“Гайгүй суудалтай билет зарна, билет зарна...” гэж хашгирах хүмүүсийн дуу UB palace руу дөхөх тусам улам чангарч, улам олшров. Бусад тоглолтыг бодвол хөл хөдөлгөөн ихтэй. UBS гэх шар хантаазтангууд ажилчин шоргоолж шиг л энэ тэрүүгээр гүйлдэж харагдав. Учир гэвэл UBS телевизийн захирал УГЗ, ая зохиогч Л.Балхжавын жил бүр болдог “Миний дуунууд” тоглолт 16 дахь удаагаа болох гэж байгаа болохоор тэр.
Тоглолтын заал руу ортол танхим ч хэдийнэ дүүрч, үзэгчид суудлаа эзэлжээ. Гагцхүү тоглолтыг нээх л үлдэж. Манайд тогтсон жишгээр тоглолт товлосон цагаасаа гуч илүү минут хоцорч эхлэв.
“Universe”-ийн “хүүхдүүд”
За тэгээд “Universe best songs”-оор овоглосон, тэрхүү наадмаас төрсөн залуу дуучид ээлж дараалан гарч ирж, ая дуугаа өргөцгөөлөө. Дэлгэцнээ гараад удаагүй байгаа хэд хэдэн киноны дууг “Universe”-ээс төрөгсөд дуулцгаав. “Зүрхээр наадагч” киноны дууг “Мотив” хамтлагийн дуучин Т.Ганбаатар, дуучин А.Хишигдалай, “Цэцэрлэгт учирсан хоёр” киноны дууг Ч.Цэлмүүн, “Содура” киноны дууг Ч.Очгэрэл, “Хувьсал” продакшны “Хайр” жүжгийн дууг хөтлөгч Э.Гантулга, дуучин Т.Амина гээд л тоочих юм бол бараг “Universe”-ийн “хүүхдүүд”-ийн тоглолт шахуу юм болсон.
Ийнхүү “Universe”-ээр овоглосон хэдэн “хүүхдүүд” цувж дууссаны дараа үзэгчдийн нүдийг хужирлаж сэтгэлийг баясгасан хэсэг бол жүжигчин Урнаагийн хэсэг байлаа. “Хувьсал”-ын У.Уранчимэг “Шөнийн үнсэлт” дууг дуулахын зэрэгцээ “Хааны сэнтий” дээр бяцхан хэмжээний үзүүлбэр ч юм уу, бүжиг ч юм уу гурван охины хамт хийж шар даашинзаа тайчин шидэж, час улаан хувцастайгаар бүжиглэнэ. Хаана ч, хэзээ ч гандан буурахгүй гал цогоо тэр энэ удаад ч харуулаад авах шиг.
Болоогүй “Шинэ жил-өвлийг” угтан дуулахуй
Тоглолтын гол баатар Л.Балхжав “Дэлгэсэн тэрлэг шиг нутаг” дууг “Мотив” хамтлагтай хамтран дуулж үзэгч олонтой мэндчилэв. Харин түүний мэндчилгээний араас өвлийн сэдэвтэй дууны бүүм буусан гэхэд болно. Юу гэхээр ОХУ-ын дуучин Влада Комлева, “Өвлийн дуу”, ОХУ-ын Буриад улсын дуучин Б.Амархүү өвлийн, шинэ жилийн дуу, МУГЖ, поп дива Б.Сарантуяа “Цагаан шөнө” дуугаа дуулсан нь, улирал андуурсан хүмүүс үзэгчдийг баахан алмайруулж басхүү сонин сэтгэгдэл төрүүллээ.
Болоогүй “Шинэ жилийг” дуулж зогсох тэднийг сонсоод “гараг андуурчихаж” хэмээн хошигнон ярих нь ч дуулдав.
“Содура”-гийн “рекламны пауз”
UBS телевизийн дэлгэцийн уран бүтээл болох “Содура” кино нээлтээ хийх гэж буй. Тэр утгаараа энэхүү тоглолт харин ч нэг “Содура” киногоо рекламдах нэг том шалтгаан болж өгөв. Дуу болгоны завсар шахуу “Содура” киноны дуу, “Содура” киноны аялгуу, “Содура” киноны ийм тийм хөгжим гээд л “Содура”-гаар амьсгалах шиг болов оо. Ёстой нөгөө тоглолт биш, киноны рекламан дотор туугаад орчихсон юм шиг л санагдсан билээ.
Аливаа уран бүтээлийн үнэ цэнэ гэгч чухам юундаа оршдог юм бэ? Улиг болоогүй байхдаа урлаг үнэ цэнэтэй байж болох юм. Энэ бол нэг хувилбар нь. УГЗ, ая зохиогч Л.Балхжав урлагт хувь нэмэр оруулж яваа хүн.
Гэхдээ өөрийгөө ингэж үнэгүйдүүлэх хэрэг байдаг ч юм уу. Жил бүр зохиогдоод өдгөө 16 дахь жилийнхээ нүүрийг үзэж буй “Миний дуунууд” тоглолт уламжлал биш улиг болон тогтох нь ээ.
Жил бүр улиглахгүйгээр, хоёр гурван жилдээ даацтай тоглолт хийж байвал тэр жинхэнэ уран бүтээлчийн “үнэ цэнэ” болох буй биз ээ. Жил бүр 2-3 өдөр болж, 3-4 цаг үргэлжилдэг энэхүү тоглолтын тасалбар энэ жилийн хувьд 25 000 мянган төгрөгний үнэтэй байлаа. Зарим хүмүүст ганц хоолных нь мөнгө бол, зарим нэгэнд нь долоо хоногийн хоолных нь мөнгө.
Жил жил дараалан иймэрхүү тоглолт хийж хувь уран бүтээлчийн үнэ цэнээ газарт унагаж байхын оронд урлагаар “түрий”барин чамгүй мөнгө хийж ирсний хувьд нийгмийн хариуцлагаа ухамсарлан хүмүүнлэгийн чанартай үйлсэд гар сунгадаг байж яагаад болохгүй гэж!
П.Урнаа
Сэтгэгдэл (15)