижий ... Т.Амина гурван хүүхэдтэй айлын отгон охин. Эдмон, Эдуард, Амина гээд нэр нь тун өвөрмөц юм билээ. Тэр даруухан монгол ижий ийм гэгээлэг дуучин охиноор монголын урлагийн түүхэнд Амина гэдэг нэрийг тод зуржээ. Ах нарыг нь онцлохын учир нь Эдмон “гуай” дуучны олон сайхан дууны үгийг, заримыг нь бүр аятай нь зохиожээ. Харин багад нь дууных нь ард үглэдэг хэсгийг хийдэг байсныг үзэгчид дэлгэцнээ тоглолтын завсарт хөврөх дүрс бичлэгээс мэдэв.
Эдмон тийм ч настай хүн биш, ид насны залуу. Харин Т.Амина эмэгтэй хүний насыг ил хэлдэггүй ч 7 настай тайзнаа гарсан, өдгөө 20 жил болсон гэвэл та нар ухаалаг юм чинь бодоод олчих. Эдмон дурлаж, хаягдаж, уярч асаж явсан үеэ дуунд мөнхөлжээ. Харин хамгийн сүүлд сахиусан тэнгэрээ олоод түүнийгээ ч мөн дуунд үлдээсэн байсан. Товчхондоо бараг гэр бүлийн тайлан тоглолт болчихов уу даа. Нэг гэрт ийм авьяаслаг хүүхдүүд төрнө гэдэг ховор тохиолдол.
Тоглолтонд дуучин бүсгүйтэй хамтран “UBS” телевизийн хөтлөгч, дуучин Э.Гантулга, сүүлд дебют болж байгаа “Аадар” хамтлагийн дуучин Алтанзавьяа нар дуулсан. Нэг нь костьюм өмссөн жентельмэн, харин нөгөө нь савхитай роккер маягийн шивээстэй залуу атлаа тун уянгалаг дотортой дуулж байв. Бритни Спирсийн ард бүжиглэдэг булчинлаг залуусыг ээж нар, сайхан хүүхнүүдийг аав нар харах гэж хүүхдүүдтэйгээ очдог гэдэг шиг Т.Аминагийн ард бүжиглэх залуус охид, хамт дуулж байгаа дуучид, бүсгүй өөрөө ч нүд гялбам байлаа.
Тоглолтын хамгийн оргил хэсэг Т.Аминад ирсэн гэнэтийн бэлэг байв. Түүний тоглолттой хамтатган 10 жилийн ойгоо хийж буй “МОТТОО” компанийн хамт олон дуучин бүсгүйд алтан микрофон бэлэглэсэн юм. Уулга алдам гэнэтийн сюрприз. Титэм зүүхийг хүсэж байвал титмээ даах хэрэгтэй гэдэг. Т.Амина алтан микрофонтой анхны Монгол дуучин боллоо. Ингэснээр түүний гүнж биш тайзны хатан хааны амьдрал эхэлснийг албан ёсоор тунхаглаж байх шиг.
Тоглолтын өөр нэг сэтгэл хөдөлгөм зүйл нь залуу дуучин бүсгүй, “МОТТОО” компанийн зүгээс ухаалаг тэргэнцрийг нийт гурвыг хөгжлийн бэрхшээлтэй иргэдэд зориулан хандивлав. Дуучны хэлснээр “Хүний сэтгэл багаддаггүй, өгье гэвэл ганцаасаа” гэдэг энэ дээ. Мөн Сонгинохайрхан дүүрэгт төрөх эмнэлэг барих ажлыг эхлүүлэн ажиллаж буй юм билээ. Хэдийгээр ил цагаан рекламдаад явдаггүй ч тэр олон хүмүүнлэгийн үйлст гар бие, сэтгэл зүтгэлээ зориулжээ. Энэ үдэш Т.Аминагийн талаар үзэгчид олон мэдэхгүй зүйлээ мэдэж авсан нь энэ.
Улсын филармони хэмээх босго өндөртэй мэргэжлийн байгууллагат урилгаар орсон залуу бүсгүй энэ үдэш бүтэн амьдаар дуулсан. Түүний ард “Баянмонгол” чуулга тоглож байв. Их хувь заяа. Дуучин бүрт ийм зангараг байхгүй.
Аз, ад, авьяас гэдэг зүйл нэг хүнд хамт өгөгдөж болох уу? Үнэхээр хичээл зүтгэлтэй, хөдөлмөрч зорилгодоо тууштай хүнд өгөгдөж болдог юм байна. Т.Аминаг багад нь урлагийнхан “Хүүхдийн гавьяат” гэж тодотгодог байсан гэдэг. Хэрвээ хүүхдэд ямар нэг шагнал өгөгдөх ёстой бол тэр гавьяат авах хэмжээний хөдөлмөрлөж л дээ. Харин одоо бол “том хүний“ СТА.
Т.Амина энэ үдэш урлаг хэмээх титмийг дааж буйгаа харууллаа. Алга ташуулах гэж яарахаасаа өмнө хүлээн зөвшөөрөгдөх хэрэгтэй. Тэр энэ хорин жилд тэгтлээ алга ташилтанд яарч оддын өвчин тусаж байгаагүй. Их л чимээгүй, тэгсэн мөртлөө урдахаа хийдэг хүн юм уу даа гэсэн мэдрэмж төрүүлдэг. Ядаж л хэвлэлд түүний тухай хэр их бичигддэг билээ? Сайн муу сенсааци дагадаг билүү? Романсын түүх юу билээ? Аль нь ч байсангүй ээ. Харин уран бүтээл бол байлаа.
Цэл залуухан бүсгүй алтан микрофонтой тайзнаа гарна. Монголд ганц микрофоноо барьж тэр дуулна. Их хувь заяа. Амьд явбал дуучин хүн алтан микрофонтой дуулдаг л юм байна. Юугаар дуулах нь тийм ч сонин биш, гэхдээ түүнд их урам өгсөн байх. Залуухан хатан хаан минь алтан микрофон та хоёр энэ монголдоо, дэлхийд урлагийн урт холын замыг туулах он цаг эхэллээ.
Хундагаа өргө ноёд оо
Хундагаа өргө хатад аа
Хуримын гоёл цасан охин шиг ...
Нүд ирмэх зуур хамтдаа хөөрч догдолж асаж дурлаж баярлаж хөөрсөөр байтал тоглолт дууслаа.
Цас хаялсан өвлийн нэгэн үдэш байлаа. Яг л зүүд шиг, мөрөөдөл шиг, үлгэр шиг, Т.Амина хэмээх гүнжийн даашинзнуудын гоёыг, хэрэв энэ үлгэр юм бол тэр гүнж байх нь. Тэр урлагийн ертөнцөд хатан хаан нь байхаар заяагдсан эгэл биш нэгэн байх нь. Урлагийн бурхан Янжинлхам ивээг, бүсгүй минь дуул, чи дуулахгүй юм бол өөр хэн дуулах юм бэ ...
Бэлтгэсэн У.Цахирмаа
Фотог: Д.Цэгц
Эх сурвалж;www.grandnews.mn
Сэтгэгдэл (70)