Монголын рок попын “төмөр хатагтай” Б.Ангирмаа өчигдөр 47 насны төрсөн өдрөө "Чингис" зочид буудалд нижгэр тэмдэглэлээ. Төрсөн өдрийн гол зочид Зууны манлай поп хатагтай, Б.Сарантуяа, поп дива С.Наран тэргүүтэй түүний хамгийн дотны найз нөхөд, шавь нар нь. Төрсөн өдрийн эзний дресс код торон материалтай хар бошинзыг нарийхан бүсээр бүсэлж, уруулаа тод өнгөөр будаж, үсээ стильтэй нь аргагүй засуулжээ.
Манай сурвалжлах баг төрсөн өдрийн баяраас бяцхан фото сурвалжлага хийх хүсэлтээ хэлэхэд Б.Ангирмаа “Би яаж мэдэх билээ, манай зочдоос асуу. Ялангуяа манай Сараагаас зөвшөөрөл авах хэрэгтэй” гэж сануулсан. Поп хатагтай болон бусад зочид бидний хүсэлтийг хүлээн авч, харин “Киви”-гийнхэн, ялангуяа Агий эрс татгалзав. Төрсөн өдөрт хоцорч ирсэн хийгээд хайш яйш, хар үгээр бол орноосоо шууд л босоод ирсэн юм шиг “сэгсгэр” үстэй ирж, орж ирмэгцээ цүнхээ газар шидсэн зэрэг нь багшийнхаа төрсөн өдрийн цэнгүүнийг үл хүндэтгэжээ гэж шууд ойлгогдохоор. Гэхдээ үнэхээр ажил ихтэй, цаг зав муутай тохиолдолд байж болох “алдаа” л даа. Магад Агийгийн ийм байдлыг хэвлэл, олон нийтэд ил гаргахгүйн тулд “Киви”-гийнхэн ийн татгалзсан байж болох.
Сэтгүүлч бид угаас л сониуч улс. Зөвхөн сэтгүүлч ч гэлтгүй бүх хүмүүс сониуч байдаг нь хүний нэг үндсэн инстинкт гэдэг. Тэр л сониуч харцанд торсон нэг зүйл гэвэл “Киви”-гийнхэн залуу дуучин С.Хишигжаргалыг нэг л “жийнгүй” байх шиг. С.Хишигжаргалын тухайд Б.Ангирмаагийн хамгийн отгон магад анхны соло шавь бөгөөд сүүлийн үед “Киви” гэхээсээ илүүтэй Хишгээг гэх болсон нь илт анзаарагдаж байгаа. Тэр бүү хэл Агийг С.Хишигжаргалаар солих тухай “шуум” ч дэгдээд авсан бөгөөд энэ мэдээлэлд продюссер Б.Ангирмаа одоог хүртэл хариулт өгөөгүй байгаа билээ.
Б.Ангирмаагийн уран бүтээл, амьдрал
Төрсөн өдрийн эзэн Б.Ангирмаагийн талаарх мэдээлэлдээ эргэн оръё. Өөрийн бодолдоо бат зогсдог, үснийхээ засалтыг ч өөрчилдөггүй түүнийг “янзын эмэгтэй” гэх тодотгол дагадаг. Xүмүүс үр удмаа үлдээж, ганц бие бүсгүйчүүд нөхөрт гарахыг мөрөөддөг бол тэр өнөөг хүртэл single lady, бүр ажиллахын төлөө л амьдардаг гэж эргэлзэх юмгүй тунхаглаж байв. Он цаг өнгөрсөн ч бүсгүйн сэтгэл нялхарсангүй, өөрчлөгдсөнгүй тэр 47 насыг зооглож байна.
Түүх сөхвөл 1980-аад оны сүүл үед зохиогдож байсан "Ая дууны жигүүр" эстрадын дууны уралдаанаар одоогийн рок попын ихэнх “акулууд” анх дебют хийж, олонд танигдсаж байсны нэг нь Б.Ангирмаа. Угсаа гарал, удам судар яривал 20-р зууны нэр цуутай хөгжмийн зохиолчдын нэг Ч.Балчинжавын отгон охин, хөгжмийн зохиолч Б.Долгионы төрсөн дүү. Өөрөөр хэлбэл тэр элит гарал угсаатай гэсэн үг. Удам дамжсан авьяас түүнд өвлөгдөж дуулахаас илүүтэй ая зохиож, илүүтэй амжилт үзүүлж явна. Статистик дурдвал 100 аялгуу зохиож, дөнгөж 10 гаруйхан дуу дуулжээ. Уран бүтээлүүдээсээ “68 он” цомогт орсон “Хатуужилт ижий” дуундаа хамгийн их хайртай. Энэ дуугаа тэрбээр ээждээ зориулж бүтээсэн гэдэг.
Төмөр хатагтай өөрийгөө хийл хөгжмийн уянгат аялгуутай зүйрлэдэг. Найзуудынх нь хэлж буйгаар тэр баярлаж, гомдохдоо харьцангуй хэмжээ хязгаартай хандаж сэтгэл хөдлөлөө дарж чаддаг нэгэн. Аливаад туйлширч хөөрч гүйгээд эсвэл гуниж гутраад нулимс унагадаг нь ч тэр биш. Тиймээс ч Монголын рок попын “төмөр хатагтай” гэх тодотгол чухам түүнд өмчлөгдсөн биз ээ. Түүнд төрсөн өдрийн халуун мэнд хүргэе!
Эх сурвалж www.grandnews.mn
Сурвалжилсан Б.Дэжид
Сэтгэгдэл (27)