Бүрх малгай духдуулсан, бороонд норж дагжсан, нимгэн цув хөнгөдсөн намар цаг ... Урт амралт дуусаж хот хөдөлгөөнд орсон өдрүүдэд Гранд та бүхэнд шинэ дугаараа өргөн барьж байна. Эрхэм уншигчид минь, эрхэм Үнсгэлжингүүд минь намарт Грандад тавтай морил.
Баар шөнийн 00 цагт хаахыг хотын дарга санал болгож бужигнаж байгаа тул бид ч бас Үнсгэлжин дүрдээ орж байх шиг байна. Энэ дугаарын зочин цэл залуухан Сангийн дэд сайд бүсгүй. Албан тушаалын авцаа өгцөө шинэ томилгоотой ширүүхэн намар юмаа. Булгантуяа чухам хэн бэ? Үнэхээр шахааны хүн үү эсвэл гэнэт тодорсон шинэ од уу? Тайлал энд бий.
Дугаарын халуухан сенсаацийн эхэнд Зууны манлай Поп Дива хатагтай Б.Сарантуяа бичигдэв. Тэрбээр шинэ хайр дурлалтайгаа учирчээ. Дурлалын эзэн нь нэг үе иргэдийн хөдөлгөөн өрнүүлж гудамжинд тэмцэж явсан О.Магнай. Тэдний романсын тухай бид анхлан мэдээлж байна.
Гэрлэлт гэдэг хамгийн сайхан зүйл. Тэгвэл намар тэр чигээрээ гэрлэлт, хурим найрын улирал. Энэ улирлын содон гэрлэлтүүд энэ дугаарт багтсан юм. “Монгол шуудан”-гийн Д.Зоригтын том охин гадаад нөхөртэй байсан талаар мэдээлэл хөвөрч байсан. Тэгвэл энэ удаад охин нижгэр хуримлалаа. Гэхдээ өөр хүнтэй, “Моннис”-ын Д.Сайнбаяр гэх урд нь эхнэртэй байсан залуутай. Энэ цаг үеийн хамгийн сонин содон гэрлэлт байлаа.
Залуу хосууд ч мөн олноор гал голомтоо бадраасан. Ах эгч нар европ стилийн гэрлэлтийг илүүд үзэж барууны одуудын жишгийг эх орондоо харуулахаар өрсөлдөж буй бол дүү нар эртний улажлалт хэв маягаа брэнд болгож буй нь сайшаалтай. Хуримын үеэр бүр бэсрэг наадам болсон гэвэл та итгэх үү? Сонирхолтой хуримуудыг та энэ дугаараас уншаарай.
Олон сонирхолтой мэдээ мэдээллээр дүүрэн Гранд ийнхүү та бүхэнд шинэ дугаараа өргөн барилаа. Таалан болгооно уу.
Сэтгэгдэл (12)