Жил бүр уламжлал болон явагддаг номын худалдаа, номын баяр хоёр дахь өдрөө үргэлжилж байна. 13 дахь удаагаа болж байгаа номын баярыг тохиолдуулан Монголын утга зохиолын салбарын зохиолч, яруу найрагч нар бултаараа чуулсаныг фото сурвалжлагаараа дамжуулан уншигчидад нь хүргэж байгаадаа таатай байна.
Жил бүр номын баярт оролцдог яруу найрагч П.Бадарч, Г.Мэнд-ооёо, Г.Аким, Ү.Хүрэлбаатар, Б.Шүүдэрцэцэг тэргүүтэй зохиолч яруу найрагчид маань уншигчидтайгаа номын баяраар уулздаг уламжлалтай. Харин энэ жил Ш.Дулмаа гуай харагдсангүй.
Тун удахгүй Эх үрсийн баяр тохиож байгаатай холбогдон хүүхдийн номнууд үзэсгэлэн худалдаагаар лангууг эзэлсэн байсан бөгөөд номонд дуртай багачууд маань дуртай үлгэрийн номоо сонгож шилэн авч байсан.Өмнөх жилтэй харьцуулахад жилээс жилд уншигчид нэмэгдэж байгааг дуулгасан номын худалдагч нар хүүхэд багачууддаа барих хамгийн гоё бэлэг ном байх болно хэмээн дуу нэгтэйгээр хэлж байсан.
Мөн энэ жил нэг онцлогтой бөгөөд бүх ном 5-50% хямдарч байгааг дуулгахад таатай байна. 500-2500 төгрөгийн хооронд зарагдаж байгаа бүх төрлийн номнуудаас та сонголтоо хийж болно. Бүр эрээд эрээд олдоггүй хуучин номнууд ч хямдралтай үнээр зарагдаж байна лээ. Номын худалдаа эрхэлдэг бүхий л компани,байгууллага, хувь хүмүүс номын үзэсгэлэн худалдаанд оролцож, худалдан авагч нар ч их байсан. Та бүхэн Чингисийн талбайд болж байгаа номын үзэсгэлэн яармаг худалдаагаар нэг ороод гарахад хайж явсан номоо, тун удахгүй эх үрсийн баярын бэлгээ эндээс олж авна гэдэгт итгэлтэй байна.
Номын цагаан буян үргэлж дэлгэрэг!
Эх сурвалж: www.grandnews.mn
Сэтгэгдэл (3)