Скандал: С.Ижилцэцэг, С.Ихэрцэцэг
Загварын тайз жинхэнэ утгаараа ямар ч засваргүй, төрөлхийн гоо бүсгүйчүүдийн өрсөлдөөний талбар байх үед тодорч асан хоёр бүсгүйн түүхийг бид энэ удаад онцоллоо. Эмэгтэй хүн хөгжмийн боловсрол, сонгодог урлагийн өндөр мэдрэмжтэйн дээр багаасаа урлагийн гэр бүлд өсч торнин генийнх нь үргэлжлэл болно гэдэг ховор тавилан. Тиймдээ ч С.Ихэрцэцэг, С.Ижилцэцэг нар адилхан хувцас өмсөж үзүүлдэг бүсгүйчүүдээсээ тархины тойргийн хувьд хол зөрүүтэй байсан биз. Хөгжмийн зохиолч, МУУГЗ Ч.Сангидоржийн дөрвөн хүүхдийн бага охид болох тэдний ертөнцөд та түр саатна уу.
Аяга ч угааж үзээгүй хүүхэд нас
Ч.Сангидоржийн гэр бүлийн 6 гишүүний тав нь төгөлдөр хуурч. Тодруулбал, аав Ч.Сангидоржийн үргэлжлэл болсон нэг хүү, гурван охин, нийлээд тавуулаа мэргэжлийн төгөлдөр хуурч гээд бодохгүй юу. “Миний ээж тэмээчин”, “Зулай цагаан Алтай”-г бидэнд үлдээж одсон тэр эрхэм, авьяаслаг, омог бардам хүн ямархан их эрх зоргоороо, урлагт хайртай нэгэн байгаа вэ.
Тэднээс дэлхийн дайдад үнэлэгдсэн 2 авьяастан төрсөн нь төгөлдөр хуурч С.Саянцэцэг, хөгжмийн зохиолч С.Сансаргэрэлтэх. Харин багачуул болох 2 ихэр нь арай өөр замаар замнасан ч урлагаасаа, хаан хөгжмөөсөө холдоогүйг бас онцлох хэрэгтэй. Ерээд оны загварын тайзыг чимж явсан ихэр 2 цэцгийн талаар энд онцолсу.
Бяцхан ихэр охид багадаа цэвэрхэн сайхан хувцаслахын зэрэгцээ төгөлдөр хуурын өмнө ихэнх цагаа өнгөрөөдөг байж. Ээж Б.Бадамгэрэл нь эмч мэргэжилтэй. Хүүхдүүдээ хичээллэх боломжийг нь ханган гэрийн ажилд ойртуулдаггүй, охидоо л гоёхын төлөө амьдардаг мэт түүний сэтгэл зүтгэл талаар болсонгүй.
Өсөж торнихын хэрээр С.Ихэрцэцэг, С.Ижилцэцэг нар үеийнхнээсээ нуруулаг, өвөрмөц төрхөөрөө ялгарах болж. Сургууль дээр нь үсний шоу болоход тэд сонгогдсоноос хойш загвар өмсөх эхлэл нь тавигджээ. Өсвөр насны охидод энэ нь мэдээж алдаж болохгүй алтан боломж. Гэвч загвар өмсөх гэдэг өсвөр, залуу насны л ажил.
Төгс гоо үзэсгэлэнт ихрүүд
Нүүрээ ч будаж үзээгүй даруухан хөгжимчин охид загварын ертөнцөд хөл тавьсных зөрсөн хүн эргэж хармаар сайхан бүсгүйчүүд болжээ. “Гоёл” наадам загвар өмсөгчдийн эрэмбийг утгаар нь тогтоодог байсан тэртээ 1991 он тэдний оргил үе байлаа. Тэд хамтдаа шилдэг загвар өмсөгчийн шагналыг нэг тайзнаас зэрэг хүртсэн юм. Залуусыг хуйлруулах цалгисан гоо үзэсгэлэн, гоолиг бие, урлагийн өндөр мэдрэмжтэй язгуурын өгөгдөл, ядахад мэргэжил нь хүртэл төгөлдөр хуурч ...
Тэд тухайн цаг үеийн бүсгүйчүүдийн сайхан бүхний хэмжүүр, дээд мэдрэмж төрүүлэгчид болж байлаа. Яг л энэ үед тэднийг шаналант хайр дурлал хүлээж буйг, амьдралыг нь хэрхэн эргүүлэхийг тэд өөрсдөө ч төсөөлөөгүй биз. Жинхэнэ эмэгтэй хүн гоо төрх, өндөр боловсрол, төгс бие галбираар бий болчихдоггүй. Утгаараа төгс эмэгтэй хүн болоход ирээдүйн ханиа сонгох явдал тун чухал. Тэд сонголтоо хийсэн.
С.Ижилцэцэгийн нөхөр ялаа эдлэн гарч иржээ
С.Ижилцэцэг Барсаа хэмээх царайлаг нуруулаг, дөчин мянгатдаа л цуутай залууг амьдралын ханиараа сонгов. Барсаа урлагийн гэр бүлээс гаралтай, ээж нь “Хань” кинонд тоглосон тухайн үеийн сайхан бүсгүйчүүдийн нэг дуучин Цэцэгээ. Хосууд үрийн зулай үнэрлэн охинтой болж аз жаргалтай өдөр хоногууд хөвөрч байлаа. С.Ижилцэцэгийн ах С.Сансаргэрэлтэхийн хурим болох тэр өдөр хүртэл шүү дээ.
Тэр өдөр энэ гэр бүлийн хувьд хамгийн сайхан өдөр байлаа. Хурим сайхан болж хурсан зочид ч налайж суусан цаг. С.Сансаргэрэлтэх найз Чингис хэмээх залуугаа мартаад ч юм уу хуримандаа уриагүй аж. Цаг давчуу, яарч сандран хэнд ч гэсэн зарим нэг зүйлээ мартах тохиолдол гардаг. Гэтэл найз нь ихэд гоморхон хуриман дээр согтуу иржээ. С.Ижилцэцэгийн нөхөр Барсаа хадам ахыгаа өмөөрөн Чингистэй маргалдан хутга шөвгөндөө тулж, төгсгөлд нь нэгэн сайхан эр амиа алдаж, нэг нь аавын хаалга татсан гэдэг.
Хүний ганц хүүгийн аминд хүрсэн тэрбээр олон жилийн ял авсан нь мэдээж. Хүн амины хэрэгтний эхнэр, олон жилийн ял авсан нөхцөлд автоматаар гэр бүлийн баталгаа нь салдаг.
С.Ижилцэцэг ганц бие бүсгүй болж энэ үеийг даван туулах гэж багагүй чармайлт гаргав. Холын Америкийг зорих болсон нь ч энэ гунигт түүхтэй холбоотой байж болох л доо. Нью-Йорк хотод амьдран төгөлдөр хуурын багшаар ажиллаж байсан тэрбээр сая 15 жилийн дараа эх орондоо ирсэн. Энэ хооронд экс нөхөр Барсаа нь ялаа эдлэн шоронгоос гарсан байна. Дундаасаа үр хүүхэдтэй хүмүүс уулзах эсэх нь цаг хугацааны асуудал биз. Нэг л үнэн, С.Ижилцэцэг өнөөдрийг хүртэл хүнтэй суугаагүй нь нөхөртөө дэндүү их хайртай байсных биз ээ.
Амьдрал гэдэг тааж эс мэдэх зүйлсээр дүүрэн баялаг нэгэн хором. Хэн нь хэнийгээ егүүтгэнэ гэж санахав дээ. Гэтэл үйлийн үр гэж нэг юм бий. Ийм л нэгэн агшин энэ сайхан бүсгүй, энэ сайхан гэр бүлд тохиосныг энд дурссан нь үнэн юм үнэнээрээ үлдэх учиртай гэж үзснийх болохоос хэн нэгний хувийн амьдрал руу өнгийж, олонхийн хэлдгээр муу руу нь өнгийх гэсэнгүй ээ.
С.Ихэрцэцэгийн дуулиант дурлалын эзэн Д.Тамираа
Харин С.Ихэрцэцэгийн хувьд тун дуулиантай гэрлэлт хийсэн. Миссийн тэмцээнд орж Оюу эрдэнийн титэм зүүж байсан сайхан бүсгүйн сэтгэлийг эзэмдсэн хүн нь ардаа амьдралтай нэгэн байв. “Таван богд” группийн тэргүүн хатагтай Д.Хулангийн ах Д.Тамираатай тэр эргэлт буцалтгүй холбоотой болжээ. Гурван хүүхэдтэй эхнэрээ орхин байж С.Ихэрцэцэгт ирсэн гэгддэг Д.Тамираагаас тэр нэг хүү тэвэрсэн.
Бусдын нулимс, харуусал, олны хэл ам дээр боссон тэдний хамтын амьдрал удаан үргэлжилсэнгүй. С.Ихэрцэцэг Испани улсыг зорин тэндээ багшилсаар 15 жилийг үджээ. Хүүгээ өсгөн ганц бие ээж хэвээр байгаа түүний хувьд өмнөх амьдралдаа томоос том цэг тавих амаргүй даваа байсан биз.
Д.Тамираа нь ч мисс бүсгүйгээс салснаас хойш дахин амьдрал зохиогоогүй гэнэ лээ. Салса бүжиглэн өөрийнхөө дураар, эрх чөлөөтэй гоонь эрийн амьдралаар амьдарч буй тэрбээр сайхан гэргийгээ холоос ч болов харсан биз ээ. Дахин амьдрал зохиох талаар хэн хэн нь бодох ч үгүй явааг харахад жинхэнэ хайрыг анагаах эсвэл мартуулах цаг хугацаа хэдэн арван жил байсан ч хангалтгүй байж болох талтай.
Тэднийг эх орондоо эргэн ирэх гэнэ, Монголдоо ажиллана гэх яриа байсгээд л гардаг. Гэвч тэд энэ удаад мөн л буцаад явчихлаа. Сайхан бүсгүйг саарал сүүдэр дагаж явдаг нь нэг бодлын ёс ч юм шиг. Тэд бол элит гаралтай, жинхэнэ сонгодог бэрүүд.
Амьдралын хуудас, хувь тавилан хаашаа эргэхийг хэн ч урдчилан таах аргагүй юм. Нэг л үнэн нь тэд нөхрүүддээ чин сэтгэлээсээ хайртай байсан. Олон олон залуусын зүрхийг эзэмдсэн ч тэд нэр төрөө сэвтээлгүй тэдний харцан дундуур гарч чадсан.
Эмэгтэй хүн нэг хайрлабал эцсээ хүртэл, эс бөгөөс хэзээ ч хайрлахгүй. Тэдний зүрх сэтгэлд хайр оршсоор байна. Өнөөдөр нийлээд маргааш нь салдаг зүрх, тархигүй болсон энэ цагт тэдний үнэн, чин хайрын түүх олон хүнд нэгийг бодогдуулах биз ээ хэмээн үүнийг тэрлэлээ. Магад жинхэнэ хайр гунигт түүх дагуулдаг юм болов уу?
Эх сурвалж: www.grandnews.mn
У.Цахирмаа
Сэтгэгдэл (46)