Олон Улсын эрэн сурвалжлах сэтгүүлчдийн дэлгэсэн Панамын материалд Монгол Улсын 49 хүний нэр илэрсэн. Тэдгээр 49 хүний дунд УИХ-ын гишүүн асан Д.Батбаярын нэр орсон байсан гэх. Харин энэ талаар тэрээр “Оффшор данс гэж ямар дансыг хэлээд байгааг сайн ойлгохгүй байна. Би бол гадаадын оронд данстай хүнийг хэлээд байгаа юм байх гэж бодож байна. Надад оффшор данс байгаа, 3-4 данс бий. Гэхдээ данснууд маань хаагдсан байх. Би мартчихаж” хэмээн ярьж байсан. Улмаар Даваагийн Батбаяр гэх өөр хүнтэй намайг андуураад байна, би энэ асуудлыг АТГ-аар шалгуулна гэж нэг хэсэгтээ л энд тэнд цуурч явсан.
Тэгвэл эл асуудлаар дахин ажил болж өнөөдөр сэтгүүлчдэд мэдээлэл хийлээ. Тэрбээр дахиад л намайг андуурсан, би оффшор дансгүй гэв. Ингэж нэг юм аа олон давтахын учир юу байв гэж тэнд цугласан сэтгүүлчид ихэд гайхаж байсныг нуух юун.
Тэгвэл түүний өнөөдрийн хэвлэлийн хурлын цаад шалтгаан нь хөрөнгө оруулагчдаа эгүүлэн татах бололтой. Учир нь түүнийг оффшор данстай холбогдсонд Японы хөрөнгө оруулагчид нь дургүйцэж хөрөнгө оруулалтаа татаж эхэлсэн гэнэ. Энэ нь түүний бизнесийн үйл ажиллагаанд сөргөөр нөлөөлөөд буй учир Монголын хэвлэл мэдээллүүдээр дахин мэдээлэл цацаж оффшор дансгүйгээ сануулж байгаа аж. Өөрөөр хэлбэл, хэвлэл мэдээллийг ашиглаж хөрөнгө оруулалтаа татах хэрэгтэй байна гэдгийг тэрбээр ил, далд хэлбрээр цухалзуулав.
Мөн эр хүний нүнжиг гаргаж оффшор дансны асуудалд нэр холбогдсон учир энэ удаагийн УИХ-ын сонгуульд өрсөлдөхгүй гэж сайн дураараа нэрээ татсан гэж байх юм. Тэгэхээр мань хүн оффшор данстайгаа хүлээн зөвшөөрсөн ч юм шиг. Тэгсэн хэрнээ энэ удаад тэрний нэр илчлэгдээгүй, андуурагдсан ч юм шиг. Ойлгомжгүй байдлыг эл хэвлэлийн хурлаараа бий болгов.
Д.Дуулим
Сэтгэгдэл (3)