П.Мөнхтулгыг “Хөх чоно” группийн өв залгамжлагч гэдгийг анхандаа мэдээгүй!
Тийм ээ, топ модель хэмээх өргөмжлөлтэй 15-ын нэг нь С.Ариунбилэг. Нэг бодлын түүний хэлдгээр 15-ын нэг байна гэдэг бахархууштай хэрэг байх. Сүүлийн үеийн дуулианы эзэн, “Хөх чоно” группийн өв залгамжлагчын сэтгэлийг эзэмдэгч, өрх толгойлсон эмэгтэй, адармаат замыг туулж яваа цэл залуухан бүсгүй бидний өмнө суулаа. “Харин ч бүр хамаг үнэнээ ярьчихмаар санагдчихлаа ...” гэсээр тэр яриагаа эхэлсэн.
Ердөө хориодхон насандаа айлын бэр болох хариуцлага түүнд жирэмсэн болсноор ирж. Их сургуулийн захирал өвөөтэй, ээж аав нь боловсролын салбарт насаараа зүтгэсэн тул тэр дутуу гуцууг үзэлгүй өсчээ. Харин өвөрмөц содон төрх, нүдний өнгө төрх байдал нь цаатан угсааны гялбаа. Бүсгүй амьдралынхаа үнэн түүхийг бидэнд хүүрнэсэн юм. Яг үнэндээ тэр топ болохдоо тун удахгүй салах гэж буйгаа мэдэж байж. Харин одоо үнэхээр зөв сонголтоо хийж чадсан болов уу? Топ бүсгүй, Монголын гоо сайхны олимпийн тэргүүн ч гэсэн эр хүн таних тал дээр, эр хүнд хайрлагдах тал дээр дутуу гуцуу явсан гэхээр хачирхам санагдав. Нэг бодлын тэр “гэнэн хонгор” аж. Бас энгийн хайнга байдлаар биеэ авч явж өөрийнхөөрөө л орших нь нэг ёсны өгөгдөл байх. Хүн ер нь байгаараа байх сайхан л даа, гэхдээ топ хүн тийм байж болох уу? Түүний гаргалгаа энэ мэт олон асуудал дээр таныг гайхашруулах болно. Ингээд та бүхний өмнө ээлжит шуугианы эзнээ бид авчирлаа.
БИ АМЬДРАЛАА ӨӨРӨӨ БОСГОСОН, ТИЙМЭЭС НӨХӨР МААНЬ ХУВЦАСАА АВААД Л ГАРСАН
-Өөрийн чинь хувийн амьдралдаа гаргасан шийдвэр сүүлийн үеийн халуун шуугиануудын нэг болж байна. Ингэхэд Ариунбилэг хэдтэйдээ айлын бэр болж байсан бэ?
-Хорьтойдоо. Тэгээд 21-тэй жирэмсэн болж, 22-тойдоо ээж болсон. Тэгсэн хэрнээ амьдрах гэж би үнэхээр зүтгэсэн.
-Өөрийг чинь топ болсны дараа албан ёсны гэр бүлтэй анхны топ гэж хэвлэлүүд ихэд онцолж байсан санагдана. Нөхрөөсөө хэзээ салчихав аа?
-Урд нь би хувийн амьдралынхаа талаар ярьж байсангүй. Амьдрал мэдэхгүй өсвөр насандаа хүүхэдтэй болоод амьдрал зохиочихсон. Нэгэнт хүүхэдтэй болчихсон юм чинь амьдарна, болно, бүтнэ гэж бодоод зориглосон. Таван жил хамт амьдрахдаа амьдралаа босгох гэж би үнэхээр зүтгэсэн. Ойр дотныхон маань бүгд мэднэ. Гэвч эцэст нь бид хоёр үнэхээр тохирох хосууд биш юм байна гэдгийг ойлгосон. Тэгээд ярилцаж, тохиролцсоны үндсэн дээр салсан. Муудалцаад, бие биенээ үзэн ядаад хоёр тийш болсон юм байхгүй. Одоо найзууд шиг энгийн сайхан харилцаатай байдаг. Топ модель болсны дараахан салсан учраас намайг топ болчихоод нөхрөөсөө саллаа гэх ойлголт яваад байх шиг.Тийм биш л дээ. Бидний харилцаа хэдийнэ хөрчихсөн байсан юм. Гэвч энэ талаар сонин хэвлэлд ярихыг хүсдэггүй байсан. Дөнгөж топ болсныхоо дараа,манай нөхөр намайг ингэж гомдоодог, бид тийм ч эв түнжингүй амьдардаг гэж яриад байж болохгүй л дээ. Тэгээд ч би салсан нөхрийгөө хэзээ ч муулахгүй. Салаад нэлээд хугацааны дараа одоогийн найз залуутайгаа үерхэж эхэлсэн.
-Салах шийдвэрийг та хоёрын хэн нь түрүүлж гаргасан бэ?
-Салах шийдвэр минийх байсан. Олон ч удаа салья гэж хэлж байсан. Сүүлд, сүүлийн удаа чамд боломж олголоо шүү гэдгээ ч хэлсэн. Харамсалтай нь тэр боломжийг тэр дахиад л харж чадаагүй.
-Уучлаарай, өөрийг чинь салахаасаа өмнө одоогийн найз залуутайгаа болздог, холбоотой байсан гэсэн яриа явдаг. Өөрийнхөө амаар тодорхой хариулт өгөөч?
-Таны ингэж асуудаг нь зөв л дөө. Гадуур одоогийн найз залуугаа харангуутаа нөхөр, охиноо хаяад мөнгөтэй залууг сонирхоод явчихсан юм шиг өрөөсгөл ойлголт байдаг юм билээ. Тийм биш л дээ. Би албан ёсоор, хуулийн дагуу салж, салснаасаа тав, зургаан сарын дараа танилцаж, үерхсэн. Найз залуу маань намайг охинтой маань хүлээж авч хайрласан. Охиноо хэзээ ч дэргэдээсээ холдуулж байгаагүй. Охиныхоо төлөө л гэж амьдарч, ажиллаж ирсэн.
-Та хэдийнэ найз залуу, сүйт хархүүтэй болчихлоо. Харин экс нөхөр чинь дараагийн сонголтоо хийсэн болов уу?
-Үгүй байхаа.
-Үр хүүхэдтэй, хамтдаа босгосон амьдралаа нураах тийм амар хялбар явдал биш. Чухам яагаад охиныхоо ааваас салахад хүрсэн бэ?
-Багш маань босгосон амьдралаа хаяад гарах шиг хэцүү зүйл байдаггүй гэдэг байж билээ. Гэтэл бидний амьдрал хамтдаа босгосон амьдрал байгаагүй. Би босгосон амьдрал байсан юм. Тиймдээ ч нөхөр маань салахдаа хувцасаа л аваад гарсан. Охин, бид хоёр үлдсэн /инээв/. Гэхдээ энэ инээдтэй ч зүйл биш л дээ. Гэвч үнэн нь энэ юм.
-Өөрөөр хэлбэл экс нөхөр чинь амьдралынхаа төлөө юу ч хийдэггүй байсан гэх гээд байна уу?
-Бараг л. Тэр ажил хийдэг ч цалингаа авчирдаггүй байсан гэхэд хаашаа юм /инээв/. Юу ч гэх юм бэ дээ, орлогогүй, цалингийн хэмжээ асар бага л байхгүй юу. Энэ тухай ярихад үнэхээр хүнд байна. Охиныхоо аав, нэгэн цагт нөхөр байсан хүнийхээ мууг үзэх гээд ч байгаа юм шиг. Гэхдээ...аймаар зэвүүн үгнүүд аман дээр гарч ирээд болдоггүй ээ. Би биеэ даасан, бүх асуудлаа өөрөө шийдэж, зохицуулдаг байсан. Тэр хүний зүгээс туслалцаа байгаагүй. Хүүхдийнхээ цэцэрлэгийн төлбөрийг төлөхөөс авахуулаад хүргэж өгөх, авах, хувцаслах, хооллох, бүдгийг нь би хийдэг байсан. Хажуугаар нь сурна, загвараа өмсөнө, ар гэр, амьдралаа авч явна. Эмэгтэй хүнд гэхээсээ илүү нэг хүнд ахадсан ачаа шиг санагдахгүй байна уу.
-Тэгэлгүй дээ, эр, эм хүний хөдөлмөрийн хуваарь, үүрэх хариуцлага гэж бий. Ялангуяа эр хүн, өрхийн тэргүүн өрхийн санхүүг авч явах үүрэгтэй. Чухам яагаад тийм тэмүүлэлгүй, сэтгэлгүй байсан юм бол?
-Харин тэрийг би өөрөөс нь асуумаар байна. Яагаад тийм тэмүүлэлгүй байсан юм бэ? Магадгүй тэр хүн надаас салсандаа, босгосон амьдралаа хаяад гарсандаа харамсаж л байгаа байх. Гэхдээ яагаад энэ хэмжээнд хүртэл явсан юм бэ. Энэ хэмжээнд хүргэхгүй байх боломж өөрт нь байсан ш дээ гэдгийг л хэлмээр байна, яг үнэнийг хэлэхэд. Бүр ёстой шал дургүй хүрчихлээ.
-Өнөөдөр л байдал ийм дээрээ тулчихсан болохоос хайртай болоод л ханилж суусан байлгүй дээ?
-Үнэхээр хайртай байсан. Амьдралын төлөө ганцаараа зүтгэсээр байгаад сүүлдээ бүр ... Энийг бүр яримааргүй байна аа. Бод доо, Мартын 8 чинь Олон улсын эмэгтэйчүүдийн эрхийг хамгаалах өдөр биз дээ. Нөхрөөсөө нэг ширхэг сарнай авч үзээгүй гэвэл яах уу. Би амьдралаа авч яваад зогсохгүй бүр нөхрөө хувцасладаг байсан гэвэл итгэхэд бэрх байна уу. Амьдрал маань хичнээн ийм байсан ч топ болсныхоо дараа үүнийгээ яриад явалтай нь биш. Хүмүүс нөхцөл байдлыг ойлгодоггүй хэрнээ намайг охин үрээ хаясан хүүхэн болгоод гадуур ярьцгаах юм. Бусад шиг брэндийн цүнх бариад, үнэтэй машин унаад явах боломж байсан ч бүхнийг би гэр бүлдээ, ээжийнхээ эрүүл мэндэд зориулдаг. Залуу насаараа гоёод явж байгаа нь миний хувьд болоо гэж би боддог.
-Мартаар ганц сарнай ч авч байгаагүй гэдэг чинь эдийн засгийн боломжтой холбоотой асуудал ч биш л дээ...
-Би тэр хүнээс сэтгэл л нэхдэг байсан. Байнга. Зүгээр л, чи ядарчихлаа шүү дээ гээд хүрч ирээд тэврээд үнсэх, толгой өвдөж байна гэхэд аяга цай хийгээд өгөх халамж. Энэ мөнгөтэй холбоотой юу? Тэгэхэд одоогийн найз залуу маань зүгээр байхад толгой барьж өгөөд, гар нь хуурайшчихсан байна гээд тос түрхэж өгнө.
-Эрт амьдрал зохиосон хосуудын ихэнх нь өдөр тутмын ахуй байдал, он цагийн эрхэнд бие биеэсээ уйдаж, залхаад, шинэ содон юмгүй болчихдог гэж сэтгэлзүйчид ярьдаг. Магадгүй та хоёрын амьдралд тийм процесс болсон байх?
-Үнэхээр намайг хайрладаг байсан бол би амьдралын ямар ч нөхцөлд хайраас нь холдохгүй байж чадах байсан. Чин үнэн гэвэл энэ. Эргээд бодоход манай монголчууд хэт эрт, хүүхдээрээ шахуу байхдаа хүнтэй сууж, хүүхэд гаргах нь элбэг. Хангалттай төлөвшиж, эхлээд өөрөө боловсорч, оюунаа сайн цэнэглэчихээд дараа нь амьдрал зохиох нь хамгийн зөв сонголт гэж санагддаг болсон. Хүмүүс хүнтэй гэрлэх тохиромжтой нас 30 гэж ярьцгаах юм билээ, миний бодлоор 27, 28-тай гэрлэхэд яг боломжийн нас гэж бодож байна.
-Уучлаарай, охины чинь аав өөрийн чинь анхны эр хүн үү?
-Анхны эр хүн биш. Арван хэдтэй байхдаа нэг залуутай үерхдэг байсан. Тэр маань гадагшаа яваад салсан. Бие холдвол сэтгэл холддог гэж үнэн юм билээ. Одоо эхнэр хүүхэдтэй залуу бий. Саяхан хуриманд нь хүртэл очиж, сайн найзуудын харилцаатай үлдсэн. Би ер нь ямар ч хүнтэй хэрэлдэж, муудалцаж салдаггүй. Сониноос, тухайн үедээ миний хойноос гүйдэг нэг залуу байсан юм. Мэдэх нэг нь шууд ойлгоно. Түүнийг миний хойноос гүйдэг байхад би тоож үерхээгүй. Гэтэл бараг 10 жилийн өмнөх явдлыг ургуулж яриад, одоо болтол намайг муулж явдгийг саяхан олж мэдсэн. Эр хүний шинжгүй зан гэж энэ л байх. Би тэрэнд огт муу юм хийгээгүй байхад яагаад... Магадгүй тоогоогүй өнгөрсний төлөө ингэж насан туршдаа эр хүний шинжгүй өширхөж явдаг юм болов уу. Угаасаа түүнийг яаж тоох юм, үсээ угаадаггүй юм шиг тосон толгойтой, хип хоп дуулдаг л банди байсан.
ЭЭЖ ААВ НЬ ХҮҮХЭД ИЛҮҮДЭХ БИШ ГЭСЭН
-Хоёулаа баахан өнгөрсөн, элэрсэн баларсан юм ярилаа. Одоо романс, гэгээн зүйл яръя. Чиний дараагийн сонголтын эзэн нь “Хөх чоно” группийн өв залгамжлагч. Яаж танилцсан бэ?
-Тэр их сонин учрал аа /инээв/. Анх миний инстаграмын зургуудад лайк дардаг байсан юм билээ. Нэг орой найзуудтайгаа юм яриад сууж байтал, би инстаграм дээр чинь лайк дардаг залуу ш дээ гээд. Миний найз охин түүний найзтай үерхдэг байсан юм билээ. Тэрнээс хойш нэг нэгнийхээ зурган дээр лайк дардаг, дараа нь мессэж бичилцдэг болсон. Эхэн үедээ би нэлээн зай барьж байсан. Бүр намайг гэрт хүргэж өгөөд, машинаас буух гэж байхад үнсэх гэдэг байхгүй юу. Тэгэнгүүт нь би өөдөөс нь яах гээд байгаа юм бэ гээд өрөлт ч авч байх шиг. Бишүүрхэлт/инээв/. Бидний үерхэл тийм л гэгээхэн эхэлсэн. “Хөх чоно” группийн өв залгамжлагч гэдгийн тухайд яг үнэндээ гадуур тийм мэдээлэл тархсан хойно хэвлэлээс олж мэдсэн. Ээж аавтайгаа танилцуулсаных нь дараа ар гэр нь ямар хүмүүс вэ гэдгийг мэдсэн. Бидний хайр сэтгэлийн цагаахан харилцаанаас эхэлсэн.
-Аав ээж, ар гэрийнхэнтэй нь танилцана гэдэг албан ёсоор хүлээн зөвшөөрөгдөх анхны алхам гэж болно. Өөрөө өмнөх амьдралаас нэг охинтой. Монголчууд энэ тохиолдолд тийм ч таатай ханддаггүй. Аав, ээж нь хэрхэн хүлээж авсан бэ?
-/инээгээд/ Өнгөрсөн намар танилцсан. Танилцаад удаж байгаа гэсэн үг. Би ч өөрийнхөө ээж аав шиг тэр хүмүүсийг хүндэлж, хайрладаг. Анх танилцахад их сайхан хүлээж авч байсан. Хүүхэд ямар хүнд илүүдэх биш гэдэг шиг тийм л байр сууринаас хандсан болов уу. Ер нь амьдрал ойлгодог, ухаантай, буурь суурьтай хүмүүс шиг санагдсан. Намайг ойлгож, сайхан хүлээж авсан учраас би буцаагаад итгэл хайр үзүүлсэн гэх юм уу.
Найз залуу маань миний хайрыг татаж чадсан залуу. Өмнөх амьдралтай над шиг хүнд дараагийн сонголтоо хийхдээ нарийн, няхуур хандах нь зайлшгүй. Найз залуугийнхаа доторх хүнд, намайг хайрлаж байгаа хайранд нь татагдсан. Танилцсан тухайгаа ч хэрэндээ нууцалж байсан. Хэл аманд орооцолдохоос зайлсхийж фэйсбүүкийн зурагнуудаа устгаж, хэсэг хугацаанд чимээгүй байсан. Тэгтэл бидний салчихлаа гээд эхэлсэн. Бүр нөгөө залуу нь гар хүрдэг юм байна гэж хүртэл мэдээлэл гарсан. Үнэндээ тийм зүйл байгаагүйгээр барахгүй, тэр хугацаанд бид үргэлж хамтдаа байсан.
-Гар хүрдэг гэдэг нь тэр нэг эвгүй зурагнаас үүдэлтэй байх шүү. Өөрт чинь тулаад зогсчихсон, айхтар ширүүн харцтай зураг...
-/инээв/ Хараа муутай, нүдний шил зүүдэг болохоор нүд нь ширүүн байж магадгүй л дээ. Тэр чинь миний энгэрийн товчийг товчилж өгөөд гадуур хувцас өмсүүлэх гэж байсан агшны зураг. “Гоёл” ын тайзны ард болсон явдал л даа. Аягүй сүрхий бие биенээ халамжлаад, хувцас хунараа өмсөлцөж байсан агшин зурганд буухдаа тийм сөрөг утга илэрхийлэх ч гэж, тийм ээ, Надад гар хүрэх нь бүү хэл түүн шиг эр хүнийг би мэдэхгүй. Түүний халамж, хайр л намайг уярааж, энэ сонголтыг хийхэд хүргэсэн юм шүү дээ. Яагаад халамж, хайр гээд онцолж яриад байгааг та ч гэсэн ойлгож байгаа байх. Миний өмнөх амьдрал ямар байлаа даа. Үнэндээ салсан ч гэсэн нөхрөө муулмааргүй байна л даа. Тэр чинь миний л сонголт шүү дээ.
НАМАЙГ БАЯН АЙЛЫН ХҮҮТЭЙ СУУЧИХААД МӨНГӨН ДЭЭР ТУЙЛААД БАЙНА ГЭЖ ОЙЛГООД БАЙХ ШИГ, БИ УГААСАА БОЛОМЖТОЙ АЙЛЫН ХҮҮХЭД
-Хатуу боловч гашуун үнэнийг хэлэхэд загварынхан өөрсдөө хөдөлмөрлөж амьдралыг босгох гэхээсээ илүү бусдын хөдөлмөрийг завших байдлыг илүүд үзэж ирсэн улс гэх ойлголт нийгэмд нэгэнт бий болчихож. Тэр л өнцгөөр өөрийг чинь мөнгө, хөрөнгөнөөс болж баян өв залгамжлагч залуутай суулаа гэж хардах нь нэг талаас буруутгах аргагүй юм л даа.
-Нэг үхрийн эвэр доргивол мянган үхрийн эвэр доргино гэгчээр тэр өнцгөөр хардаг нь үнэн. Загвар өмсөгчид дунд үнэхээрийн хялбар аргаар мөнгө олж ч юмуу баян хүний хэтэвчинд амьдрах нь илүү амархан гэсэн бодолтой охид, ингэж ойлгогдохоор үйлдэл хийсэн хүмүүс мэр сэр байдаг. Цөөн хэдэн хүн бүх загвар өмсөгчдийн нэрийг доош нь татаж байгаа. Ер нь тэгтэл зөвхөн загвар өмсөгчид төдийгүй Монголын охидууд бүгдээрээ, нийтээрээ тийм биш байчихвал яадаг юм бэ, тийм биз дээ? Загвар өмсөгчид гэхээсээ илүү олны нүднээс далд охид илүү айхтар байна ш дээ. Тэд болих хэрэгтэй гэж бодож байна. Үүнээс болоод олон хүн нөхөрт гарч чадахгүй байгаа юм биш үү.
Хүмүүс намайг баян айлын хүүтэй суучихаад мөнгөн дээр нь туйлаад байна гэж буруу ойлгоод байх шиг. Бид хоёрын харьцаа цэвэр хайр сэтгэлийнх. Өөрөөр хэлбэл би мөнгө харж энэ сонголтыг хийгээгүй, мөнгөн дээр туйлсан ч юм байхгүй. Адилхан, хоёулаа хоёр талд ажиллаж, хөдөлмөрөөрөө мөнгө олж байна. Тэгээд ч анхнаасаа “Хөх чоно” группийн эзний хүү гэдгийг би мэдээ ч үгүй. Үерхээд хэдэн сарын дараа энэ тухай мэдсэн. Мэдээж хэрэг үүнд сэтгэл дундуур биш байгаа. Тэглээ гээд учиргүй сэтгэл хангалуун байгаа гэхэд ч хаашаа юм /инээв/.Эмэгтэй хүний үүднээс бод доо, мөнгө бол мөнгө, гэхдээ хүний мөнгө хүний л мөнгө байхгүй юу.
-Та хоёр одоо хамт амьдарч байна уу? Найз залуугийн хэмжээнд бий юу эсвэл сүйт хархүү гэх үү?
-Бид хоёр нэг дор охинтойгоо гурвуулаа амьдарч байна.
БИД ЯГ ОДОО ҮЕРХЛИЙН БАРЬЦААНД БАЙНА
-Од юм бол од шиг бай гэж үг байдаг. Монголд энэ дүрэм үйлчилдэггүй. Өөрөө ч топ модель хүн гэхэд их энгийн байдлаар биеэ авч явдаг бололтой. Энэ магадгүй заримдаа сөргөөр нөлөөлөх үү?
-Үйлчлэх ямар ч боломж байхгүй, угаасаа. Яагаад гэвэл Холливудын оддын орлого хэд байна, Монголын эдийн засаг өөрөө хэр том билээ. Тэндээсээ тийм орлого нэхээд суувал би хэзээ ч ажил хийхгүй гэсэн үг биз дээ. Гэтэл тийм хэмжээний мөнгө төлж ажил хийлгэх тохиолдол манай загварын ертөнцөд байхгүй. Тэгээд ч би өөрийгөө од бөгөөд од шиг байна гэж ерөөсөө боддоггүй. Би угаасаа бусдаас өөр зан араншин, характертай. Тэр нь зүгээр л энгийн байх.Од гэж намайг битгий хүлээж аваасай гэж боддог.
Гэхдээ миний хүмүүжил бусдад буруу үлгэр дуурайлал үзүүлэхүйц биш. Би алдаа гаргасаан. Алдаа гаргадаггүй хүн ч гэж байдаггүй байх. Алдаагаа зассан гэх нь ч хаашаа юм. Яг батлуулаад, хуримаа хийчихээгүй байна. Бид хоёр яг одоо үерхлийн барьцаанд байна. Мэдээж хэрэг хаширсан хүн гэдэг шиг /инээгээд/ эхлээд хүнээ сайн танина. Ямартай ч өнөөдрийг хүртэл найз залуугаас ямар ч өөлөх зүйл олж харсангүй. Гэсэн хэдий ч яаран сонголт хийх бодолгүй байна.
Ер нь би их зөөлөн хүн юм шиг билээ. Анхны амьдрал дээрээ зөөлөндсөөр байгаад тийм байдалд хүргэсэн. Харахад айхтар юм шиг мөртлөө үг дуугардаггүй. Бод доо, идэж уух хүнснээс өгсүүлээд бүх зүйлдээ би гүйдэг байлаа. Бүр машин тэрэгнийхээ дугуйг хүртэл өөрөө солиулдаг байсан. Гэтэл бусад эмэгтэйчүүд машины тос солино гэж мэддэггүй гэж байгаа ш дээ. Магадгүй би эршүүд болохоор тэгж явсаар нөгөө хүнээ даврааж, нэг л өдөр, хожигдсон хойно нүд нээгдсэн юмуу, гэнэт ухаан орсон юм биш үү. Миний амьдралын 5 жилийг үрээгүй бол би одоо байгаагаасаа хоёр дахин их карьертай байх гэх мэтээр яривал би бас ярьж чадна ш дээ. Гэхдээ би хүнд муу юм санаж чаддаггүй. Болох юм болохоороо л болог.
-Хоёр дахь сонголт учраас хаширлах чинь зүйн хэрэг. Шинэ найз залуу П.Мөнхтулгын тухайд ирээдүйн хань болохуйц хэмжээний залуу мөн гэсэн итгэл төрж эхэлсэн байлгүй дээ. Мөрөөдлийн эр хүн гээд эмэгтэйчүүд ярьдаг даа, тэр хэмжээнд хүрч чадсан уу?
-Мөрөөдлийн эр хүн гэдэг ойлголтыг би хувьдаа өсвөр насны охидын хүүхэлдэйн киноноос олж харсан төсөөлөл гэж ойлгодог. Бодит амьдрал дээр ид дурлалын халуун үед цагаан морьтой ханхүү байж болно оо. Хайр гэдэг угаасаа олон янз шүү дээ. Цагийн эрхэнд өөрчлөгддөг. Гэхдээ чин сэтгэлийн хайр байдаг юм байна. Би мэдэрч эхэлсэн. Ямар ч байсан өмнөх амьдралаас минь хамаагүй илүү хайр байгааг би мэдэрдэг.
Хайр гэж юу вэ? Цаад хүнээ өөрөөсөө дээр тавьж хайрлах явдал юм болов уу. Би охиныхоо өмнө бол ёстой нээрээ хөлөө хугалах шахам гүйдэг. Түүнтэй адил тэр хүнийг ч гэсэн өөрөөсөө илүү хайрлаж байгаа учраас жинхэнэ хайр гэж байдаг юм байна гэж бодох болсон. Нэг ийм үг байдаг, дэлгүүрээс хүн гурван талх авдаг, нэг нь өрөнд буюу ээж аавдаа, нэгийг нь өөртөө, гурав дахийг нь зээл буюу үр хүүхэддээ, ирээдүйдээ өгч буй хэрэг гэдэг.
-Тэгвэл яг одоо Ариунбилэгийн амьдрал ямархуу байна? Бүх ачааг ганцаараа үүрдэг байсны тал нь ч болтугай хөнгөрсөн үү?
-Бид хоёр тусдаа байр авч гарсан. Мэдээж хэрэг зуун хувь шийдчихсэн юм бол биш. Би өөрийнхөө, тэр хүн өөрийнхөө ажлыг хийгээд, ёстой хамтын хөдөлмөрөөр амьдралаа болгож байна. Урд нь ч хүнээр туслуулаад байхаар амьдралтай биш байсан. Угаасаа би боломжтой айлын хүүхэд. Өвөө маань Хөдөө аж ахуйн дээд сургуулийг анх үүсгэн байгуулалцсан, мал эмнэлгийн ухааны доктор профессор хүн. Аав, ээж хоёр анагаахын талын хүмүүс. Аав физикийн ухааны доктор, ээж англи, орос хэлний магистр. Тийм ч учраас эмч болох нь миний багын мөрөөдөл байсан. Мэргэжлээ хэзээ ч орхихгүй, мэргэжлийнхээ дагуу хойшид хийхээр бодож төлөвлөсөн нэлээдгүй юм бий.
Амьдралыг эр хүн эдийн засгийн утгаар нь бүрэн дүүрэн авч явах албатай биш гэж би боддог. Харилцан бие биедээ дэм тустай, хамтарч амьдралыг босгох ёстой. Харин эм хүйстэй хүний хувьд машины тос, дугуйтай ноцолдоод байхгүй, даарч хөрсөн үед орой үдэш ирээд авчих хэмжээний халамж хайрыг эр хүний зүгээс хүсэх нь ердийн хэм хэмжээ. Эр нөхөр нь ядраад хэвтэж байхад хөлийг нь бариад өгчих халамж, оройтож ирэхэд халуун хоол цайтай байх нь эмэгтэй хүний зүгээс өгөх хайр халамж. Ийм зүйлс амьдралын аз жаргалыг бүрэлдүүлж байдаг. Харин мөнгө санхүү, эдийн засгийн тухайд хэн хэн нь чадах чадахаараа хичээж, амьдралаа авч явах ёстой. Тэрнээс эрэгтэй хүн бүхнийг олж ирэх ёстой, бүх мөнгийг олох ёстой гээд би гэдсээ илээд хэвтэх нь шударга бус явдал биз дээ. Мэдээж өнөөдрийн амьдрал маань өмнөх үетэй харьцуулахын аргагүй, хоёр хүн нийлээд зүтгэхэд хамаагүй дэм тустай, хөнгөн байгаа. Тэр эр хүн шиг эр хүн байж чадаж байна. Тэгэхээр би ч бас эм хүн шиг эм хүн байгаа юм биш үү /инээв/.
ОХИДУУД АРАЙ ДЭНДҮҮ ЗАДГАЙ БОЛСОН ЮМ ШИГ ЭЭ
-Загвар өмсөгч, тэр дундаа топ модель болоод олонд танигдаад ирэхээр мөнгө хөрөнгөтэй, хижээл настай эрчүүдээс танилцах хийгээд бозоонд зогсох санал их ирдэг гэх. Өөрт чинь тийм санал хэр их ирдэг байсан бэ?
- Намайг тоодоггүй юм болов уу, тийм санал ирж байгаагүй ш дээ /инээв/. За за, наргиа шүү, мэдээж ирэлгүй яахав. Хаанаасаа ч утасны дугаар олчихдог юм мэдэхгүй, хоёр гурван хүн дамжуулаад л ороод ирнэ. Тэр чамтай танилцья гэнэ гэдэг ч юм уу. Би мэдээж татгалзсан хариу өгдөг байсан. Иймэрхүү зүйлээс харьцангуй хол байсан нь гэр бүлтэй байсантай минь холбоотой байх. Нөхрөөсөө салаад нэг их удалгүй найз залуутай болчихсон, тийм зүйлд зарцуулах цаг ч байгаагүй /инээв/.
-Найз залуу чинь боломжтой айлын хүүхэд. Араас нь гүйх охид мэр сэр байгаа л байх. Танд анзаарагдсан юм байна уу?
-Охидууд арай дэндүү задгай болчихсон юм шиг санагдаад байдаг. Ер нь наяад оныхон бид чинь гайгүй үлдчихсэн юм биш үү/инээв/. Гэхдээ би өөртөө итгэлтэй байдаг. Тэр дайралтанд өртөхгүй байх талыг манай залуу өөрөө хариуцах ёстой. Жишээ нь над руу нэг хүүхэн дайралт хийлээ гэхэд би тэр хүүхэнтэй биш найз залуутайгаа л ярина ш дээ, тийм биз дээ. Найз залуу маань зөвшөөрсөн учраас алив явдал үүснэ. Логикийн үүднээс цаад хүүхэнтэй яриад нэмэргүйг би мэднэ. Гэхдээ л би өөртөө итгэлтэй байдаг.Өөртөө итгэлгүй хүн бусдыг өөрөөсөө илүү тавьж хардаг. Надаас нас залуу ч царай зүс, нэр хүнд, боловсрол бүх зүйлсээрээ надтай эн тэнцэхүйц сэтгэлийг нь булаачих хүүхэн байхгүй байх гэж боддог ш дээ. Намайг үнэлдэг байх гэж бодож байна. Тэгээд ч үнэнч байдал үнэ цэнийг дагуулна гэдэг. Хоёулаа одоохондоо бие биедээ жигтэйхэн үнэ цэнэтэй л хоёр нөхөр яваад байгаа.
-Эр хүний хайр материаллаг байдлаар илэрдэг. Ингэхэд чамд ямар гэнэтийн бэлэг барьж байсан бэ?
-Манай хүн их романтик. Зөндөө бэлэг авч байсан. Хамгийн гоё нь шөнө дунд 12 цаг болж байхад утас дуугараад,хайраа цонхоороо хараарай гэлээ. Бөмбөлөгтэй шаарнууд, дотроо аймаар хөөрхөн гэрлүүдтэй, зургаан давхарт цонхоор орж ирээд л. Тэр бол мартах аргагүй сюрприз. Би Валентинаар хариу сюрприз барихдаа зүрхэн хэлбэртэй шоколад, кекс, хоол, хоолны мах, ногоо нь хүртэл зүрхэн хэлбэртэй хийж өгсөн/инээв/. Тэрийг хараад баярласандаа уйлж байсан. Энэ л бидний хайрын жинхэнэ үнэ цэнэ, амьдралын хамгийн том бэлэг юм.
...Урд нь ч хүнээр туслуулаад байхаар амьдралтай биш байсан. Угаасаа би боломжтой айлын хүүхэд. Өвөө маань Хөдөө аж ахуйн дээд сургуулийг анх үүсгэн байгуулалцсан, мал эмнэлгийн ухааны доктор профессор хүн. Аав, ээж хоёр анагаахын талын хүмүүс...
НАДАД ТОП МОДЕЛЬ БОЛОХ ШААРДЛАГА БАЙГААГҮЙ
-Нэгэнт топ модельтой уулзсаных загварын талаар жаал яриа өрнүүлье гэж бодож байна. Өөрөө Монголын 14 дэхь топ. Өөрийн чинь топ болох үеийн хамгийн том өрсөлдөгч хэн байсан бэ?
-За яг чин үнэнээ хэлчихье /инээв/, надад өрсөлдөгч байгаагүй. Яагаад гэхээр би аль хэдийнэ бэлэн болчихсон, топ модель болно гэдэгтээ сэтгэл санаа, бүх зүйлээрээ итгэлтэй байсан юм. Бүр хоёр, гурван жилийн өмнөөс хүлээлтийн байдалд байсан. Урдуур хүн орчихсон гэлтэй ч биш дээ /инээв/.Харин тэр жилд ямар нэгэн өрсөлдөгч байгаагүй. Аль хэдийнээс өөрийгөө топ болох ёстой, топын шаардлагыг хангачихсан гэж үзэж байсан.
-Тэгвэл бас чин үнэнийг хэлэхэд өнөөгийн дэлхий ертөнц дээр, урд хожид ч тод модель гэх өргөмжлөл байдаггүй. Супермодель гэх нэршил Синди Кроуфорд, Наоми Кемпбелл нарын нэгэн үеийн хэдэн моделиудад хамрагддаг. Зөвхөн Монголд л топ модель гэх утгагүй ч гэмээр өргөмжлөл байдаг гэх үү дээ. Эзэд нь ч олон жил загвар өмссөнөөрөө ч юм уу эсвэл Алтны магнатын ивээлд багтснаараа авдаг гэх аман хуультай. Тодруулбал, тун ч нэр хүндгүй нэршил, өргөмжлөл. Ийм өргөмжлөлийг заавал авах шаардлага чамд байсан уу?
-Надад топ модель болох ямар ч шаардлага байгаагүй гээд хэлчихэд бас эвгүй юм. Үнэнийг хэлэхэд байхгүй. Гэвч миний амьдралын бараг тал хувь нь загварын ертөнцтэй холбоотой өнгөрсөн байхад оргилд нь хүрэхийг хүсэх нь ойлгомжтой. Гэтэл энэ ертөнцийн карьерын оргил нь манайдаа л топ модель. Тиймдээ ч багаасаа топ модель болохыг хүссэн. Бодоход, би чинь 14 дэхь топ модель. Монголын хэмжээнд 15-хан хүний нэг байна гэдэг бас л нэр хүнд юм болов уу даа. Бүр нарийн юмыг нь би яаж мэдэх вэ дээ/инээв/.
-Зарим моделиуд Монголын “Гоёл”-ын тайз юу юм бэ, тэрний оронд Миланы тайз надад ойрхон, топ моделийг гуйж авахгүй гэх болж. Ингэж хэлэгсэд ихэвчлэн чадвартай загвар өмсөгчид байх шиг. Үнэхээр “Гоёл”-ын тайз тийм өчүүхэн юм уу гэх асуулт бас гарч ирдэг.
-Яахав, гадаадад загвар өмсөж байгаа нь Монголоо хилийн чанадад сурталчилж байгаа нэг хэлбэр. Сайшаалтай. Гэхдээ Монголын загварын ертөнц үнэхээр гадны тайзанд гологдохооргүй гэж би үздэг. Илүү чадварлаг дизайнерууд гарч ирсэн, чанартай шоунууд зохион байгуулагдаж байна, залуу чадварлаг моделиуд зөндөө гарч ирж байна. Монголынхоо тайзан дээр нэр нөлөөгөө олж авч чадаагүй, чадвараараа гайхагдаж чадаагүй байж зүгээр нэг гадаадын агентлагт очиж хэдэн хувцас өмсөж, рекламанд тоглочихоод, би гадаадтай харьцдаг, би гадаадын од гэж ярьж яваад байгаа зарим нэг охидыг үнэндээ ойлгодоггүй. Манай загварын агентлагуудын гадаад харилцаа сайн. “Шилмэл загварын ордон” ч гэсэн гадныхантай хамтарч шоу зохион байгуулдаг. Мэр сэр ганцаарчилж яваад байгаа моделиуд тийм сүртэй, том Fashion TV-гийн шоунд оролцоод байгаа юм харагддаггүй. Гадаадад очиж зүгээр нэг зураг авахуулчихаад, нэг рекламанд тоглочихоод түүнийгээ гадаадад загвар өмсөөд байна гэж ойлгоод байгаа юм. Яг нарийндаа том холбоо сүлбээ, гадаадын шоутай холбогдож байгаа зүйлийг Монгол талаас “Гоёл” наадам, Дизайнеруудын холбоо, бид өөрсдөө холбогдож хийдэг. Моделиудаа ч байнга гадагшаа туршлага солилцохоор явуулдаг. Сая л гэхэд бидний хэдэн охид гадагшаа хоёр сар яваад суралцаад ирсэн.
-За таны бодол тийм байж. Ингэхэд загварынхныг тайзан дээр гунхсан сайхан хүүхнүүд, хөшигний ард бол атаа жөтөө, өрсөлдөөн, жинхэнэ дайн болдог гэж ярьдаг. Ариунбилэгийн модель, мисс загвар өмсөгчийн он жилүүд ер нь хэр адал явдалтай бол?
-Надад тийм юм мэдрэгдэж байгаагүй. Харин ч найзуудтайгаа найрсаг сайхан харилцаатай байдаг. Тайз руу гарахад бие биедээ тусалж, алдаа дутагдлыг нь залруулсаар ирсэн. Атаа жөтөө гэдэг хүний дотоод бодол, сэтгэлийнх учраас тааж хэлэхэд бэрх л дээ. Магадгүй тийм юм байдаг байх. Тэглээ гээд айхтар мэдэрч байсан нь үгүй. Харин хов живийн чанартай мэдээллийг охидууд дотроосоо гаргачихдаг юм шиг санагддаг.
Загвар өмсөх бол миний дуртай ажил. Жирийн үед өсгийтэй гутал өмсдөггүй хэрнээ тайзан дээр тав, зургаан цаг өндөр өсгийттэй алхана, гүйнэ. Тэгэхэд л хөлнийхөө өвдөлтийг мартчихсан байдаг. Хамгийн их кайф авдаг загварын ертөнцөө муулах дургүй.
-Загварын тайзан дээрх Ариунбилэгийн давуу тал, ялгарах онцлог нь юу вэ?
-Би бусдаас өөр, онцгой эршүүд характертай талдаа. Миний давуу тал гэх юм бол яг тэр зан характер нь тайзан дээр гаргаж байгаа үйлдэлд нөлөөлдөг байх гэж боддог. Дээр нь гадаад төрх маань миний давуу тал болдог. Нийтлэг биш, онцгой, өвөрмөц царайтай юм шиг санагддаг ш дээ. Тэр нь нүдний маань өнгөтэй холбоотой. Багадаа нүднээсээ их ичдэг байж билээ. Ямартай ч дандаа линз зүүдэг байхав дээ. Уг нь европоос ямар ч цус байхгүй байгаа юм ш дээ/инээв/.
-Өөрийгөө хэр хэмжээний загвар өмсөгч гэж боддог вэ?
-Өөрийгөө үнэлж байж би топ авах хэмжээний болчихжээ гэж бодсон байгаа ш дээ. Надад загварын ертөнцөд хийж чадахгүй ажил гэж байхгүй.
- Ярилцсан М.Саян, У.Цахирмаа
Эх сурвалж: "Гранд сэтгүүл" дугаар №63
Сэтгэгдэл (69)