Гал цог, эрч хүчээрээ фэнүүдээ байлдан дагуулдаг МУГЖ Т.Ариунааг “Скандал” буландаа онцолсон юм. Тавь дөхөж яваа хэдий ч, тэр тийм нэг асч дүрэлзсэн мэт хэвээрээ. Залуу халуун явсан үеийнх шигээ “эрос” хэмээн дуудуулахаа больсон ч, тэр “скандал” дагуулсаар төдийгөөс өдийг хүрчээ.
Алтан дундын эзэн охин
Дуучин Т.Ариунаа багадаа тийм ч мундаг сурлагатай байгаагүй гэдэг. Онц сурдаггүй ч гэлээ түүнд уйгагүй оролдлого, хэзээ ч шантардаггүй зан чанар байжээ. Тэрийг нь ч бага ангийн багш нар нь анзаарч алтан дундын эзэн хөдөлмөрч, шаргуу Т.Ариунаа хэмээн нэрийддэг байсан гэнэ лээ. Энэ хичээл зүтгэлийнхээ хүчээр тэр Монголын нэртэй дуучдын тэргүүнд эгнээнд нэрээ бичүүлж чадсан ч биз. Сэтгүүлч, жүжигчин болох хүсэл сонирхолтой байсан Т.Ариунаа арван жилээ төгсөж сэтгүүлчийн ангид орох гэсэн боловч тэнцээгүй. Ийн сэтгүүлч болох мөрөөдөл нь талаар болсон тэрбээр жүжигчин болохоор шийдсэн гэдэг. Ингээд Драмын театрт жүжигчин болохоор шалгалт өгсөн ч мөн л тэнцээгүй. Гэвч тэр өөрт байдаг шаргуу зандаа хөтлүүлэн, дуучин болсон.
“Эрос” дуучны гараа
Болгарын хөгжмийн консерватурыг дуулаач мэргэжлээр дүүргэж эх орондоо ирэхэд нь рок попын ертөнцөд өөрийн гэсэн байр сууриа олчихсон үе тэнгийн эмэгтэй дуучид олон байсан. Өөрийн орон зайгаа тодорхойлчихсон эмэгтэй дуучдыг бут цохисон уран бүтээл хийж байж монголын рок попын ертөнцөд хүлээн зөвшөөрөгдөнө гэдгээ бүрэн ухаарсан залуу дуучин Т.Ариунаа “Эрос” гэдэг үгийг зоригтойгоор сонгож эрос гэдгээ ч баталж чадсан. Тэрбээр хурдан хугацаанд од, олны танил болохын тулд эротик имижийг сонгож өмссөн зүүснээрээ, хэлж ярьж байгаагаараа бусдаас ялгарч хүссэндээ хүрсэн.
Тэрбээр нэгэнтээ “Сексийг ямар ч нөхцөлд хийж чадна. Тэгэхдээ чухам хэнтэйгээ хийж байна гэдэг л чухал. Тэрнээс биш танихгүй баагийтай жорлонд секс хийж байвал утгагүй. Тэгэхээр би өөртөө таалагдсан хүнтэй хаана ч секс хийсэн сайхан байдаг” хэмээн хэвлэлд ярилцлага өгч тухайн үед сенсаацины эзэн жинхэнэ утгаар болж байсан. Тиймээс ч түүнийг “Эрос” хатагтай дуучин Т.Ариунаа гэдгээр нь монгол даяараа мэддэг, таньдаг болсон гэхэд хилсдэхгүй. Ийнхүү монголын рок попын ертөнцөд шинэ од, шинэ эрос хатагтай урилгагүйгээр орж ирсэн билээ. Удаа ч үгүй нүцэглэж дуулиан шуугианыг ар араас нь тарьсан тэрбээр нэг л мэдэхэд рок попын урлагт байр сууриа олж, өмнөх акулуудтай эн зэрэгцсэн байв.
Сараа & Ариунаа
Монголын рок попын ертөнцийг МУГЖ Б.Сарантуяа, МУГЖ Т.Ариунаа хоёргүйгээр хэн ч төсөөлөхгүй байх. Мөнхийн өрсөлдөгч нар байсаар ирсэн тэднийг үнэнч фэнүүд нь жинхэнэ утгаар нь өрсөлдүүлсээр ирсэн гэж болно. Тэгээд ч Ариунааг Сараагүйгээр, Сарааг Ариунаагүйгээр төсөөлөхөд тун бэрх байгаа биз. Магадгүй энэ хоёр хатагтай бие биенийгээ бий болгосон мөнхийн өрсөлдөгчид, түүхээ хамтдаа бичилцэж хамтдаа бичүүлэх ёстой алдарт дуучид гэдэгтэй хэн ч маргахгүй байх. Амьдрал болоод уран бүтээл дээр бие биенийгээ ирлэж, хурцалж ирсэн энэ хоёр хатагтай хоёулаа Монголын хүчтэй бүсгүйчүүдийн нэг.
Тэд юугаараа ялгаатай вэ гэхээр МУГЖ Т.Ариунаа жинхэнэ хөдөлмөрч, дайчин дуучин. Харин МУГЖ Б.Сарантуяа байгалиасаа заяагдмал, хүчирхэг хоолойтой төрмөл дуучин хэмээн урлагийн акулууд өөрсдийнхөөрөө үнэлж дүгнэцгээдэг. Ямартай ч тодотгон хэлэхэд тэд бие биенийгээ бүтээж төрүүлсэн жинхэнэ мөнхийн өрсөлдөгч нар мөнөөсөө мөн.
Анхны хайр хэзээ ч бүтдэггүй
Т.Ариунаа анхны хайраа Югославт үлдээснээр анхны хайр хэзээ ч бүтдэггүй гэдгийг биеэрээ мэдэрсэн. Тэрбээр анхны хайрынхаа тухай нэгэнтээ “Югославт байхдаа би Нино Бабич гэдэг Югослав залуутай үерхдэг байсан. Тэр жинхэнэ амраг байж чадсан. Надтай хамт бүх юмаараа амьдарч чаддаг хүн байсан. Ариунаа хэн бэ гэдгийг, бас өөрийгөө хэн бэ гэдгээ ч мэддэг байсан. Хэн хэн нь хүлээцтэй хандаж, буулт хийж чаддаг байлаа” хэмээн ярьсан байдаг. Анхны хайр, анхны амьдралаа харийн оронд үлдээсэн дуучин Т.Ариунаа харийн бэр болох дөхсөн ч, хувь тавилан түүнд өөр учралыг зэхээд байжээ.
Сенсаацитай амьдрал эхэлсэн нь
Монголын дуулиан шуугиантай хосууд нэгээр нэмэгдэж “Эрос” хатагтайн нөхрөөр сонгогдсон Д.Буяндоржийг тухайн үед хэн ч таньдаггүй байсан. Харин эрос эхнэрийнхээ ачаар тэр хэдхэн сарын дотор олны танил болж чадсан. Д.Буяндорж хөдөө амьдарч байсан жирийн нэг бизнесмэн залуу байсан гэдэг. Анх Т.Ариунааг Сэлэнгэ аймагт тоглолтоо хийхээр очиход найзынхаа шахалтаар тайзан дээр гарч тэвэр дүүрэн цэцгийн баглаа өгснөөр тэдний хайрын түүх эхэлсэн гэнэ лээ.
Ийнхүү өмнө нь гэр бүлтэй байсан Д.Буяндорж эрос хатагтайн наалинхай дуунд уярч эхнэр хүүхдээ орхин байж шинэ амьдрал эхлүүлснээр Монголын дуулиант хосын тоо нэгээр нэмэгджээ. Д.Буяндоржийн анхны эхнэр Ариунболор нь хартай, ааштай бүсгүй байсан бөгөөд дуучин Т.Ариунааг СТӨ-ний үүдэнд үсдэж авч, алгадсан гэх мэдээлэл сенсааци дэгдээж байлаа.
“Эрос” хатагтай ээж болов
Олны танил од болж өөрийн хүсэж мөрөөдөж явсан алдрын замналдаа хүрч явахдаа тэр хүний өөрийн нийлсэн хоёр хүүгийн ээж болсон юм. Анхны үрээ өлгийдөж аваад удаагүй байхдаа тэр хойд ээжийн үүргийг давхар биелүүлэх хариуцлага хүлээсэн гэдэг. Д.Буяндоржийн анхны эхнэрийн хүү буюу том хүү Алдар нь түүний бага хүүтэй хэдхэн насны зөрүүтэй бөгөөд өдгөө Т.Ариунааг ээж хэмээн дууддаг. Дэрсхэн өссөн хоёр хүүгээ адилхан эхийн хайраар хүмүүжүүлж өсгөсөн МУГЖ Т.Ариунаа эх хүн, ээж хүнийхээ үүргийг сайн биелүүлсэн гавьяатай нэгэн. Өдгөө хорь гарсан том хүү Алдар нь гавьяатыг яг л төрсөн ээж шигээ хайрлаж, хүндэлж явдаг гэсэн.
Хувь заяаныхаа эзэн байж чадсан
Монголын рок попын урлагт насаараа үнэнчээр хүчин зүтгэж дуучин гэх энэ нэрээ нэр төртэйгөөр үүрч яваа МУГЖ Т.Ариунаа 30 жил урлагийн тайзнаас буугаагүй. Тэр фэнүүдийнхээ өмнө үүргээ хамгийн сайн биелүүлсэн цөөхөн хэдэн дуучдын нэг. Тэр урлагаар амьдарч, урлагаар амьсгалж ирсэн. Тиймдээ ч тэр арилжааны дуучин биш үнэ цэнтэй тайлан тоглолт хийдэг дуучин. Тэр хувь заяаныхаа эзэн байж чадсан гэж болно. Яагаад гэхээр дуучин хүн ямар байх ёстойг утгаар нь харуулсан.
Гэвч МУГЖ Т.Ариунаа хүмүүнлэгийн үйл ажиллагааг тийм ч их дэмжиж байгаагүй нэгэн. Харин хүүхдүүдийн төлөө урлагийнханыг дуу хоолойгоо нийлүүлэхэд хүчин зүтгэсэн дуучин. “Ариун сэтгэл” сангаараа дамжуулан хэсэгтээ хүүхдүүдийн дуу хоолой болж явсан ч тэр гавьтай амжилт үзүүлээгүй намжсан. Гадаадын алдартай дуучид хүмүүнлэгийн үйлсэд гар бие оролцож үлдсэн амьдралаа хүмүүнлэг үйлсэд зориулж байгаа нь цөөнгүй. Харин манайд бол хандивын тоглолт хийхээс цаашилдаггүй уламжлалтай.
Дурлалын эрхтэнээс эхлээд өөрчилсөн нь
Мэс засал хийлгээгүй олны танил хүн тун цөөхөн үлдсэн биз. МУГЖ Т.Ариунаа хатагтай хүртэл косметик мэс засалд өвч ороод амжсан нэгэн. Дурлалын эрхтэн буюу хамраа хамгийн түрүүнд янзлуулсан Т.Ариунаа хатагтай үүгээр дуусаагүй мэс заслын ширээнээ хэд хэдэн удаа заларсан. Мэс засал хийлгэж төрөл арилжсан эрос хатагтай хамар, уруул, нүд, давхараа, шүд гээд өвч косметик засал хийлгэсэн одуудын тэргүүнд эгнээд явдаг нэгэн. Өдгөө 48 настай эрос хатагтай Т.Ариунаа үе тэнгийнхэн дундаа нэлээд овортой хэмээгддэг ч тэр насаараа гоолиг биендээ анхаарч ирсэн гэдэг.
Дуучин Т.Ариунаа гэж дуудагдаж ирсэн цагаасаа л таргалалттай тэмцэж ирсэн гэх тэрбээр хэзээ ч жин нэмсэн харагдаж байгаагүй. Мэдээж тэр урлагийн хүн гэсэндээ дээрээс нь фэнүүдийнхээ итгэлийг алдахгүй гэсэндээ насаараа хоолоо тохируулж жингээ барьж ирсэн байх. Мөн Т.Ариунаа нэг өмссөн хувцасаа хэзээ ч өмсдөггүй тогтсон уламжлалтай.
Тайзнаа ч тэр энгийн үед ч тэр тас тас инээж хавь ойрынхоо хүмүүсд инээд бэлэглэж байдаг эрос хатагтай дуучинаас гадна маш сайн бүжигчин мэргэжилтэй нэгэн. Түүний ихэнх дуунууд хөнгөн хөгжилтэй бүжгийн хэмнэлтэй. Үүгээрээ тэр бусад эмэгтэй дуучдаас ялгарч илүүрхдэг. Энэ нөгөө л нэг шаргуу зангийнх нь илрэл гэлтэй. Тэр дөч гарсан ч бүжиглэж дуулсаар эрч хүчтэй цоглог хатагтай хэвээр....
Үдэш бүр нойтон дэртэй хоносон хоног хугацаа
МУГЖ Т.Ариунаагийн амьдралын хань нь аавын хаалга татсан билээ. Тэрчлэн Т.Ариунаа хатагтайн үс хэдхэн сарын дотор бууралтаж, үдэш бүр нойтон дэртэй хоносон хоног хугацаа үргэлжилсээр. “Миний нэр алдар хий хоосон зүйл байсан юм байна” хэмээн ярилцлага өгч эр нөхрийнхөө төлөө тэмцсэн.
Бусдаас их хэмжээний мөнгө залилсан, бусдад авлига өгсөн, улсын төсөвт их хэмжээний хохирол учруулсан хэргээр МУГЖ Т.Ариунаагийн нөхөр Д.Буяндорж хэдхэн хоногийн өмнө хоёр жил гурван сарын ял аваад буй. Насаараа урлагт зүтгэж Монголчуудыгаа ая дуугаар уярааж явсан дуучны арын алба болсон нөхөр нь гэнэт гэмт хэрэгтэн болсонд эрос хатагтай хүнд байдалд орсон байсан. Тэрбээр “ Би 30 жил дуулсан дуучин хүн. Би нэр алдартай хүн. Надад энэ ард түмэн бас хайртай. Тэгэхээр миний туулж байгаа зовлонг хуваалцдаггүй юм гэхэд битгий нэрмээрэй. Битгий нэмээрэй. Би нэгхэн сарын дотор хоёр хүүгийнхээ харц доошоо унахыг харлаа. Миний үс бууралтлаа. Би нойтон дэртэй хонож байна. Энэ бол хүний амьдрал шүү. Алддаггүй, онодоггүй хүн гэж байхгүй. Бид цөөхүүлээ. Битгий нэг нэгийгээ харгисла. Битгий хэлмэгдүүл. Би энийг л хүсч байна. Шударга нь шударга бусыгаа дийлдэг. Шударга туяатай ийм нийгэмд амьдрахыг хүсч байна” хэмээн хатуухан хэлээд авсан ч шүүх шийдвэрээ гаргасан билээ. Ямартай ч цаг хугацаа бүхнийг анагааж тун удахгүй эрч хүчтэй эрос хатагтай маань фэнүүдийнхээ өмнө дахин тайзнаа гарч ирэх биз ээ. Гучин жил тайзнаа дуулсан ойгоо нүсэр тэмдэглэх гэж байгаад хөлөө гэмтээсэн хатагтай Т.Ариунаагийн тоглолт тодорхойгүй хугацаагаар хойшлогдсон нь ийм учиртай билээ.
Хамгийн их дуулианы эзэн басхүү нууцлаг дуучин
Хамгийн их дуулиан шуугианы эзэн хэдий ч МУГЖ Т.Ариунаа яг үнэндээ хувь хүнийхээ хувьд тун нууцлаг нэгэн байсаар ирсэн гэдэгтэй хэн ч маргахгүй. Он удаан жилийг дуулиан шуугиантайгаар үдсэн ч хамгийн хаагдмал, хамгийн нууцлаг дуучин. Үнэн амьдрал, үнэн төрхөө дэлгэсэн ярилцлага өгч байгаагүй эрос хатагтайн амьдрал уран бүтээлийн талаар өгүүлэхэд ийм байна.
М.Сонор
Сэтгэгдэл (62)