Скандал: топ модель Ч.Туяацэцэг

 “Скандал” булан энэ удаад топ модель Ч.Туяацэцэгийг “ониллоо”.  

Топын шагналыг гуйж биш гуядаж авсан нь

Энэхүү нэр хүндтэй өргөмжлөлийг гуйж биш гуядаж авсан шилдэг топуудын нэг бол яалт ч үгүй топ модель Ч.Туяацэцэг. Арав гаруйхан насандаа загварын ертөнцөд хөл тавьсан тэрээр 2003 онд топ модель гэх өргөмжлөлийг авч байсан. Өдгөө ахмад топуудын эгнээнд шилжсэн Ч.Туяацэцэг залуу үеийнхэндээ хамгийн эрт байраа тавьж өгсөн нэгэн. Олон жил тайзнаа үзэгдэж харагдах нь бүү хэл олон нийтийн газар тэр бүр ирдэггүй Ч.Туяацэцэгийг томоохон үйл ажиллагаан дээрээс л та олж харна.

Нүцэглэлт, алдар нэр

Миссүүд төдийгүй олны танил охид бүсгүйчүүд маань хэдэн халтар төгрөгний төлөө нүцгэн биеэ алдаршуулж олны анхаарлыг өөртөө татдаг уламжлал маягийн юм тогтсон гэж хэлж болох юм. Нүцэглэлт бүхний цаана ямар нэг ашиг сонирхол болон хувийн амбиц байдаг гэдэг нь Монголын бүсгүйчүүдийн энэ үйлдлээс тод томруун харагддаг.

Түүнтэй адил топ Ч.Туяацэцэг нүцэглэгчдийн эгнээнд орох орохдоо бүр бүрэн нүцэглэж чадсан. Гэхдээ тэр ямар нэг брэнд ч юмуу аль эсвэл хэдэн зоосны төлөө нүцэглээгүй. Тэр жинхэнэ моделийн хувиар залуу насныхаа гоо сайхнаа фото зурганд мөнхөлсөн. Цэл залуухан насандаа нүцгэн зургаа авахуулаагүй хэрнээ ид тэгширсэн насан дээрээ нүцгэн биеэ алдаршуулсан нь бүр ч содон байлаа. Ийнхүү Ч.Туяацэцэгийн карьер нүцэглэлттэй зэрэгцэн ид мандан бадарч алдар хүнд түүнийг өөрөө дагасан билээ.

Өөрчлөлт, шинэчлэлт

Түүний гоё сайхан бие төрөлхийн бол сайхан инээмсэглэл, сайхан төрх төрөлхийн биш гэхэд дэгсдүүлсэн болохгүй. Анх загварын тайзнаа алхаж эхлэхдээ тийм ч олны хараанд өртөхөөр царайтай нэгэн биш байсан. Гэвч ухаант эмэгтэй цаг хугацаа явах тусам өнгө зүс нэмнэ гэдгийг утгаар нь харуулж яваа бүсгүй бол топ Ч.Туяацэцэг.

Тэрээр буржгар үстэй, том уруул, хөрслөг бор царай төрхтэй монголжуу сайхан бүсгүй байсан. Гэтэл загварын тайзнаа гунхаж эхэлсэн даруйдаа жилээс жилд зүс нэмсээр байгаад одоогийн дүр төрхөө олж авсан.  

Загвар өмсөгч хүнд байх ёстой чадвар, өндөр нуруу, бие хаа түүнд харамгүй заяасан. Үүнийг бүрэн биш юмаа гэхэд өөрт тохирсон хэмжээнд овжин ашиглаж өөрт нь таалагдахгүй байсан эд эрхтэнээ бага багаар өөрчилсөн. Мөн Холливудын одуудын хошуураад байдаг “Холливуд смайл”-ыг ч тэр 10 мянган ногооноор хийлгүүлж хаана ч явсан инээж явдаг зуршилтай боллоо. Ийнхүү өөртөө эрс өөрчлөлт шинэчлэлийг авч ирсэн топ Ч.Туяацэцэг мэс заслын ширээнээс мэндэлсэн одуудын тоонд зүй ёсоор орсон.

Эрчүүдийн цуваа тасарсангүй

Олон эрчүүдтэй нэр холбогдож явсан хэдий ч энэ гэж амьдрал зохиогоогүй топ модель маань гуч гарсан хойноо гэр бүлтэй эртэй анхны амьдралаа эхлүүлж хэвлэлийн баатар боллоо.

Түүний хайрыг булааж хэсэгтээ романсласан дурлалын эзэн МЗХ-ны ерөнхийлөгч А.Мөнхбат. Гэр бүлтэй, хоёр хүүхэдтэй эртэй анхны амьдралаа эхлүүлсэн ч тэдний хайрын түүх удаан үргэлжилсэнгүй хоёр тийш болсон.

Хоёрын хоёр хүүхдээ орхин байж тогтсон амьдралаасаа хальж модель бүсгүйтэй амрагласан А.Мөнхбат, Ч.Туяацэцэгээс хойш олон бүсгүйчүүдийн нүүрийг үзсэн ч өнөөдөр хүртэл амьдралынхаа ханиа олоогүй л явна.

Анхны эхнэр хүү, охин хоёр нь өдгөө гадаадад ажиллаж амьдардаг А.Мөнхбат анхны гэргий, хүүхдүүдтэйгээ одоо хүртэл сайхан харьцаатай байдаг.

Топ бүсгүйгээс болж анхны амьдрал нь бүтэлгүйтсэн тэрээр “Ч.Туяацэцэг бид хоёрын дунд жинхэнэ хайр байсан” хэмээн саяхан нэгэн ярилцлагандаа дурдсан. Харин топ бүсгүй А.Мөнхбатаас хойш нэгэн залуутай мөн л суух дээрээ тулж хамтын амьдралаа эхлүүлсэн ч дахин хоёр тийш болоод удаагүй байна.  

Гуч гарсан ч гунхсан ганц бие бүсгүй

Сайхан бүсгүй хуримгүй гэдэг зүйрлэл Ч.Туяацэцэгийн амьдралд утгаараа биелэж байгаа бололтой. Олон эрчүүдийн хайрыг булааж сэтгэлийг эзэмдсэн хэрнээ гуч гарсан гунхсан ганц бие сайхан бүсгүй хэвээрээ. Тэрээр өдгөө 40 насанд дөхөж яваа гэвэл та итгэх үү.

Ахмад үеийн модель бүсгүйчүүдтэйгээ хамт томоохон үйл ажиллагаа болон улс төрийн хүлээн авалтанд оролцдог болсон Ч.Туяацэцэг жижигхэн загварын шоуг тоохоо байсан гэж болно. Хувийн бизнесээ хийхийн хажуугаар харчуудын харцанд ээрэгдэж явсан он цагаа мартсан эрхэм топ маань хэзээ хурим найр хийж үрийн зулай үнэрлэх болдоо. Ахмад топуудынхаа амьдралаар заминалдах гээ юу. Үүнийг цаг хугацаа л харуулах байхдаа.

Ч.Туяацэцэг УИХ-ын гишүүн асан, УДШ-ийн дарга асан Д.Дэмбэрэлцэрэнгийн хүүтэй дотноссон, загвар өмсөгч Г.Оюунгэрэлийн найз залуутай нь орооцолдсон МТХХГ-ын дарга А.Мөнхбаатартай амьдарсан гэхчлэн нэрсийн жагсаалт хөвөрнө.

Хэсэг ганцаараа эрх чөлөөтэй амьдарсан Ч.Туяацэцэг НИК-ийн дэд захирал Гансүхтэй амьдрах болсон. Топ модель Ч.Туяацэцэгтэй сүй билгээ тавьсан, удахгүй ханилна гэгдэж байгаад тэд мөн л хоёр тийш болсон.

М.Сонор