Тэртээ 1989 оноос загварын тайзандаа одоог хүртэл үнэнч байж, загвар өмсөгч, топ модель хэмээх нэрийг өндөрт өргөж яваа энэ бүсгүйг Монголд танихгүй хүн үгүй. Өнөөдрийг хүртэл энэ хүний амьдрал домог мэт яригдсаар ирсэн.
“Одгэрэл зоогийн газар ороод нуруугаа хотойлгоод суучихна, аяга шаазан барихдаа хуруу гараа уян налархай гэгч нь хөдөлгөдөг”, “Шилмэл загвар” ХХК-ийн захирал Оюунцэцэг “Жинхэнэ загвар өмсөгч бол Э.Одгэрэл”, диеайнер Н.Соёлмаа залуу загвар өмсөгч охидод “Та нар Одгэрэл шиг бай л даа. Эмэгтэй хүний даруу хэрнээ цаагуураа залуу насаа гайхуулсан үзэсгэлэн гуа, бардам ихэмсэг төрхийг гарга: Хаа очиж Э.Одгэрэл насаа мэдрээд ч тэр үү, секси төрхийг төгс гаргаж чадаж байна” гэх мэтээр ярьцгаана.
Э.Одгэрэл загвар өмсөхийг зүгээр нэг гоё баглаа боодлоор өөрийгөө боож байгаад бусдын хөрөнгө болох хэрэгсэл утгаар ашиглаагүй. Хэдийгээр түүнийг олон эрчүүдтэй нэр холбодог ч хэнбугай ч хамт яваа дэл сул байдлыг нь ил гаргаж чадаагүй.
Загварын тайзанд хатан мэт оршиж, хэзээ ч, хаана ч биеэ сайхан авч явдаг энэ хатагтай охид бүсгүйчүүдийн мөрөөдлийн дүр билээ.
Сайхан байх гэдэг өөрөө асар их тэвчээр, хөдөлмөр. Нэг ч удаа үс нь сэгсийсэн хайш яаш байдалтай нь харж байгаагүй тэр бол жинхэнэ монгол бүсгүйн гоо үзэсгэлэнгийн илэрхийлэл. Загвар өмсөгч, топ модель гэдэг энэ алдар цолыг өндөрт өргөж насаараа мэргэжлийнхээ нэр хүндийн төлөө амьдарсан Э.Одгэрэлд яагаад Алтангадас өгч болохгүй байх билээ.
Тэр 3 жилийн дараа 50 нас хүрнэ. Э.Одгэрэл шиг ингэж ихэмсэг бардам, үнэ цэнтэй орших нэгэн загварын ертөнцөд байтугайд нь дахин тодрох амаргүй. Болсон болоогүй ганц дуу дуулаад од болдог, ганц нэвтрүүлэг хөтөлсөн болоод энгэрээ цоолдог, хэн нь ч мэдэгдэхгүй мисс хүүхэн төрийн ордонд Алтангадас гардаж болоод байхад бүх амьдралаа загварын ертөнцөд зориулсан, үе үеийнхний үлгэр дуурайл болж яваа мөнхийн залуу хатагтай Э.Одгэрэлд одоо бид хүндэтгэл үзүүлэх цаг болсон юм биш үү?
Б.Ундрал
Сэтгэгдэл (16)