Хүчингийн хэрэг үйлдсэн Г.Пунцагбалжир агсны хүү П.Энхмөнх оргон зайлсан ажээ...
Өнгөрсөн нэг жилийн хугацаанд хамгийн их дуулиан шуугиан болсон хэргийн хохирогчтой уншигч та бүхнийг уулзуулж байна. Монголын ард түмний танил болсон Г.Пунцагбалжир агсны голомт залгах ганц хүү П.Энхмөнх хүчингийн хэрэгт холбогдон, үнэн худал гэдэг дээр нийгэм хоёр талцаад байв.
Тэгвэл Г.Дэлгэрмаа гэж хэн бэ? О.Дашбалбар агсны охин Индратай 10 жилийн нэг анги, ХААИС, Зохиомж дээд сургуулийг дүүргэн АНУ-д магистр хамгаалсан, нэг үе загвар өмсөж байсан бүсгүй. Хилийн чанадаас ирээд “Гоёл” наадамд оролцож, рекламанд тоглон, хувийн бизнесээ эрхэлж явсан гялалзсан карьертай түүний амьдралд нэг л өдөр хар сүүдэр тусжээ.
Г.Дэлгэрмаа хоёр хүүхэдтэй, нөхөр нь төрд хариуцлагатай алба хашдаг. Найман жил ханилсан эхнэр, нөхөр хоёр бие биенээ хэнээс ч илүү мэдэж ойлгодог итгэдэг харилцаан дээр эдний гэр бүл ийм явдлын дараа ч салж сарнилгүй элэг бүтэн үлдэж чадсан түүх олон хүнд нэгийг бодогдуулах болов уу.
Твиттерийн хамгийн хатуу үгтэй, хурц шүүмжлэл хэлэхдээ хэнээс ч айдаггүй жиргээч гэдгээр нь хүмүүс түүнийг эчнээ мэднэ. Г.Дэлгэрмаа хэрэг явдлын дараа хэвлэлд нэг ч удаа дэлгэрэнгүй ярилцлага өгч байгаагүй юм.
Чухам юу болсон бэ, аалзны тор шиг хэрсэн энэ их хэрэгт холбоотой мэдээллийн аль нь үнэн, аль нь худал болохыг бид тодруулахыг зорьсон сэтгүүлзүйн эрэл байлаа. Хүчирхийллийн хохирогч хүний хувьд нийгмийн өмнө ил гарна гэдэг, тэр үеийг эргэн дурсаж ярина гэдэг сэтгэлзүйн хувьд маш хүнд боловч Г.Дэлгэрмаа эцсийн эцэст үнэнийг олон нийтэд хүргэхээр сэтгэлээ хатамжлан энэ бүгдийг ярьж буй нь анзаарагдсан.
-Твиттерийн хамгийн хурц үгтэй шүүмжлэгч таныг гарч ирэхээр жиргээчид их баярладаг юм шигээ. Хамгийн сүүлд Дашбалбар агсны охин Индратай нэлээн ширүүн тэмцэл өрнүүлж байна билээ. Тэр ер нь яг юу болсон юм бэ? Энэ асуудлаар яриагаа эхэлье гэж бодлоо.
-Ер нь Индра бид хоёрын хэрүүл маргаан нэлээн удаан үргэлжилж байгаа. Нэгэн цагт дотны найз нөхөд явсан Индрагийн маань биологийн аав Дашбалбар агсан “Нөхөд гэдэг хувь заяаны торыг хамтдаа сүлжих нэг гарын таван хуруу, нөхөд заримдаа ноход болдог” гэж хэлсэн байдаг.
Индра миний хувьд нохдын адил болсон нь яг юунаас болсон гэхээр би нэг нэвтрүүлэг хийх гэж байсан юм. Америкт амьдарч байсан туршлага, гадаад орнуудтай хамтран ажиллаж байсан болохоор гадны улс орны соёлын төвшин ямар байдгийг анзаарсан. Манай улс технологийн хувьд дэлхийтэй зэрэгцчихсэн хэрнээ соёлболон ёс зүйн төвшинд хаана нь ч хүрэхгүй байгаа. Тэр талаас нь бодоод “Соёлын довтолгоо” гэдэг нэвтрүүлэг хийх гэж 2011 оноос төлөвлөж байсан.
Тухайн үед Индра бид хоёр дотно сайхан найзууд байлаа. Тэр үедээ 2012 оны сүүлээр би Индраг, чи СУИС-т соёлын чиглэлээр дадлагажигч багшаар ажиллаж байгаа юм чинь хоёулаа миний энэ нэвтрүүлгийг хамтарч хийе, чи ч газар үз, нүд тайл, хамт хөтөлье гэсэн маягтай ярьж байсан юм. Би ETV телевизэд бас нэг төслийн нэвтрүүлэг хийгээд дуусчихсан байсан үе. Индра тэр саналыг дуртай хүлээж авсан.
Удаа ч үгүй 2014 оны эхээр Индраг миний ярьсан нэвтрүүлгийг өөрийнхөө юм шиг яриад явж байгааг ETV-гийн редактораас сонссон. Тэрнээс болж маргаан эхэлсэн дээ. 2015 оны нэг сард л даа, тодруулбал, би эрүүгийн гэмт хэргийн хохирогч болчихсон, хэрэг 5 сарын хугацаанд цагдаа дээр мөрдөгдөөд явж байсан үе.
Индрагийн хувьд Энхмөнхийн үйлдсэн хэргийн хохирогч нь намайг гэдгийг яг хэнээс, яаж мэдсэнийг нь мэдэхгүй, 2-р сарын 14-нд Энхмөнхийн эхнэр Урангоо гэдэг эмэгтэйтэй нийлээд Энхмөнхийн хүчирхийлэлд өртсөн эмэгтэй нь Дэлгэрмаа юмаа гээд намайг зарлачихсан.
Гэмт хэргийн хохирогчийг нийтэд зарлана гэдэг байж болшгүй зүйл. Гэмт хэрэг цагдаагийн байгууллага дээр шалгагдаад явж байгаа үед хэргийн мэдээ баримт, хохирогчийг дэлгэх нь эрүүгийн хариуцлага хүлээх хуультай. Гэтэл “Соронз” сэтгүүл дээр захиалагатайгаар миний нөхрийн ажил албыг миний зургийн хамт тавьсан. “Соронз” сэтгүүлийн эрхлэгч Индратай дотно гэдгийг өмнө нь Индра ярьдаг байсан, дээр нь Энхмөнхтэй гэрээтэй юм шиг байгаа юм.
Цагдаагийн байгууллагын хувьд олон нийтэд нэгэнт дэлгэгдчихсэн үед шуурхай арга хэмжээ авах ямар ч арга зам байгаагүй. Нэгэнт 5000 хувь хэвлэгдээд тараачихсан сэтгүүлийг яах юм. Тэгээд ч тухайн үед цагаан сар таарсан. Өмнө нь хэн ч мэдээгүй, би цагдаагаар яваад “Гоёл”-доо ордгоороо ороод явж байсан.
-Гэтэл бүх хүн таныг өөрөө тэр явдлыг дэлгэсэн гэж ойлгоод байдаг. Ний нуугүй хэлэхэд би ч гэсэн тийм ойлголттой байсан?
-Мэдээж ямар ч эмэгтэй өөрийгөө ийм хэргийн хохирогч боллоо гэж зарлахгүй. Ийм төрлийн эрүүгийн хүнд гэмт хэргийн хохирогч болчихсон хүний сэтгэлзүй эмзэг байдаг. Дээр нь гэмт хэргийн үнэн процессыг хохирогч л мэддэг, тэрийг нь хуулийн байгууллага нотолдог.Хуулийн байгууллагад ажиллаж байгаа хүмүүс хэн хүний зоргоор хэрэг үүсгэн шалгадаг ч юм биш. Мэдээж гэмт хэрэг болсон бүрэн шинж тэмдэг нотлогдохуйц баримтууд байгаа учраас л эрүүгийн гэмт хэрэг үүсгэн шалгаж эхэлдэг. Тэд хохирогчоо хүндэлж мэддэг учир ийм хэргийг аль болох нууцалж явдаг юм билээ.
Гэтэл ялладагч Энхмөнхийн зүгээс бүхий л аргаа хэрэглэн миний найз болох хүнд найзынхаа эсрэг гүтгэлэгийг удирдан гүйцэтгэх татгалзахын аргагүй тавьсан байх. Гэхдээ би эдгээр хүмүүсийнзохион байгуулалттай үйл ажиллагаанаас болоод намайг буруугаар ойлгосон хүмүүсийг буруутгадаггүй. Хүн бүр өөр өөрийн мэдлэгийн хүрээнд асуудалд хандаж өнгөц бодолтой хүмүүс надад их цаг зав зарцуулан гутаан доромжилдог байсан.
Одоо энэ сошиал ертөнц, жиргээчдийн хүрээнд над шиг хэрүүлч хүн байхгүй л гэж байна. Би өөрийгөө зарлаагүй хохирогч байдаг. Гэтэл намайг хүмүүс өдөөд, хатгаад, өө чигээд гүтгээд, дайраад байхаар бухимдахдаа хүмүүстэй тэгж харьцдаг л даа. Энэ бол зохион байгуулалттай өдөөн хатгалаг гэдгийг учир мэдэх хүмүүс ойлгож л байгаа.
-Уучлаарай, тэр явдлын дараа танай гэр бүлд ямар өөрчлөлт гарсан бэ? Та одоо гэр бүлтэйгээ хамт байгаа юу?
-Бурханы авралаар миний гэр бүл оюуны болон сэтгэлийн өндөр хаттай хүмүүс.Бидэнд мэдээж маш хэцүү байгаа. Бидний сэтгэл санааны хохирол их. Гэр бүлийнхэн болоод найз нөхөд маань Индра гэгч этгээдийг зарлах хүртэл мэдээгүй байсан. Хэдийнэ цагдаагийн байгууллага шалгаад тухайн үед процессоороо явж байгаа ч гэсэн би тэрийг яриад байх асуудал ерөөсөө биш. Тэгээд дээр нь би тодорхой хэмжээний амжилттай яваа эмэгтэй хүн.
Тухайн үед хэрэг явдал болсны дараа би, ийм юм болчихлоо гээд яриад явахад эрүүл ухаанаар бодоход би “Гоёл”-д оролцоо ч уу. Тэр жил би хоёр, гурван рекламанд тоглосон. Тэд нарт би ороо ч уу, үгүй ч үү. Одоо надтай гэрээтэй байсан газрууд хүртэл гэрээгээ цуцалж байна. Яахав, хэрэг явдал шийдэгдэхээр болох байлгүй дээ.
-Нөхөр чинь сэтгүүлд гарсны дараа мэдсэн үү, өмнө мэдсэн үү?
-Сэтгүүлд гарахын өмнө мэдсэн. Тухайн үед надад үнэхээр хэцүү байсан. Нэг хэсэг үнэхээр шокын байдалтай байсан.
-Ямар ч эр хүн ийм зүйлийг сонсоод тэсэрнэ. Нөхөр чинь би тэр хүнтэй очиж уулзана гэх ч юмуу, ямар нэг хариу үйлдэл үзүүлсэн байх. Тэр хүнтэй танай нөхөр уулзсан уу?
-Мэдээж ямар ч эр хүний хувьд зүгээр байхгүй байх. Тухайн үед нэлээн сэтгэлийн хат гаргаж байсан гэж би боддог. Учир нь бидний амьдрал хамгаас чухал. Ерөнхийдөө чамайг би хэнээс ч илүү мэддэг учраас би чамайг түрүүлж буруутгахгүй, би тийм эрүүгийн элемэнт нийгмийн хог шаар болсон өчүүхэн хүнтэй зууралдаж доошоо орохгүй, хамгийн гол нь чи өөрөө тайван бай, хуулиараа яваад сэтгэлийн тэнхээгээр давж туул гэж тухайн үед нөхөр маань хэлж байсан.
-Таны нөхөр эр хүний хувьд үнэхээр уужуу ухаан, гайхалтай хандлага гаргаж. Ингэхэд Та өмнө нь Энхмөнхтэй уулзаж учирч байсан юмуу?
-Огт үгүй. Анх удаа л уулзсан нь тэр, бизнес үзэх гэж ирсэн нь тэр. Тэгээд л хүчирхийлсэн. Тэр даруйд нь цагдаад хандсаны дагуу цагдаагийн байгууллага хэрэг үүсэх бүрэн нөхцөлтэй гэж үзэн шалгаад явж байсан. Тэр хугацаанд Энхмөнхийн зүгээс маш их дайралт хийж байсан.
-Мэдээлэл цацагдаад Энхмөнхийн эхнэр нь өөрийн чинь талаар мэдэгдэл хийсэн байсан?
-Тэр хүүхэн хичнээн хүний нөхрийг намайг хүчиндсэн гэж гүтгэж, мөнгө салгасныг би таашгүй гэж байгаа юм. Юу гэсэн үг юм бэ,энэ? Аргаа барсан эхнэр хүн гэж өрөвдөхөөс ч ичгүүртэй. Ядаж нөхөр нь араар тавьчихаад байхад дэмжээд сууж байдаг эхнэр хүн байгаа нь юуны төлөө нөхөртөө наалддагыг илхэн ойлгуулж байна. Тэр эмэгтэй нөхрөө буруутгах биш дэмжиж байгаа нь аймшигтай тэнэглэл. Давхар намайг гүтгэж байгаа асуудал шүү дээ.
Хэргийн үед П.Энхмөнх миний нуруунд хутга тулгах шиг болоход би айсан!
-Та гэтэл амьдралын бололцоотой хувийн бизнестэй хүн байдаг?
-Тийм.Энхмөнхийн хувьд хэрэг хийсэн нь эд мөрийн баримт, шинжилгээгээр нотлогдсон. Энэ бол гарцаагүй хөдлөшгүй бодит байдал. Хамгийн эхний мэдүүлэг дээр намайг огт танихгүй, би энэ хүнийг мэдэхгүй гэсэн. Хоёр дахь дээр цагдаагийн байгууллагаас баримтууд үзүүлэхэд, би танина, энэ эмэгтэй өөрөө өдсөн, дуудсан гэдэг. Ингээд мэдүүлэг нь зөрөөд, зөрчилдөөнтэй болж эхэлж байгаа юм.
Монголын хуулиар гэмт хэрэгт сэжиглэгдэжбайгаа хүн өөрийгөө юу ч гэж өмгөөлж болно гэж хүлээн зөвшөөрдөг юм билээ. Худлаа яриад л байхад болдог гэсэн үг. Худалч хүмүүс аймшигтай юм билээ.
Би арга ядаад худлаа үнэн яриаг шалгадаг төхөөрөмжийн шинжилгээнд оръё гэсэн хүсэлт ч гаргасан. Гэтэл Энхмөнх зүрхний өвчтэй болоод явчиж байгаа юм даа. Тийм болохоор тэр шинжилгээнээс мултраад худлаа яриад л, тэрийг нь яаж ч чадахгүй.Манай Эрүүгийн хуулинд цоорхой, цаг үрж гэмт хэрэгтнийг аль болох хэргээс мултруулах сул тал их байдаг юм билээ.
-Тухайн нөхцөлд гэр бүлтэй, боловсролтой, хоёр хүүхэдтэй эмэгтэй тийм байдалд орчихоор гүн шоконд орсон байх. Яаж чухам цагдаад хандах талаар бодсон юм бэ?
-Гэмт хэргийн хохирогч гэрч аль нь ч бай бодит үнэнийг хуулийн байгууллагад мэдүүлэх нь иргэний үүрэг. Би шударга хүн. Яг тэр хэрэг болсны хэдхэн минутын дараа нэг найз хүүхэн рүүгээ мессэж бичиж, хандсан юм. Тэр найз маань өмнө нь Монголын нэг нэртэй, одоо бол нас барчихсан хүнд хүчирхийлүүлж байсан сэтгүүлч эмэгтэй. Тиймээс зөвлөгөө авахаар хандсан хэрэг.
Найз маань одоо яваад очьё, наад байгаагаар чинь биччихье гэсэн. Тэгэхээр нь би, хэрэггүй ээ, хэсэг тайвшраадахъя, бодьё, яах ёстойг сайн бодьё гэсэн.
Тэгээд хоёр дахь хоногт нь цагдаад өгсөн. Нэг хоног би юу бодож өнгөрөөсөн гэхээр, цаашдаа яах юм, би гэмт хэргийн хохирогч болчихлоо,цагдаагийн байгууллагад мэдэгдэх ёстой. Гэтэл үүний ард хохирогчийн,тэр тусмаа эмэгтэй хүний нэр төр л гутаагдаад үлдэх эрсдэл өндөр байгаа байх гэж бодсон. Гэвч би хуулийн байгууллагын шударга ажиллагаанд найдаад зориглоод цагдаад өгсөн. Энхмөнхийн зүгээс над руу доромжлол ирж эхэлсэн.
-Нэг ийм бодол төрж байна. Тэр процессийн үеийн секс хэвийн энгийн байгаагүй. Тухайн үед өөрт чинь дарамт учруулсан хэвийн бус байсан болоод та гүн цочролд ороод ...?
-Хэвийн бус байсан нь ойлгомжтой. Анх удаа миний ажлын байран дээр, дээрээс нь миний сарын тэмдэг ирсэн байх үед танихгүй залуу хүч хэрэглээд дайрна гэдэг аймшиг. Дээр нь би гэр бүлгүй, ганц бие эмэгтэй биш. Гэр бүлтэй, хоёр хүүхдийн эх хүн. Тийм байдалд орно гэдэг бол үнэхээр аймшигтай.
-Болиоч гэж мэдээж чадлаараа эсэргүүцсэн байх. Тэр хүн ямар хандлага үзүүлсэн бэ?
-Яг ингээд танд ярихадч надад хүндрэлтэй байна. Гэхдээ би өөрийнхөө зөрчигдсөн эрхийг хамгаалах үүднээс бусдын мушгин гуйвуулаад байгаа яриаг үнэн зөвөөр нь ойлгуулахын тулд ярихаас өөр арга алга. Хүчиндэх гэдэг ерөөсөө л хүч хэрэглээд бэлгийн дур хүслээ хангах процесс.
Тухайн үед би болиоч, тавиач гээд зөндөө хэлсэн. Тэгээд миний нуруунд нэг юм тулгангуут би айсан. Тэр чинь надаас том биетэй хүн ш дээ. Тэр хүнд би тухайн үед алуулбал яах вэ, намайг нэг шанаадахад би тэнэг ч юмуу болоод үлдвэл яах вэ?Тэгж дайрч, улайрч байгаа хүн намайг алж ч магадгүй.
Тийм нөхцөл байдалд ингэж л боддог юм билээ. Миний биеэ хамгаалж чадахгүй байгаа сул дорой байдлыг л тэр хүн ашигласан. Шүүх эмнэлгийн шинжилгээгээр миний биед хөхрөлт цус хуралт үүссэн байсныг ч нотолсон.
-Процесс хэр удаан үргэлжилсэн бэ?
-Айхтар удаагүй, 15, 16 минут болсон гэж цагдаагаас тогтоосон байсан.
-Хүчирхийлж дууссаныхаа дараа тэр хүн юу гэж хэлэх юм?
-Тэр хүн их сурцтай байсан юм билээ. Намайг тэр өөрөө олон нийтэд зарласны нэг давуу тал нь надад маш олон хүн Энхмөнхийн хууль бус үйлдлүүдийн хохирогч болж байснаа хэлсэн. Гачууртад амьдардаг хаусаа гадаадад байдаг нэг гэр бүлээс луйвардаж авсан ч байх шиг, тэр байтугай Энхмөнх чинь одоогийн энэ Урангоо гэдэг эхнэрээсээ гадна өмнө нь Урангуа гэдэг эхнэртэй, хүүхэдтэй байсан юм байна лээ.
Тэр Урангуа нь надтай холбогдож төрсөн хүүхдээ 8 сартай байхад энэ авгайтайгаа суугаад явсан, хүүхдээ тоодоггүй, 100 төгрөг ч өгч үзээгүй, манай гэр бүлийнхнийг үргэлж дарамталдаг гэх мэтийг ярьж байгаа юм.
Энхмөнх 1985 оных. Ерөөсөө хар нялхаасаа л гэр бүл, ёс суртахууны доголдолтой байсан юм билээ. Өмнө нь надаас гадна гурван ч эмэгтэйд бэлгийн дарамт үзүүлж хүчирхийлж байсан юм билээ. Бас хоёр гурван танхайн хэрэгтэй ч байх шиг. Нэг ёсондоо балмад танхай гаж донтон байсан юмуу даа.
Би тэрийг нь мэдээгүй, мэдэх ч аргагүй, тийм болоод л хохирогч нь болсон байгаа юм. Үйлдлээ дуусгаад намайг чи зайлаач гэж шаардахад, Би гараад машинаа угаалгаад байж байя, араас гараад ирээрэй гэсэн. Би, чи зүгээр яв, зайл гээд.
Миний өмсөж байсан хувцас гутал урагдчихсан, би гэр рүүгээ ч явж чадахгүй байдалд ороод. Азаар манай гэрхэрэг болсон газартай ойрхон учраас үйлчлэгч охиноо дуудсан. Эгчийнхээ солих гутлыг аваад ирээч, ажил дээрээ байна гээд. Нөгөө хүнийг эргээд ороод ирэх вий гэж айж байсан ч гэсэн хүн дуудчихсан болохоор айдас арай гайгүй байсан.
-Тэрний дараа Энхмөнх цагдаад өгөхөөс өмнө таньтай холбоо барьсан уу?
-Барьсан.
-Юу гэж байх юм?
-Дарамталсан. Хүнд хэлбэл хохь чинь шүү гэхээсээ илүү чи намайг мэдэж байгаа биз дээ гэсэн.
-Тэр хүний юуг нь мэдэх ёстой байх уу?
-Тэр өдөр буюу 10-р сарын 14-ний өдөр Хөрөнгийн биржийн гаднаас машинтай ирж намайг авсан. Миний машин гардаггүй өдөр байсан болохоор өөрөө ирж авья гэж утасдсан л даа. Миний уулзсан шалтгаан нь гэвэл оруулж ирж байсан брэндээ зарах зорилготой. Америкийн элчинд ажиллах санал авсан учраас дахиж суралцаж доктор ч юмуу хамгаалангаа хэдэн жил боловсрох төлөвлөгөөтэй байсан.
Би ирээдүйд улс төрд орно, олон сайхан буяны үйл хийнэ гэж боддог. Өвөө маань Монголд нэлээн нэртэй хүн байдаг. Өвөөгийнхөө нэр төрийг гаргах ёстой. Боломж хаа ч бий гэсэн үүднээс боловсролоо дээшлүүлье гэж бодсон хэрэг.
Тэгээд л Энхмөнхөд хийх гэж байсан бизнесээ зарах санаатай уулзсан нь тэр. Тэр Хөрөнгийн биржийн гаднаас ирж авахдаа өөрийгөө надад өмгөөлөгч, Баянзүрхийн шүүх дээр хүнд өмгөөлөл үзүүлээд ирлээ гэж хэлсэн. Энэ бүхэн нь ор үндэсгүй худал байсан.
Байцаагчийн мэдүүлэгт Энхмөнх өөрөө надад тэгж худлаа ярьснаа хэлсэн байгаа. Харин оройгоор хуулийн сургууль төгссөн юм билээ. Тэр утгаараа тэр хүнд гэмт хэрэг үйлдчихээд яаж мултардаг аргад суралцсан байж болох юм.
-Та өмнө нь таньдаггүй байсан юмуу? Уг нь Энхмөнхийн аав нь нэр төртэй, тодорхой хэмжээнд олны танил хүн шүү дээ.
-Танихгүй, огт танихгүй. Өмнө нь хоёр, гурав хоног фэйсбүүкийн чаатаар харьцсан. Нүүр нүүрээ харж байж хүнийг жинхэнэ утгаар нь танина уу гэхээс сошиал ертөнцийн харилцаа бол хүн хоорондын харилцаанаас хамаагүй хийсвэр шүү дээ.
-Чаатаар таньтай сээтэгнэх ч юмуу, ямар нэг хандлага гаргаж байсан уу?
-Чаатаар над руу нүцгэн зургаа явуулж байсан. Эмэгтэй хүний дээгүүрээ нүцгэн зургийг хүмүүс нүцгэн л гэдэг ш дээ. Эрэгтэй хүнийх ч адилхан л биз дээ, зарчмын хувьд. Тэр зургийг нь би сүүлд нэвтрүүлгээр дэлгэсэн. Нүүрэндээ маск тавьчихсан, би ингээд хэвтэж байна гээд. Нэг найз нь хөдөөнөөс ирчихлээ, хамт ууя гэж бичиж байсан. Бас хамт Гачуурт явчихаад ирье гээд.
-Та Энхмөнхийг гэр бүлтэй гэж мэдэж байсан уу?
-Тухайн үед фэйсбүүк рүү нь орж үзээгүй. Тийм шаардлага ч байгаагүй. Гэр бүлтэй гэдгийг нь мэдээгүй байсан. Мэдэх ч шаардлага байхгүй шүү дээ. Би цэвэр ажил хэргийн зорилгоор уулзсан.
-Гэтэл өөрийг чинь нүцгэн зургаа Энхмөнх рүү явуулсан гэдэг?
-Тэр мэдээлэл ор үндэслэлгүй гүтгэлэг. Өгүүлбэр бүр нь 100% худал. Тэр мэдээг unen.mn гээд сайт дээр Энхмөнхийн ээж нь захиалж гаргасан. Сайтын удирдлага, бичсэн сэтгүүлч нь дараа нь хуулийн байгууллагад мэдүүлж надаас уучлалт гуйсан. Тэдний зүгээс захиалсан гүтгэлэг мэдээллүүдийг shuurhai.mn сайтын эзэн Ариунгэрэл гэдэг хүн Энхмөнхөөс мөнгө авч бусад сайтуудад түгээх замаар үйлдсэн байдаг. Энэ нь ч хуулийн байгуулагад баримттай бий. Түүний мэргэжил нь сэтгүүлч мөн эсэхийг би одоогоор сайн мэдэхгүй байна. Ямартай ч хэд хэдэн сайтуудтай холбоо сүлбээтэй юм билээ.
Бас хүчиндүүлчихээд хамгийн түрүүнд хандсан сэтгүүлч найз маань энэ талаар бичсэн. Сонинд ажиллаж байсан сэтгүүлч л дээ, энд нэрийг нь хэлээд яахав. Алив гэмт хэргийн талаар сэрэмжлүүлэх үүднээс бичих нь сэтгүүлчийн мэргэжлийн үүрэг гэдэг үүднээсээ бичсэн л юм гэсэн. Гэхдээ надаас зөвшөөрөл аваагүй. Миний нэрийг бичээгүй байсан л даа.
Пунцагбалжирын Энхмөнх тэр дүүргийн тэддүгээр хороонд нэгэн эмэгтэйг хүчирхийлсэн гэмт хэрэгт холбогдон, цагдаагийн байгууллагад шалгагдаж байгаа юм байна гэх мэтээр зөвхөн баримтыг бичсэн байсан. Харин хохирогч нь би гэдгийг зөвхөн Индра задалсан. Одоо болохоор Индра их зальжин замаар өөрийгөө хайцаалж тус хэргийг би биш Дэлгэрмаагийн сэтгүүлч найз нь захиалгаар бичсэн гээд л гүтгээд байгаа.
Дашбалбар агсны охин Д.Индра надаас мөнгөн тусламж авч байсан байж “Хохь чинь” гэсэн
-Индра яагаад үүнийг зарлах болов? Та хоёр ер нь хэдэн жилийн найзууд вэ?
-Индра бид хоёр арван жилийн нэг ангийн найзууд төдийгүй олон жилийн найз нөхдийн холбоотой.Индра тв нэвтрүүлгээр ороод бүтэн 15 минутын турш намайг гүтгэж байгаа юм. Мөн ч их хүчин чармайлт шүү.
Биднийг дотно найз нөхөд байсныг гэрчлэх маш олон хүн байхад л энэ Дэлгэрмаа гэх бүсгүй намайг өөрийнхөө найз гээд байна, энэ бол намайг нэг хоёр удаа хамт зургаа авахуулъя гэж гуйсан танихгүй эмэгтэй ч гэх шиг. Худалч хүн ядаж ой сайтай байх хэрэгтэй байх. Би өөрөө худлаа ярьж, хүнд атаархах гэдгийг мэдэхгүй болохоор их балмагдсан.
Надад Индраг сэтгэцийн хувьд эрүүл биш юм байхдаа гэсэн бодол төрсөн. Нөгөөтэйгүүр найзын сайхан сэтгэл нөхөрлөлөө хэдэн төгрөгөөр зарсан бол гэсэн хөгийн бодол ч төрсөн. Индра хар багаасаа өөрийгөө од гэж төсөөлж өссөн болоод ч тэрүү, хүмүүсийн өмнө жүжиглэлт сайтай.
Хүн бүрийг их муугаар ярьдаг, тэгсэн хэрнээ тэд нартайгаа нүүрэн дээрээ гайхалтай эелдэг харьцана. Энэ бүхнийг би найз нь байсныхаа хувьд мэднэ. Олон ч хүн мэддэг байх. Би одоо Индрад найз нөхөд болж үлдсэн хүмүүсийг өрөвддөг юм. Тэд хэзээ нэг цагт Индрагийн надад үзүүлсэн шиг урвалтын үзэж сэтгэлээрээ их хохирох байх.
-Та хоёр арван жилээ аль сургуулийг төгссөн бэ?
-Төмөр замын 20-р сургууль. Индра өөрийгөө Орос 3 төгссөн гээд ойлгуулаад байдаг. Тэр болгоныг нь би надаас урвасан үеэс нь эхлэн илүү нарийн анзаарч байна. Бид Төмөр замын 20-ыг төгссөн. Саяхан хүртэл манай ангийнхан уулзсан. Тэдэнд мэдээж ихсонин байх шиг байна лээ. Хэн нь хэн бэ гэдгийг мэдэж байгаа болохоор олж харах юмаа олоод харчихсан л байгаа.
Индраг явуулчихаад бид удаан ярилцаж суусан. Зарим нэг маань чи арай ухаантайгаараа нэг ангийн сайхан найзууд байснаа бодоод уучилчих гэж хэлж байсан. Би Индрад намайг гүтгэснээ залруулах 6 сарын хугацаа өгсөн.
Гэвч тэр хүнд төдий хэрийн ухамсар оюун санааны хэмжээ байгаагүй учир би аргагүйн эрхэнд хуулийн байгууллагад өгсөн. Д.Индрад эрүүгийн хуулийн 110 буюу бусдыг доромжлох, 111 буюу гүтгэх гэсэн зүйл ангиар эрүүгийн хэрэг үүссэн. Би өмнө нь ч хэлсэн. Эрүүгийн хэрэг, хуулийн байгууллага гэдэг тоглоом биш. Индрад батлан даалтаар авсан хоёр найз нь бас л бидний дундын найзууд.
-Индра багадаа ер нь ямархуу хүүхэд байсан бэ? Багын найзууд л бие биенээ хамгийн сайн мэддэг.
-Яахав, би хүнийг аль болох сайн талаас нь хардаг хүн. Гэхдээ муу хүнд мэдээж сайн тал байхгүй байхад сайлаад байвал худлаа ярьсан болно. Найз нөхөд байснаа бодоод магтчихад Индра аавгүйгээрээ хэн ч биш, тийм ч учраас олон ах эгч нараасаа илүүгээр аавынхаа нэрийг авч явдаг гэдгээрээ бахархдаг хүн. Тэр нь сайн л тал нь байх.
Хүн бүрийн амьдрал тус тусдаа, Би Индрад гомдолтой гээд ар гэр ах дүүг нь хэзээ ч муулахгүй. Индра өөрөө эрүүгийн хариуцлага хүлээх субьект. Гэхдээ... ний нуугүй л хэлэх ёстой ш дээ, тэ?
-Ний нуугүй үнэнийг л ярих хэрэгтэй. Та ч гэсэн өөрийнхөө тухай ярьж байгаа юм чинь.
-Индра сурлага муутай байсаан. Орос сургуульд байсан айлын эрх хүүхэдмонгол хэлнээс авахуулаад бүх хичээлдээ тааруухан. Аравдугаар ангид бид нэг жил хамт сурсан,ангидаа хамгийн бага хоёр нь гэгддэг байсан учраас илүү дотно. Бидний хонхны баяраар толгойгоо нийлүүлээд авахуулчихсан зураг хүртэл байдаг.
Индрагийн хувьд хөвгүүдтэй их найзалдаг, нүүрэмгий талдаа, эрх дураараа охидууд байдаг ш дээ, тийм л охин байсан. Олон жил найзалчихаад муулж байгаа юм биш, бодит байдал тийм байсан. Миний хувьд үнэхээр даруухан охин байсан. Манай ангийнхан одоо ч ярьдаг, чи ёстой юу ч дуугардаггүй шахуу байсан гээд. Индра манай ангийн хоёр бандитай нийлдэг байсан. Тэр хоёртойгоо Тагнуулд шалгалт өгч орсон юм шиг байна лээ. Гэхдээ тагнуулын сургуулиасаа хөөгдсөн гэсэн.
-Яагаад хөөгдсөн юм бол?
-Хүүхэдтэй болоод авахуулсан ч гэлүү, би тэгж сонссон. Найз маань бас зовж л байгаа юм байна гэж тухайн үед бодож байсан. 2012 оны зунаас Индра бид хоёр эргээд дотносож эхэлсэн.
Индра нөхрөөсөө яг албан ёсоор биш ч салсан байсан үе л дээ. Ганцаардаж байсан үед нь би их хэрэг болсон юм шиг байгаа юм даа, одоо бодоход.
Уулзаад удаа ч үгүй байхдаа надаас аавынхаа номыг хэвлүүлэх гэж байгаа, 5 сая төгрөг хэрэгтэй байна гээд. Тухайн үед би мөнгөтэй ч байж. Тавыг нь ч хаашаа юм бэ, найз нь нэг сая төгрөг оруулья гээд өгч байсан. Нөхөртөө зодуулсан, зовсон, найз нь үнэхээр их ганцаардаж байна, хийморь сүлд, нүдний гал хүртэл унтарчихсан гэх мэтээр ярьдаг, жаргал зовлонгоо хуваалцдаг найзууд байсан.
-Гэтэл зовлон жаргалаа хуваалцаж өөрөөс чинь дэмжлэг авч байсан хүн яагаад араас чинь хутга зоох болов? Ямар нэг шалтгаан байж таарна. Нөгөө талаас өөрийнх нь бүх сул талыг мэддэг хүнд хүн дургүй байдаг?
-Харин тийм ээ. Надад маш их атаархдаг байж. Хожуу ч гэлээ хүмүүсийн муу чанарыг тултал нь ойлгож байна даа. Менежмэнтийн ухаанд хүмүүсийг тоглоомоор муудалцаж таних арга байдаг. Би удирдахуйн ухааны магистр хүн. Гэхдээ найз нөхөдтэйгөө тийм санаалсан юм шиг аргаар харьдаг хүн биш.
Би хүмүүстэй айхтар сүжирдэггүй, ном унших дуртай, темпраментын хувьд бусдаас өөр хүн л дээ. Хүмүүс намайг гол дүр болгож хардаг. Гэтэл би амьдрал дээр гол дүр болох сонирхолтой хүн биш. Би хуурамч дүр эсгэж хүнтэй харьдаггүй, чадах ч үгүй. Нэг ийм үг байдаг шдээ, хүн чамайг гомдоож байвал чи тэр хүнд хэтэрхий сайн хандсаных гэж. Би хэтэрхий сайн ханддаг байсандаа алдсан байх.
-Тухайн үед яагаад ингэж байгаа юм бэ гэж та мэдээж Индра руу эмоци гаргасан л байж таараа. Хариуд нь Индра юу гэж хэлсэн бэ?
-Шуудхан л, хохь нь ээ, би чамайг ямар эмэгтэй гэдгийг олон нийтэд зарлана гэсэн. Би яг ямар эмэгтэй гэдгийг олон нийт үнэн зөвөөр мэдэх юм бол надад эргэлзэх, муу санах хүн гарахгүй байх. Гэтэл үнэнийг хэлэхэд өөлөх юмгүй болохоор үлгэр зохиож гүтгэж гүжирдэж байгаа юм.
Одоо юу гэх юм, би нээх өөрийгөө дөвийлгөж байгаа юм биш дээ. Гэхдээ ихэнх сургамжит түүх, үлгэрт сайн талын хүмүүсийг хорон санаатнууд их гүтгэж зовоож гардаг шүү дээ. Тэрэн шиг л юм болсон. Одоо бодоход Индра надад атаархах сэтгэл өвөртөлж яваад өс санаж тийм юм хийсэн юм билээ.
-Овоо босгоогүй бол шаазгай суухгүй гэдэг, та тэр хүнд санаатай, санамсаргүй муу юм хийснээ мартчихсан юм биш биз дээ?
-Хийгээгүй гэж би баттай хэлнэ, би тэр хүний амьдралд ерөөсөө өсөрхөхөөр юм хийгээгүй. Одоо ч би сэтгэлдээ Индрад муу санаж өс зуудаггүй.
Тэр хүний амьдрал ээдрээтэйг тэртэй тэргүй монголчууд мэднэ. Хөөрхий тэр талийгч эцэг нь яруу найргийнхаа хувьд алдартай суут хүн, би хүндэлдэг. Тэр хүн хэдэн эхнэр дамжаад, Индра ямар учиртай хэддэх хүүхэд нь гэдгийг олон нийт мэднэ.
Саяхан Индрагийн нэгэн авга эгч нь хүртэл фейсбүүкдээ бичсэн байсан. Тэр нь сайхан хүний албан ёсны хүүхдүүд өнөөдөр дуугүй л амьдардаг, гэтэл Индра үндсэндээ аавынхаа нэрээр олонд танигдлаа, үнэндээ Индрагийн ээж нь миний авга ахын явалддаг хүүхэн нь л байсан болохоос хууль ёсны эхнэр нь байгаагүй гэх мэтээр. Олон хүн уншсан байх.
Тэрнээс гадна Индра амьдралынхаа айхтар юмнуудыг надад ярьж байсан. Тэр бүхнийг нь би мэддэг нь л надад муу зүйл хийх үндэслэл нь байсан байх. Тэгээд намайг зүгээр дэвсэлье л гэж бодсон байх. Royal HD телевизээр ярилцлаганд орохдоо, энэ хүүхэн эрүүгийн гэмт хэрэгтэн, гэр бүл үймүүлэгч гэж ярьж байгаа юм. Ингэж худал ярьж хүнийг олон нийтийн хэрэгслээр гүтгэн доромжилсоных нь төлөө Индрад эрүүгийн үүссэн хэрэг.
Би энд зөвхөн шударга үнэнийг л ярьж байна. Хэрэв худлаа бол өдийд надад эрүүгийн хэрэг үүсэх л байсан байх. Одоо дүгнэхэд, Индрагийн хувьд надад их атаархаж байсан юм билээ.
Яагаад гэхээр, Индра өмнө нь Цэндээ гэдэг нөхөртэй байсан. Цэндээ нь гурван хүүхэдтэй, эхнэртэй байж байгаад салаад Индратай суугаад хоёр хүүхэдтэй болоод Индра тэр хоёр салчихсан. Тун ч ээдрээтэй амьдралтай.
Гэтэл би дэргэд нь сайхан амьдраад байдаг. Нөхөртэй, хүүхэдтэй, өөрөө хангалттай орлоготой. Нөхөр маань намайг их эрхлүүлдэг.
Тэр хүн надад зовлонгоо ярихад би юу ч бодохгүй сонсоно. Эргүүлээд өөрийнхөө байгаа амьдралыг ярина. Тэгэнгүүт өөрийг нь тавлаж байна гэж боддог байж л дээ.
Найз маань салсан нөхөр нь мөнгө өгөхгүй байна гэхээр би энэ тэнд ууж идсэн зүйлийнх нь төлбөрийг нь төлчихөж байх жишээний. Тусалж байна гэж бодохын оронд доромжилж байна гэж бодож. Нэг тийм ойлголцлын алдаа, амьдралын түвшингийн ялгаа гарсан.
Индрагийн хувьд төрийн албан хаагч, 300, 400 мянган төгрөгийн цалинтай байсан юмуу даа. Юу ч гэмээр юм бэ дээ, тухайн үед амьдрал нь хэцүү байсан. Тийм байхад нь би дэлгүүр хэсээд ийм юм авлаа гээд фэйсбүүктээ зургаа тавиад, энэ бүхэн тэр хүнийг эмзэглүүлдэг байсныг би тухайн үед анзаараагүй юм билээ.
Бидний амьдралын энэ ялгаатай байдал өөрийн эрхгүй тэр хүнд атаархах сэтгэл төрүүлээд байж л дээ. Бүр нарийн яривал би арван жилдээ зүгээр нэг доожоогүй, байгаа, байхгүй нь мэдэгдэхгүй сураггүй “гар” байж. Тэгэхэд Индра хөвгүүдийн дунд од, бүх хүний анхаарлын төвд амьдардаг охин байсан ч юмуу.
Намайг нөхрөөс минь салгах бодол цаашлаад үйлдэл ч байсан. Би муугаар бодож байгаагүй тул анзаардаггүй байж. Эмэгтэй хүний хамгийн том садаа нь амьдрал нь бүтэлгүйтсэн, өөрөөс нь дор найз нь гэдэг юм билээ. Индрагийн тухайд өөрөөсөө болж амьдралаа бусниулж явсан юм билээ.
Салсан нөхрийг нь би сайн мэдэхгүй байлаа. Тэр хүн Индраг миний талаар олон нийтэд яриад эхлэхэд надтай өөрөө холбогдож хамаг амьдралаа ярьсан. Эр хүнийхээ хувьд тэр хүн өмнө нь нэг эхнэрээс салчихаад Индратай сайхан амьдрах л хүсэлтэй явсан юм билээ. Индра болохоор зоргоороо ханддаг байсан гэнэ. Ээжтэйгээ хоёулаа ажил дээр нь ирээд суудал дээр нь суучихаад өөрөө компанийнх нь захирал юм шиг л даналздаг байсан гэсэн.
Бас Индра улс төрд орно, хэвлэлийн эрхийг байтугай, төрийн эрхийг авна, Элбэгдоржоос аавынхаа өшөөг авна гэдэг байсан байгаа юм. Би нарийн ширийнийг сайн мэдэхгүй. Аав нь Элбэгдорж гуайг хойд эцэгтээ хөөгдсөн энэ тэр гээд доромжлоод бичсэн шүлэг нь байдаг юм билээ. Учир холбоотой л байх. Тэр том хүмүүсийн асуудал надад ямар хамаа байхав. Тэгээд Индра нөхрийнхөө санхүүгийн тусламжтайгаар Сүхбаатар аймагт очиж пиарын ажил хийсэн юм билээ.
Энэ бүхнийг надад нөхөр нь л ярьсан зүйлс. Тэр үед Индра ганцаараа тэр хүний хүүхэд мэт олонд хандаж байхад эх тусдаа том эгч Мөнгөндайлай нь их л хэцүүхэн байсан зэргээс авахуулаад маш олон зүйлс надад ярьж зарим баримтыг үзүүлж байсан.
-Тэгээд Энхмөнх та хоёрын дунд тийм асуудал үүссэнийг Индра яаж мэдсэн байх уу?
-Харин яаж мэдсэн байх уу? Лав л Энхмөнхийн эхнэр Урангоо, Индра хоёр нийлж намайг фэйсбүүк дээр зарлаад, тэрийгээ сайтуудад түгээсэн. Би гомдохдоо, чи тэр авсан мөнгө төгрөгөө өгөөрэй гэж нэг хэлсэн. Өгөх ч үгүй л дээ. Би ч эргүүлж авна гэж өгч байгаагүй.
Намайг бусдын гэр бүл үймүүлж, сүйрүүлсэн гэж яриад байгаа нь бас ийм учиртай. Индрагийн найз, уулзаж байсан нэг залуугийнх нь эхнэр, Индра хоёр миний утсаар харьцаад байсан юм. Дараа нь тэр залуугийн эхнэр Индраг гэж андуураад надтай харьцаад. Би тэр залуугийн эхнэртэй уулзаж, уучлаарай, би тэр хүн чинь бишээ гэсэн. Тэр залуу нь ёстой маапаантай эр. Над руу бас хандаж байсан,би чамайг сонирхож байна, энэ тэр гэж. Индрагийн хүрээллийн залуучууд ер нь эвгүй. Хаа очиж үерхдэг байсан Ууганбаяр гээд яруу найрагч залуу нь хүн чанартай.
Би тэр өмнөх ярьсан залуугийн мессэжийг эхнэрт нь үзүүлж, нөхөр чинь ингээд байсан гэлээ. Гэтэл эхнэр нь шууд миний нүдэн дээр нөхрөө цохиж бариад, нөгөө нөхөр нь хэлэх ч үггүй. Эцэст нь эхнэр нь надтай ойлголцоод, уучлаарай, чиний буруу биш, нөхөртэйгөө тооцоо бодох ёстой юм байна гээд салсан. Их ухаалаг эмэгтэй байсан. Гэтэл үүнийг Индра манай нөхөрт хэлчихсэн. Энэ ёстой жонхуу шүү, хөндлөнгийн хүмүүс ойлгоход ч хэцүү байх.
Өөрөө нөхрөөсөө салчихсан байсан Индра намайг бас салгах гээд байна ш дээ. Би Индрад үүссэн эрүүгийн хэргийн үед тэр залууг цагдаад авчруулж байцаалгасан. Индра намайг тэр хүний гэр бүлийг салгасан, нэг ёсондоо намайг тэр залуутай явалдаж нөхрөө хуурч байсан гэх утгаар гүтгээд байсан учир тэр залууг гэрчээр байцаалгах хүсэлт өгсөн. Тэр залуу нь үнэнээ хэлсэн байсан.
Өөрөөр хэлбэл намайг гэр бүлийг нь салгах зүйл хийж байгаагүй, гэр бүлтэйгээ хэвийн байдаг зэргээ мэдүүлсэн байсан. Мэдээж тэр хүн худал мэдүүлбэл хуулийн хариуцлагатай учир үнэнээ л хэлсэн байх.
Бас нэг яриа нь Индра намайг найз нөхөд, анги хамт олондоо нэр муутай гэх мэтээр твиттерт гүтгэж байсан. Иймээс би бидний дундын найз, сайн яривал Индратай илүү дотно бөгөөд батлан даалтанд авсан нэг эмэгтэйгээс гэрчийн мэдүүлэг авхуулах хүсэлтийг цагдаагийн байгууллагад гаргасан. Тэр эмэгтэй үнэн мөнөө хэлсэн байдаг. Индрагийн худал гүтгэлүүд ингэж няцаагдаж байгаа юм.
-Таныг нөхөртөө миний нүдэн дээр зодуулж байсан, тийм төвшин сайхан амьдралтай биш гээд дайрч байсан санагдана. Үнэхээр ийм юм болсон уу, та ний нуугүй хариулт өгөөч?
-Хүний амьдралд баяр, гуниг ээлжилдэг. Нөхөр бид 2 муудалцаж л байсан байж таараа. Найз маань зовлонгоо ярихаар ядахдаа л тайвшраг гэж бодохдоо манай нөхөр ч гэсэн намайг алгадаж байсан, тийм зүйл хүний амьдралд байна ш дээ гэх мэтээр ярьж байсныг маань л тэгж томруулж ярьж байгаа хэрэг. Манай нөхөр тийм характер гаргах ч хүн биш. Хараагүй юмаа харсан болгож, дэвэргэж ярих ер нь худалч хүний араншин л даа.
Хэдий ээж нь Дашбалбар агсны албан ёсны эхнэр биш ч албан ёсны эхнэрээс нь илүү олонд хоногшиж үлдсэн. Тэр аргыг хүүхэд багын орчноосоо сайтар сурч л дээ. Индрагийн аав бас хүчингийн асуудалтай, завдаж байсан гэсэн. Индра ч намайг гүтгэж ярьсан тв яриандаа сэтгүүлч Мөнхбаясгалан, Жаргалсайхан нар залуудаа манай аавд хүчирхийлүүлсэн гэж гүтгэж байсан гэж ярьсан.
Багаасаа тийм их асуудал, зөрчилдөөн, мөнхийн хэрүүлтэй орчинд өссөн хүүхэд том болоод эргээд яг тийм хорон байдлаар хүмүүст ханддаг юм байна. Бас хэнийг, хэрхэн аргалж өөрийгөө дээш нь дөвийлгөхөө мэддэг, зальжин. Хэнийг нь юу гэж хэлээд, ямар үед доош нь хийхээ мэддэг.
Тэгээд дээрээс нь өөрийнх нь төрөлх характер байна. Би хүмүүсийн нүдэн дээр шууд хэлдэг байхад Индра нүүрэн дээрээ надтай соёлтой маргангуутаа, дараа нь мессэж бичдэг. Янхан минь пизда минь, айхтар айхтар үгнүүд нь байнаа, байна /үзүүлэв/.
Өөрийнх нь худлаа яриад байгааг би хэлэхээр хуулийн мэдлэг, ойлголт муутай юмуу эсвэл өөрөө угаасаа тэнэг юмуу, намайг эрүүгийн гэмт хэргийн ялтан гээд чичлээд байдаг. Хуулийн байгууллагад байгаа баримт хавтаст хэргүүдийг хуулийнхны өмнөөс олон нийтийн шүүгч аятай л шал худлаа болгон яриад л. Хэрэг хуучрахгүй.
Миний хувьд үнэн мөнийг илчилсээр ирсэн учир яарах зүйл байхгүй. Энхмөнх, тэрний эхнэр ч гэсэн тэгээд байгаа биз дээ? Дэлгэрмаа шиг худалч хүн байхгүй л гээд. Би худлаа ярьж, хүнийг гүтгэсэн бол өдий хугацаанд наад зах нь надад эрүү үүсч, хариуцлага хүлээнэ. Гэтэл эсрэгээрээ Индрад хэрэг үүсчихсэн байдаг.
Цагдаагийнхан хаа очиж шударга, процессын дагуу шалгадаг юм билээ. Прокурорт бол би эргэлздэгээ нуухгүй. Гэхдээ ийм олонд тархсан хэргийг арайч худал шүүхгүй байх.
Монгол улсад шүүх эрх мэдэл зөвхөн шүүхийн байгууллагад байна. Гэтэл эсрэг тал хэргийг прокурорын түвшинд нь будилаантуулж олон нийтэд хохирогчийг гутаалгах үйлдлийг санаатайгаар өөгшүүлж байгаагаас харахад тэдний бодит худал хуурмагыг олон нийт хангалттай ойлгоно.
Мэхт мэхэндээ гэгчээр Энхмөнх Индра нар намайг олон нийтэд гүтгэн таниулсандаа өөрсдөө алдсан байх. Төлөвлөгөөнийх нь дагуу яваагүй учир одоо бүр улаан цагаандаа гараад байх шиг байгаа юм. Миний өмгөөлөгчид аль аль хэргүүдийн нотлох баримтууд байгаа шүү дээ. Хэрэг хуучрахгүй, баримт балрахгүй. Хэзээ нэг өдөр үнэн мөнөөрөө гарах л болно.
Энхмөнх Индрад мөнгө өгч хэвлэлээр сөрөг мэдээлэл цацуулсан
-Танд энэ хэрэг дээр ялах магадлал байна уу?
-Магадлал байлгүй яахав. Би үнэний талд байна. Хууль ч үнэний талд байх ёстой. Тиймээс би ялна гэдэгтээ итгэлтэй байна. Энхмөнх Индра нар санаатайгаар бүлэглэн хэрэгт хөндлөнгийн нөлөө үзүүлж мөн миний нэр хүндэд бүдүүлгээр хандаж өдийг хүртэл олон нийтэд гутаан доромжилж, гүтгэсээр байгааг олон хүн харж байна. Хууль ч энийг харж л байгаа байх.
Монголын хуулийн байгууллага тэр тусмаа бид олон улсын өмнө хүний эрхийг дээдлэх байр сууриа бэхжүүлсээр яваа улс. Би хуулийнханд ажлаа үнэн зөв хийх боломжийг өгсөөр ирсэн. Нэг ч удаа би хуулийн байгууллагын ажилтанд агсарч, шахаж шаардаж хямралаа тулгаж үзээгүй.
Төр төмөр нүүрээ харуулж энэ этгээдүүдэд зохих хариуцлагыг шударгаар оногдулах байх. Яахав олны танил хүмүүсийн асуудал учраас дээр нь яллагдагч нь өөрөө хэргийг олон нийтэд тараасан учраас олонд тарсан нь л энэ болохоос хичнээн ийм хэрэг хууль хяналтаар ороод шүүгдэж байгааг бодоход энэ хэрэг дэргэд нь дэндүү ойлгомжтой байх.
-Ялвал Энхмөнхөд ямар хариуцлага хүлээлгэх бол?
-Тэр хүн 5 жил хүртэл хорих ял эдэлнэ. Уул нь Энхмөнх хэргээ хүлээвэл тэнсэн аваад үлдэж магадгүй. Хүүхдүүдийг нь өрөвдөхдөө ял аваасай гэж боддоггүй байсан. Харин сүүлийн үед тэгж бодохоо больчихсон. Монголчууд уужуу сэтгэлтэй. Эр нэг алдаа л биз, эрэг нэг хоёр нураа л биз гэсэн сэтгэлээр ханддаг.
Тэр хүмүүс ингэж ор үндэсгүй худал мэлзэж арьсаа хамгаалж ядаж байхаар үнэнээ хэлээд гэм буруугаа хүлээсэн бол олон хүмүүс уучлах байсан байх. Манай төрийн тэргүүн нэг үгийг хэлдэг, хууль дуудаад байхад ирэхгүй бол хууль өөрөө чам дээр очдог юмаа гэж. Хамгийн гол нь хууль нотлох баримтаар л явна.
-Энхмөнх өнөөдрийг хүртэл таниас ямар нэг байдлаар уучлал гуйсан уу?
-Үгүй. Эхнэр нь, ээж нь, өмгөөлөгч нь ч тэр, уулзья, тохиръё гэж байсан болохоос уучлаарай, үнэхээр бид нарын буруу гэж нэг ч удаа хэлээгүй. Энэ бол миний хамгийн гомдож байгаа зүйл. Дээр нь үйлдлээр гутаачихаад араас нь ингэж гүтгэж гүжирдэж байгаа нь дахин дахин гомдмоор.
Би хүнийхээ хувьд өрөвч зөөлөн хүн. Тэр хүмүүсийн залуу насны хохирогч нь би болсон ч гэсэн чин сэтгэлээсээ гэм буруугаа ухаарч надаас уучлал хүсвэл би өөдөөс нь нулимах хахир хатуу хүн биш.
-Тэр хүн чин сэтгэлээсээ уучлал гуйвал та бас нэг юм бодоод өргөдлөө татаж магад. Би зөв таасан уу?
-Ийм хэрэг дээр өргөдлөө татахгүй ээ, хууль нь ч тийм. Гэхдээ тэр хүн надаас уучлалт гуйвал шүүх хурал дээр хэрэг болно. Ядахдаа тэнсэн өгөх ч юмуу. Гэхдээ би хуулийн байгуулагын шийдвэрийн дур зоргоороо таах эрхгүй шүү дээ.
Тэр хүнийг би нэг ч удаа баривчлуулъя, хориулья,хоёр хүүхдийг нь хохирооё гэж бодож тийм хүсэлт ч өгч байгаагүй.
Гэтэл цагдаагийн гадаа эхнэр нь хүртэл ирчихсэн цамнаад, би эхнэрийг нь үнэхээр өрөвдсөн. Тэнэг нөхрөөсөө болоод ийм байдалд орчихсон тэр эмэгтэйн буруу биш л дээ. Уг нь ухаантай эхнэр байсан бол миний нөхрийн буруу, уучлаарай гэсэн бол байдал өөрөөр эргэх ч байсан юм билүү.
Гэтэл эхнэр нь миний эсрэг байж боломгүй гүтгэлэг гаргасан. Тийм учраас л би гомдоод байгаа. Хэдий би бие, сэтгэлээрээ доромжлуулсан ч гэлээ хүн ёсоор харьцвал өөр. Индрагийн хувьд ч гэсэн тийм. Би,“Чи залруул аа, олон жил нөхөрлөсний хувьд чамайг шорон оронд оруулмааргүй байна” гэсэн.
Яагаад гэвэл энэ чинь эрүүгийн гэмт хэрэг. Эрүү үүсгэгдэж байсан гэдэг насаараа хар толботой үлдэж байна гэсэн үг. Ноцтой ш дээ. Хэн дуртай ньөргөдөл өгөөд хэн нэгэнд эрүү үүсчихдэг юм биш. Хянана, нягтлана, баримтуудыг детальчилж судалсны үндсэн дээр эрүү үүсдэг. Нэгэнт эрүү үүссэн бол ял авсан ч, аваагүй ч хар толбо төдийгүй гэмтэй байсан нь үнэн л гэсэн үг.
Тийм учраас би Индратай удаан хугацаанд хэл ам хийсэн ч тэвчиж, хүлээж байсан. Бүх юм миний талд,баримтуудтайгаа байдаг. Цагдаа хүртэл гайхаж байгаа юм, ээж рүү нь утасдахаар, та нар юу юм, би дээгүүр нь ярьчихна гэдэг гэсэн. Энэ хүмүүс ер гэм буруугаа хүлээхгүй хүмүүс байна гэж байсан.
-Ингэхэд твиттерт яагаад таныг хүмүүс өдөөд хэрэлдээд байдаг юм бэ? Та ч хариуг нь залхахгүй өгөх юмаа, ёстой сэлэм эргүүлээд л?
- Энхмөнх тэр хоёр тохиролцож, намайг байхгүй болгохоор маш их зүйл хийлээ. Надад сэтгүүлч найзууд байна, наадахыг чинь ёстой будаа болгоод өгье гэж ярьсныг би хүнээс сонссон. Тэгээд нөгөөх нь /Энхмөнх/ 10 сая төгрөг өгсөн гэнэ. Үүнийг би цагдаагийн байгууллагад нотолж чадахгүй, хүнээс сонссон, нөгөө хүн маань ч гэрчилж чадахгүй. Гэхдээ тэр хүний байр байдал, үг үйлдлийн зөрүү, сэтгэлзүйн байдал, хүмүүсийн харилцааны нөлөөлөл бүгд нийлээд логикийн хувьд гараад ирнэ л дээ. Ийм зохион байгуулалттай гүтгэлэгт итгэсэн хүн маш олон байна.
Надад гэм байхгүй учир би олон нийтээс нуугддаггүй. Твиттер бол хэн нэгэнд шууд хандаж болдог орчин. Бид өнөөдөр төрийн тэргүүн, их хурлын гишүүд, урлаг соёлын одууд гээд хэн хүссэнтэйгээ твиттерт шууд харьцаж чадна. Миний хувьд од мод хүн биш л дээ, гэхдээ мэдээж олны танил байх. Твиттерт би 28500 гаруй дагагчтай. Тэр дунд чинь бас бяцхан өрсөлдөөн бий. Дагагчаараа өрсөлдөнө, дагагч цуглуулах гэж олны танил хүмүүстэй бичилцэж анхаарал татна, зарим нэг нь скандал үүсгэнэ гэх мэт. Дийлэнх нь зөв бодолтой хүмүүс байдаг.
Твиттерийнхэндээ би дуртай, нэг ёсондоо тэдний олонх нь миний оюун санаа, зүрх сэтгэлийн дотно хүмүүс. Гэтэл зарим нэг намайг бусдын гүтгэлэгийн хэмжээнд ойлгодог хүмүүс санаатай санаагүй үйлдэл үзүүлнэ. Дээр хэлснээр олон л шалтгаантай байдаг байх. Тэр аймар дайралтуудад тэсч чаддаггүй нь миний сул тал.
Гэхдээ твиттерт хүнтэй маргаж үзээгүй жиргээч байхгүй байх. Надад олон хүн хэлдэг, чи жоохон тэвчээртэй ханд, илтэд чамайг өдөөн хатгаж байхад чи хариуг нь өгч байж салах юм гэж. Би шүүмжлэлийг хүлээж авна.
Гэхдээ миний дотор орж үзээгүйгээс хойш гүтгүүлэхийн аймшгийг над шиг мэдрэх хүн ховор. Цаг хугацаа тэдэнд намайг хэн гэдгийг ойлгуулах биз гэж боддог. Гэхдээ надтай жиргээний топууд ч гэх юмуу арай нэг дорвитойхон хэсэг нь муухай хандаж байгаагүй ээ.
-Ингэхэд нөхрөө тодорхой хэмжээгээр танилцуулаач? Төрд өндөр алба хашдаг хүн гэж дуулсан.
-Манай нөхөр Европын холбооны улсад 10 жил сурч ажиллаад ирсэн хүн байдаг. Анх танилцахад би яг гадаад хүнтэй танилцсан юм шиг байдаг байсан. Бид 2 хэн хэнийхээ анхны амьдрал. Залуу гэр бүлийн л адил муутай сайнтай олон жилийг хамтдаа туулж байна. Бүх зүйлд үнэний талд байдаг төлөв төвшин зөв хүн. Манай нөхрийн зүгээс өөлөх өө бараг байдаггүй. Одоо төрд ажилладаг, яг юу хийдгийг нь тодорхой хэлмээргүй байна. Ухаантай, зарчимч, ёс зүйтэй шударга хүн, маш сайн аав, жинхэнэ эр хүн гэж би хүндэлдэг.
-Энхмөнх ч нөхрийн чинь талаар мэдэх үү?
-Мэддэг байх гэж бодож байна.
-Айдаг болов уу?
-Айдаг байх. Мэдсэнээсээ хойш ер нь дайралт үзүүлээгүй. Эхнэр нь л Индратай нийлж дайраад байдаг шиг байгаа юм. Нөхөр маань тэнэг хүнтэй ухаантай аргаар харьцдаггүй юм гэдэг. Энэ хэрэг явдал болохоос өмнө бид төрийн өндөрлөгийн арга хэмжээнүүдэд хамт уригддаг, очдог байсан. Сүүлийн хоёр жил ямар ч хүлээн авалтанд очсонгүй.
Хэрэг бүрэн шийдэгдэж дуустал хүмүүст харагдмааргүй байна. Буруу ойлгоод байгаа нь тэр хүмүүсийн буруу биш. Нэгмөсөн шийдэгдсэний дараа нэр төрөө сэргээлгэж аваад олны өмнө гарна гэж бодож байгаа. Бид хоёр гэр дотроо халуун дулаан уур амьсгалтай энгийн нэг өрх айл.
Энэ амьдралдаа их талархаж явдаг. Бидний ах дүү найз нөхөд гээд маш олон сайхан хүмүүс байдаг. Тэр бүгдийнхээ нэр төрийг ч гэсэн бид хүндэлж байна.
-Хэрэг яг одоо ямар шатандаа явна вэ? Овоо сунжирсан байна шүү?
-Энэ төрлийн хэргийн хөөн хэлэлцэх хугацаа 5-8 жил байдаг. Тэр хүртлээ явна гэж байхгүй байх.Цагдаагийн байгууллагаас яллах нь зөв юм гээд дөрвийн дөрвөн удаагийн яллах дүгнэлт гарчихсан байгаа.
Сүүлийн дүгнэлтэн дээрээ бүр “Нотлогдсон байх тул ... гээд яллах дүгнэлттэйгээр хэргийг прокурорт шилжүүлэв” гэчихсэн байгаа. Прокурорын зүгээс энэ хэрэгт анхнаасаа ашиг сонирхлын зөрчилтэй хандсан. Ардын хүүхэд бол өнөөдөр аль хэдийнэ аавын хаалга татчихсан байгаа.
Гэтэл тэр мөнгөтэй хүний хүүхэд учраас аргалаад байгаад байна. Наадмын өмнө хэргийг улсын прокуророос хаалаа гэсэн мэдээ явуулсан. Тэр бол захиалгат худал мэдээ. Хэрэг одоо шүүхийн шатанд яваа. Энхмөнх оргосон ч юмуу лав АНУ-д байгаа юм билээ. Ирэхээр нь хэргийг шүүх байх. Би бас дэлгэрэнгүй ярьж болох болохгүйг мэдэхгүй байна.
-Хоёулаа баахан хэрэг төвөг ярилаа. Та “Үргээлэг” кинонд тоглосон байсан. Энэ талаараа яриач?
-Энэ нэг мангар хүүхэн ямар ч үүрэг, рольгүй юугаа хийж энд яваа юм гээд биччихсэн байсан/инээв/. Амараагийн хувьд мундаг жүжигчин. Бид эртний энгийн сайхан харилцаатай найзууд.
Амараа нэг өдөр найз аа,“Үргээлэг” гээд кино хийж байгаа, найруулагч мааньхоёр гоё эмэгтэй гаргана гээд байгаа юм. Нэг нь бааранд суух юм, орос гоё эмэгтэй. Нөгөө нь кино эхлэхэд сор болж гарна. Чи орчих” гээд. Тэгээд Амараагийн найз гэж хэлэлгүй Сэнгээ найруулагч дээр очиж пробонд орсон. Амарааг би хэлчихсэн юм байх гэсэн чинь үгүй байсан.
Сэнгээ найруулагчид би таалагдсан. Амараа Холливудад гарсан анхны чадварлаг жүжигчин. Эхнэр нь ч тэр маш сайхан бүсгүй байдаг. Би тийм найзтайдаа бахархдаг, мөн би Амараад надад энэ шилдэг бүтээлд дүрээ мөнхлөх болмж олгосонд нь талархдаг. Үргээлэг кино Монголын шилдэг болоод зогсохгүй одоо Канын кино наадамд орох юм гэсэн.
Үргээлэгээс хойш би өмнө нь гэрээтэй байсан нэг рекламанд л тоглосон. Цаашид надад кино, рекламны санал ирвэл татгалзахгүй. Кино урлаг гэдэг маш өндөр босго байдаг. Надад ийм том боломжийг бий болгож өгсөн хүмүүсийг би гайхалтай сайн яваасай гэж үргэлж залбирдаг.
-Та бас загвар өмсөж байсан гэсэн, Гоёл зэрэг загварын томоохон шоу наадамд бас ордог байх?
-2006 онд “Монголжингоо” миссийн тэмцээнд оролцож 3-р байр эзэлж байсан. Тэр үеэс загвар өмсөж эхэлсэн. Топ модель Ариунбилэгтэй хамт орж байсан болохоор бид нэг үеийнх гэж болно. Гэхдээ би загвараараа тууштай яваагүй. Манай нөхөр миний загварын карьерын тал дээр тийм ч таатай байгаагүй. Тиймээс би тэр үедээ амьдралаа сонгосон гэх юмуу даа.
Гоёл наадамд моделиудыг өндөр шалгуураар шилж авч оруулдаг. Би Гоёл наадам орж байсан. Би Шилмэл загварынханд, мөн Оюунцэцэг захирал, Монголын дизайнеруудын холбооны Байгалаа багш нартаа талархаж явдаг. Урлагын салбар олны нүдэн дээр байдаг гэдэг утгаараа маш их хэл амтай. Гэвч эдгээр хүмүүстэр бүхнийг даван туулж оргилд хүрсэн гэгээлэг хүмүүс.
-Нээрээ таны бөөгийн өмсгөлтэй зураг байсан. Та бөө юмуу?
-Тэр талаар дэлгэрэнгүй ярих би дургүй, шашин шүтэх эс шүтэх нь миний үндсэн эрх. Дээрх хэргээс хэзээ хойно би бөө мөргөлтөн болсон. Бөө мөргөл бол агуу зүйл. Хэн дуртай нь ярих юм биш. Бөө мөргөл зөв замдаа орж олон нийтэд зөв ойголт бий болсон хойно би энэ талаараа ярьж болно. Би бөө мөргөлч мөн, гэхдээ би хараалч хүн биш. Харгүй сэтгэлээр тэнгэрт сүсэглэдэг хүн.
-Одоо та буудаг уу?
-Буулгадаг.
-Хүн үзэх үү?
-Хүмүүс үзнэ, ирнэ. Яахав зүгээр эхний хэдэн жилдээ зарчмаараа зөв залагдаж байгаа бөө хүмүүст сайн юм л хийх ёстой.
-Нууц биш бол та ямар талын сахиустай вэ?
-Харын сахиустай. Надтай муудалцсан хүмүүс сайнаа үздэггүй. Энэ нь би хараагаад байгаа гэсэн үг биш, миний тэнгэр, сахиус гэж нэг юм байна ш дээ, бурхан, тэнгэр сайн мууг цаагуураа айхтар ялгаж, салгаж, ял, шийтгэлийг нь өгч байдаг юм.
Тэрнээс би хүнд муу санадаггүй, тэр байтугай би амьдралдаа нэг ч удаа бусдад атаархаж үзээгүй. Зарим хүмүүс намайг чи одоо бөө болсон юм чинь тэр хүмүүсийг хараагаач гээд л хэлдэг юм. Тийм шаардлага байхгүй, тэнгэрээр оролдох энгийн зүйл биш. Т
эр хүмүүс аяндаа үйлийн үрээ эдэлнэ. Тэрийг нь л би мэдэж байгаа нь надад хангалттай. Бусдын бузарт би наалдах албагүй. Сайн сайхан үйлээ хийгээд явах нь надад буянтай.
-Шулуухан асуучихад тэр хүмүүст таны онгод нөлөөлсөн болов уу?
- Энэ сэдвийг ойлгох ойлгохгүй хүн олон бий. Тиймээс би нээх ярих дургүй. Манай буурай /онгодоо хэлэв. сэт./ мэдээж ямар ч үйл хийж болно. Би зовж шаналахдаа асууна.
Прокурорыг асуухаар зоос аваад л ингэчихлээ, үйлээ эдэлнэ дээ гэнэ. Үйл нь байхад яана даа, миний балчирт хүрэхгүй дээ, тэр зүгээс хараал хийгээд байна, тэрийг нь дарлаа гэсэн л юм ярина. Тэрнээс биш буурай нь тэрийг тэгнэ, тэд нарыг зовооно гэдэггүй юм.
Ер нь хэн нэгэнд муу юм хийнэ гэдэг хэзээ нэгэн цагт чухам өөрөө л түүнийхээ үйлийг эдэлж, лай ланчгийг үүрэх ганцхан гарцтай шүү дээ. Тийм учраас би бөө гээд хэн нэгэнд хараал хийдэггүй.
Над руу ирсэн зүйлийг харин ч нэг жинтэйхэн буцаана шүү. Би хэнээс ч амь, амьдралгуйгаагүй. Тийм байхад тэр хүмүүс миний амь амьдралыг бусниулна гэдэг чинь юу гэсэн үг вэ?
-Уучлаарай мэдээж тэр үеийг мартахыг хичээж байгаа байх. Таныг хүн явуулж сүрдүүлэх мэтээр дарамт ирж байв уу?
-Намайг хүн дагаж, дарамталж байсан. Мессэжээр бол бүр аймаар аймаар юм бичиж байсан. Энхмөнхийн эхнэр бол ертөнцийн хамгийн тэнэг хүүхэн гэж би хэлнэ. Миний нөхөр хэн нэгэн эмэгтэйг гомдоочихсон бол би нөхрөө буруутгана. Гэтэл тэр үгүй шүү.
Энэ хэрэгт холбогдсоноос хойш хуулийн талаар ч гайгүй мэдлэгтэй боллоо. Амьдралын минь нугачаанд тохиолдсон зүйл бусдад хэрэг болох байх гэсэн үүднээс ном бичиж байна. Эмэгтэй хүн бүр амьдралдаа нэгээс дээш удаа хүчирхийлэлд заавал өртдөг гэсэн судалгаа байна. Гол нь үүнийг даван туулах, ард нь гарах сэтгэлийн тэнхээ, хат, ухаан маш чухал юм билээ.
Хүн ч тэгээд зовлон даадаг юм байна даа. Эргээд босох хүч зөвхөн хүчирхэг эмэгтэйд байдаг юм. Тийм байхыг хичээнээ. Би бусдын хууль бус үйлдлийн хохирогч болж нийгэмд яг өөрөө хэрэгтэн шиг цоллуулах үе бишгүй л байлаа. Тэр бүхнийг даван туулж ирээдүйд энэ төрлийн гэмт хэрэг үйлдэгдэхээс сэрийлэх тал дээр нийгмийн хүрээнд чиглэсэн ажлуудыг хийж байна гэж бодож байгаа.
Нэг хэсэг маш хүнд байдалд байх үедээ би амиа хорлох гэж оролдож байсан /уйлав/. Тийм хүнд үе байсан учраас бусад хүмүүсийг надтай адилхан зовоосой гэж хүсэхгүй байна.
-Тэр хүнд үеийг давахад танд хамгийн их тус болсон зүйл юу байсан бэ?
-Өөрийгөө үнэлэх үнэлэмж. Хүн өөрийгөө голоод, зүхээд эхлэхээрээ ёстой дуусдаг юм байна лээ. Яг нэг тийм үед би очсон ч даван туулж чадсан /уйлав/
Энэхүү ярилцлагыг өнгөрөгч 11 дүгээр сард хохирогчтой уулзаж авсан юм. Бид энэ хэргийн талаар өмнө нь нэг ч удаа мэдээлээгүй байсан ба бодит үнэнийг зөвхөн хохирогчийн амнаас сонсон уншигчдад дуулгах гэсэн мэргэжлийн эрэл байлаа. Ярилцлага авах санал тавиад багагүй хугацаанд хүлээсний эцэст Г.Дэлгэрмаа манайд ярилцлага өгөхийг зөвшөөрсөн. “Гранд” сэтгүүлд гарсан ярилцлагыг та бүхэнд хүргэж байна.
Г.Дэлгэрмаа өөрөө хүчирхийллийг биеэр амсаж, мэдэрсэн тул 4 настай охин амиа алдахад “Цагаан цуглаан” зохион байгуулж, мөн төрсөн өдрөөрөө хандивын үйл ажиллагаа явуулснаар уншигчид эчнээ мэдэх болсон. Нийслэлийн 10-р цэцэрлэг, 3-р төрөхөд тэр нийт 5 сая төгрөгтэй тэнцэхүйц эд зүйлсийг хүлээлгэж өгсөн нь олны талархлыг ихэд хүлээсэн.
Хоёр жилийн турш сунжирсан хэрэг, цацагдсан мэдээллийн дүнд бидэнд хамгийн ойр юм шиг атлаа сайн танихгүй хүний үнэн төрхийг бид нээлээ.
“Гранд” сэтгүүлд нийтлэгдсэн ярилцлагыг хохирогчийн зөвшөөрөлтэйгөөр та бүхэнд хүргэж байгаа бөгөөд нэмэлт хачир засвар хийгээгүй болно.
Хэрэг шалгагдаж байгаа эгзэгтэй үед ярилцлага авснаас хойш багагүй хугацаа өнгөрсөн тул цаг хугацааны хувьд алдагдсан зүйлс байхыг үгүйсгэхгүй. Бодит үнэнийг шүүх нь хүмүүний, сэтгүүлчийн хэрэг биш билээ. Бид зөвхөн мэдээлэх, холбох үүрэг хүлээж буйг уншигч та бүхэн мэргэн оюундаа таалан болгооно уу.
Хэвлэл мэдээлэл 4 дэх засаглал гэдэг утгаараа хохирогч, ялагч, яллагч хэнбугайн ч үгийг цензургүй сонсох, олон нийтэд түгээх үүрэгтэй билээ.
эх сурвалж:Гранд сэтгүүл №/01/54/
Ярилцсан У.Цахирмаа
Сэтгэгдэл (58)