Энэ өдрүүдэд монголчуудыг хамгийн ихээр баярлуулж, огшоож байгаа явдал бол Дархан аварга Ж.Мөнхбатын хүү Хакухо М.Даваажаргал сумогийн рекорд амжилтыг эвдэж, эх орныхоо нэрийг арлын оронд цуурайтуулж буй явдал. Сумогийн түүхэн том амжилтыг эвдсэн түүнд Хөдөлмөрийн баатар цол тэмдэг олгохоор Ерөнхийлөгч зарлиг буулгаж, Хакухо эх орондоо газардлаа. Түүнийг их сумод бие балчир, туранхай гэдэг шалтгаанаар тэнцэхгүй, нутаг буцах гэж байхад нь анхны монгол сумоч, эрхэм гишүүн Б.Батбаяр тусалж, энэ их ертөнцөд хөтлөн оруулсан түүхтэй. Тийм ч учраас Хакухог угтан авах ёслолын үеэр Д.Батбаяр, Т.Баясгалан нараас цөөн асуултад хариулт авлаа.
-Анх Хакүхог сумод хөтөлж оруулж байсан дурсамжаасаа хуваалцаач?
-Хакухогийн аав Ж.Мөнхбат аварга манай аав хоёр дотны найзууд. Аав маань Хакухог дагуулж ирээд надтай танилцуулж, би Япон руу авч явж байсан. Тухайн үед зургаан хүүхэд дагуулж яваад хоёр сар бэлтгэл хийлгээд Японд үлдэх үү, үгүй юу гэдэг нь шийдэгдэх ёстой байсан. Гэтэл зургаан хүүхдээс тавыг нь багш болон сургуулиуд шилж авахад ганцхан Хакухог үлдээчихсэн байсан.
Туранхай, жижигхэн биетэй болохоор нь тэгж голж байхгүй юу. Тэгээд маргааш нь аав ээж хоёртоо жоохон бэлэг авчихсан, Монгол руугаа буцлаа гээд байж байхад азаар үлдэж байлаа. Яг буцахынх нь урьд өдөр “Таван богд” группийн ерөнхийлөгч Ц.Баатарсайхан, манай захирал бид гурав хоолонд орсон юм. Бага зэргийг халаалттай болоод ч тэр үү, захиралдаа Хакухогийн талаар хэллээ. Аав нь аварга олимпод оролцож байсан удамтай айлын хүүхэд гэхэд Хакухог харах ч үгүй сургуульдаа авч байсан. Дараа нь Кёкүшюзанд хулхидуулчихлаа гэх захиралуудынх нь яриа чихэнд дуулдахад хоёр улсын хооронд сэв суучих вий гэж их эмээж байлаа. Тиймдээ ч сургуулийнх нь удирдлагуудтай уулзахгүй зугтаад яваад байсан. Гэвч зургаан сарын дараа Хакухо амжилт үзүүлж, захирлууд нь баярласнаа илэрхийлж, гар барьж уулзаж байлаа.
- Тун ч адармаатай зам туулж сумод орсон байх нь?
- Хэцүү байлгүй яахав. Хэцүү байхаас гэднэ монголчуудыг Япончууд мэддэггүй байсан үе. Одоо бол Монгол гэвэл мэдэхгүй Япон хүн ганц ч байхгүй.
-Тухайн үед ийм цуутай том аварга болно гэж та ч бодож байгаагүй биз?
-Би аварга болно чинээ бодож байгаагүй, яг үнэндээ. Жижигхэн биетэй байсан болохоор бэртэж гэмтчихгүйхэн шиг цол авчихаасай билээ л гэж бодож байлаа. Сургууль болоод багш нар нь бүгд голж байсан. Маргааш нь буцах гэж байгаа хүүхэд азаар үлдээд өнөөдөр дэлхийн рекордыг эвдлээ. Сумогийн ертөнцөд гологдоод буцах гэж байсан хүү өнөөдөр аварга болох болохдоо хамгийн дээд рекордыг эвдэнэ гэдэг. Одоо ерөнхийлөгчийн зарлигаар Хөдөлмөрийн баатар болох гээд ирж байна. Дүүдээ ахын хувьд ч тэр, сумо бөхийн ерөнхийлөгчийн хувьд ч тэр, анх хөтөлж оруулсан хүний хувьд ч тэр, маш их талархаж байна.
МУГЖ Т.Баясгалан
-Гэр бүлээрээ Их аваргыг хүлээж авч байна. Сэтгэгдлээсээ хуваалцаач?
-Сайхан байна. Их аваргын сүүлийн барилдаан дээр манайх гэр бүлээрээ очиж дэмжсэн. Ахаараа хөтлүүлээд Японы сумогийн түүхэнд дээд амжилт үзүүлж ингээд эх орондоо ирж байгаад нь мэдээж хэрэг баяртай байна. МУ-ын Ерөнхийлөгчийн зарлигаар Хөдөлмөрийн баатар болж байгаад нь мөн баяртай байна. Монгол залуу эх орныхоо нэрийг дэлхийд цуурайтууллаа. Их аварга Хакуходоо араасаа олон арван аварга төрүүлээрэй гэж хүсье.
Эх сурвалж: www.grandnews.mn
Сэтгэгдэл (28)