Монголд ардчилсан хувьсгал өрнөсний түүхт 25 жил тохиож буйтай холбогдуулан зураач Х.Хадбаатар, Г.Нороврагчаа нар “Түүчээ цаг” уран зургийн хамтарсан үзэсгэлэнгээ Занабазарын нэрэмжит дүрслэх урлагийн музейд өнөөдөр нээлээ.
Тэд Ардчилсан хөдөлгөөний зүтгэлтэн анхдагчид, өлсгөлөнд оролцож явсан 404 хүний хөргийг уран зурагт мөнхөлжээ. 1989-1990 онд өрнөсөн ардчилсан хөдөлгөөнийг дэс дарааллаар нь түүхчлэн зурсан нь хамгийн их анхаарал татаж байлаа.
С.Зориг, Э.Бат-Үүл, Б.Баабар, Ц.Элбэгдорж, МУГЖ Д.Сосорбарам, ССАЖ-ын сайд Ц.Оюунгэрэл гээд нэр бүхий хүмүүсийн хөргийг бүтээн туурвижээ.Түүнчлэн үзэсгэлэнгийн нээлтэд С.Эрдэнэ, С.Ламбаа, Д.Сосорбарам, Ц.Оюунгэрэл нарын эрхмүүд хүрэлцэн ирсэн юм. Мөн өлсгөлөнд оролцож, суулт зарлаж явсан зарим ахмадууд ирж 25 жилийн өмнөх өөрсдийгөө зурагнаас олж харан, залуу насаа дурсацгааж харагдлаа.
Энэ талаар зураач Х.Хадбаатар “Миний уран бүтээлийн үзэсгэлэнд хүрэлцэн ирснээр та 25 жилийн өмнө цэл залуу насандаа юуг зорьж, биднийг юу нэгтгэж байсныг дурсан санах, харьцуулан эргэцүүлэх боломж олдох болно” гэсэн юм.
П.Урнаа
Сэтгэгдэл (161)