МУГЖ, Зууны манлай эстрадын дуучин Б.Сарантуяа “Сэхүүн салхи” нэртэй төрсөн өдрийн ес дэх уран бүтээлийн тоглолтоо хийх гэж байгаатай холбогдуулан сэтгүүлчдэд мэдээлэл өглөө. “Сэхүүн салхи” тоглолтын ерөнхий зохион байгуулагчаар Apple продакшн ажиллаж байгаа бөгөөд Random хамтлаг, Олонхи хамтлаг, Үндэсний дуу бүжгийн эрдмийн чуулга, ая зохиогч, продюсер Б.Ангирмаа, дуучин Ө.Хишигжаргал, Л.Насанбуян нар орлцох юм байна.
Хэвлэлийн хурлын үеэр МУГЖ, дуучин Б.Сарантуяатай цөөн хором хөөрөлдсөнөө хүргэж байна.
- Та төрсөн өдрийн тоглолтоо “Сэхүүн салхи” хэмээх өөрийн уран бүтээлээрээ нэрлэжээ. Дууг тань сонсдог, бишрэн хайрладаг фенийн нүдээр харахад энэ нэр таны нэгэн илэрхийлэл мэт санагдаж байна. Та эрч хүчтэй, сэхүүн салхи шиг ихэмсэг, бардам, хэнэггүйхэн байх тэр мэдрэмжээсээ өөртөө ямар гайхамшигийг нээдэг бэ?
- Сайхан асуулт байна. Эрт босвол нэгийг дуулна гэсэн үг байдаг даа. Би тэр зарчмаар эрт унтаж, эрт босохыг эрхэмлэдэг. Өглөө эрт хүнд ямар их эрч хүч төрдөг гээч. Зөндөө олон уулзалт төлөвлөж, утасны дуудлагууд хийж болно. Энэ утгаараа би өөрөө их эрч хүчтэй байгаад эргэн тойрон дахь хүмүүстээ түүнийгээ хуваалцдаг. Тухайлбал, ажил олдохгүй байна гээд сууж байгаа нэгэнд “Чи зар худалдаад аваач” ч гэх юм уу, зар дээр нь “Чи ...ийм ийм давуу чанартай учраас энэ ажлууд чамд тохирно. Миний дугуйлсан ажлууд руу яриарай” ч гэх юм уу. Амьдрал их энгийн ш тээ. Сайхан торт хийдэг хүнийг ажил олгогчтой холбож өгөх жишээний. Энэ чинь зүгээр л бүтээлч байх урлаг. Бүтээлч байхыг би бусдад үлгэрлэн үзүүлж, зарим боломжуудыг нээхэд нь тусалж, тэр нь амьдралд хэрэгжиж буйг хараад би өөрөө түүнээсээ таашаал авдаг. Ер нь ямар ч зүйлийг сүртэй, тодорхой түвшинд амилуулж, бүтээлч байдлаар хийж байж л үр дүн гардаг.
Би өөрөө ч тэгж ажиллах дуртай. Хоосон газраас юм бүтээж амьдардаг байсан үе бий ш тээ. Залуу байхад зүв зүгээр гал зууханд сууж байгаад бид мөнгө босгоод тоглолт хийж л байсан. Өнөөдрийн зүгээс харахад би олон жилийн туршид тасралтгүй хөдөлмөрлөж, байнгын уран бүтээлийн эрэл хайгуулаар өөрийгөө хурцалж зүтгэсээр Сараа гэдэг брэндийг бүтээж чадсан байна. Энэ бүхэн эргээд хүмүүс надад итгэх итгэлийн үндэс болдог. Энэ бол миний өөртөө нээсэн бас нэг том амжил, гайхамшиг гэж бодож байна.
- “Од юм бол од шиг бай” гэж сэтгүүлч Б.Ганчимэг хэлсэн нь бий. Та поп дива дуучны хувиар Монгол улсдаа “Од” шиг амьдарч чадаж байна уу?
- Юуны өмнө би “Од”-ын хэмжээнд орлоготой байж чаддаггүй, уучлаарай. Орлогоороо сайхан амьдарч чадаж байгаа гэвэл бас л үгүй. Гэхдээ Монголын зах зээл бага байна, гадагш гармаар байна гэж үглээд доллар, евро хөөцөлдөөд явж чадахгүй ээ. Зуугийн талыг насалсан уран бүтээлчид хүртэл ингэж үглэдэг. Би тийм амны хишиггүй юм ярихгүй. Миний тал цусаар якут цус гүйж байгаа хэдий ч би Монголдоо уран бүтээлээ туурвин амьдарч байгаадаа сэтгэл хангалуун байдаг.
Нөгөө талаас Монголын ард түмэн хаана ч очсон намайг одын хэмжээнд хүлээн авч хүндэлсээр ирсэн. Монгол улсын ерөнхийлөгч, намын даргуудаасаа өгсүүлээд жирийн малчин өрх, “Нарантуул” зах дээр очсон ч би “Од”-ын ёсоор хүндлэгддэг. “Чамайг хэн од гэдэг юм” гэх үгийг би хаанаас ч, хэнээс ч сонсож байгаагүй. Эцсийн дүндээ баруунд очиж, их мөнгө олон, папарациуддаа баригдаад, тунель мөргөөд үхэхийн хэрэг юу байна. Миний фенүүд намайг өдөр шөнөгүй дагаад болзоонд ч явуулахгүй байгаа юм алга, гадны алдарт дуучид руу фенүүд нь дайраад хувцас хунрыг нь урж, биед нь халдаж байхад би олныхоо дунд хүндлэгдээд, амар амгалан явж байдаг. Энэ чинь л сайхан байхгүй юу. Тийм учраас би “Од”-ын хэмжээнд амьдарч чадаж байгаа. Монгол түмэн минь намайг “Од” хэмжээнд хүлээн авдаг.
- Таны амьдралыг уран бүтээл, тайзгүйгээр төсөөлөхийн аргагүй. Хэрвээ тооцож үзэж байсан бол та амьдралынхаа нийт хичнээн цагийг тайзан дээр өнгөрүүлсэн бэ?
- Би уран бүтээл хийсэн цагаасаа хойш нийт 195 бие даасан уран бүтээлийн тоглолт хийсэн байна лээ. Нэг удаагийн тоглолтыг багадаа хоёр цагаар тооцлоо гэхэд нийт 390 цаг. Энэ харин ч бага тоо. Зөвхөн бие даасан тоглолтын цаг шүү дээ. Түүний хажуугаар жижиг тоглолт, дуулж болох бүхий л тайзан дээр өнгөрүүлсэн цагаа тооцоогүй байгаа.
- Сараа амьдралаа л дуулдаг гэх нь бий. Уран бүтээлүүд дундаасаа өөрийг тань хамгийн ихээр илэрхийлдэг дуу гэвэл та алийг нь онцлох вэ? Ер нь амьдралаа дуулж байсан тохиолдол хэдээр тоологдох бол?
- “Сэтгэл буруугүй” дуугаа хамгийн түрүүнд онцлох юм байна. Тухайн үед би охиноо төрүүлээд удаагүй байлаа. МУСГЗ, хөгжмийн зохиолч Л.Балхжав ах нэг ая хийгээд, яруу найрагч Р.Эмүжингээр шүлгийг нь бичүүлэхээр болсон юм. Р.Эмүжиний гэрт очиход эмнэлэгт хэвтсэн хүн эргэхээд мах чанаад байж байлаа. Би түүнд “буцах шувууд, намар налгар байдлыг зураглаад” гэхчлэн аялж өгч билээ. Гэтэл дууны шүлэг бүтээд, үгийг нь сонстол,
Намрын өнгөөр хайлаас шаргалтлаа
Намайг гэсэн сэтгэл буруугүй гээд л яг миний охины аавд зориулагдсан дуу юм шиг санагдсан. Мэдээж би Р.Эмүжинд миний охины аавд зориулаад шүлэг бич гэж хэлээгүй л дээ. “Сэтгэл буруугүй” дууны клип маань ч тэр, төрөөд удаагүй нялх биетэй дүр төрх минь мөнхлөгдөн үлдсэн гэх утгаараа охиныхоо аавыг л дуулсан юм шиг санагддаг.
Дараачийн дуу бол “Тэр намайг дурсдаг болов уу”. Нээрээ л хүн сайхан учралуудынхаа ард намайг сайхнаар л дурсаасай гэж боддог юм билээ. Миний амьдарлын тодорхой нэг мөчлөгүүдийг илэрхийлсэн дуу юм.
- Уран бүтээлийн тоглолтууд мэдээж өөр өөрийн онцлогоо илэрхийлсэн хувцаслалт, имижийн бүрдүүлэлтэй байдаг. Гэхдээ танд нэг л өмсүүртэй, тоглолт бүр дээрээ өмсөөд гарчихмаар санагддаг “амины” хувцас байдаг уу?
- Тийм хувцас нээрээ байгаа шүү. Анх “Хайрламаар” тоглолтон дээрээ өмсөж байсан гялгар рок хувцас. Харангынхантай дуулахад бас нэлээд өмссөн. Лакан хувцастай, лакан малгайтай Сараа аль эрт “Мөнгөн харандаа” хамтлагт дуулах үед л бий болсон. Тэр имижиндээ би үнэхээр их хайртай. Яг энэ утгаараа тэр хувцсаа ямар ч тоглолтон дээр өмсөөд гарсан намайг дур булаам харагдуулдаг. Эмэгтэй хүнд таргалах, бага зэрэг галбираа алдах үеүд гарна ш тээ. Тэр болгонд хар лакан хувцас маань ямагт сайхан харагдуулсаар ирсэн дээ.
- Ярилцсанд баярлалаа.
Эх сурвалж: www.grandnews.mn
Сэтгэгдэл (41)