Оросын найруулагч Сергей Бодровын “Монгол”кино манай киночдын цөс цусыг хөөргөж байсан нь саяхан. Нэг талаас Монголын түүхийг гуйвуулсан кино болсон гэдгээрээ манайхны уурыг хүргэсэн бол нөгөө талаас Чингисийн Бөртэд гайхалтай ховор төрхтэй эмэгтэйг олж чадсанд нь атаархсан найруулагчид бий. Ямартаа л “Монгол”кино нээлтээ хийсний дараанайруулагч Доржийн Золбаяр “... Ийм гайхалтай төрхтэй эмэгтэйг монголын найруулагчид өөрсдийнхөө бүтээх “Чингис”-ийн Бөртэ-д тоглуулж чадсангүй алдчихлаа...” хэмээн харамсангуй ярьж байсан юм.
Тэгвэл Бөртэ үжиний дүрд тоглосон Чулууны Хулан хэмээх бүсгүй бодит амьдрал дээр ч “харь” сонголт хийсэн юм. Юу гэхээр Ч.Хулан одоо Казахстаны Алма-Ата хотод амьдардаг бөгөөд “Монгол” кинонд туслах найруулагчаар ажилласан Naryn Igilik хэмээх Казахстаны найруулагч залуутай гэр бүлийн амьдрал зохиожээ.
За харин ховор монгол төрхтэй түүний талаар илүү дэлгэрэнгүй танилцуулахад, 1985 онд Өвөрхангай аймгийн Хархорин суманд төрсөн бөгөөд хоёр эгчтэй, айлын бага охин аж. Ч.Хулангийн аав нь жолооны багш мэргэжилтэй, харин ээж нь инженер мэргэжилтэй хүн юм байна.
-Ч.Хулан зөвхөн жүжигчин биш. Найруулагч мэргэжлийг эзэмшээд байгаа юм билээ. Тэр 2008-2009 онд“Cinema Hotel Corporation” компани, найруулагч Ануар Райбае-ын “ Лаве” кинонд найруулагчийн туслахаар ажилласан бол 2010 онд “Kazakhfilm” & “Alemstudio” компаниудын хамтарсан, найруулагч Асиа Сулеева болон Ануар Райбае-ын “Женіс семсері” кинонд найруулагчийн туслахаар ажиллажээ. Мөн “Kazakhfilm” & “Office 111-t” film компаниудын хамтарсан, найруулагч Ермек Турсунов-н “Далады дары із” кинонд найруулагчийн туслахаар ажилласан гэхчлэн хэд хэдэн уран бүтээл байна.
Монголын найруулагчдын гарт баригдаагүй Ч.Хулан ямар хувь тохиолоор “Монгол”-д тоглосон нь уншигч танд сонин байх болов уу. 12 улсын жүжигчид оролцсон “Монгол” кино 80 дахь удаагийн Оскарын кино наадмын гадаад хэл дээрх хамгийн шилдэг кино номинацид нэр дэвшиж байсан юм. “Монгол” уран сайхны киноны зураг авалт 2005-2007 оны хооронд үргэлжилсэн байдаг. “Eurasia”, “CTB”, Andrey’s banner”, “X-Filme Creative Pool” “Kinofabrika Gmbh”, “Picturehouse” film 
компаниудын хамтын бүтээл болох тус киноны хэсэг уран бүтээлчид Бөртэ хатны дүрд тоглох жүжигчнийг хайн монголд ирээд хэд хэдэн эмэгтэйг пробонд оруулсан юм билээ. Гэсэн ч ерөнхий болоод хоёрдугаар найруулагчийн сонголтод нийцэх дүр төрхтэй эмэгтэй байхгүй байж. Гэхдээ тэд хайж байсан хүнээ олсон.
Ч.Хулан киноны уран бүтээлчидтэй санаандгүй байдлаар тааралдаж, тэд түүнийг харсан даруйдаа танилцах хүсэлт тавьж, улмаар пробонд орох санал тавьжээ. Ч.Хулан тэр үед монголдоо сэтгүүлзүйн чиглэлээр суралцдаг байсан бөгөөд пробонд тэнцсэнээр “Монгол”-д тоглох боломж нь бүрэн нээгджээ. Тэрээр мэргэжлийн жүжигчин биш учраас 2006 онд Москва хотод Ксения Громова багштай жүжигчний курст суралцсан байдаг.
Найруулагч Сергей Бодровын тухайд “Монгол” киноны хоёрдугаар ангийг хийхээр бэлтгэж байгаа гэсэн мэдээлэл гараад байсан. Улмаар, нэгдүгээр ангид тоглосон жүжигчдээ дахин цуглуулж эхэлсний дотор Чулууны Хулан ч байгаа гэх мэдээлэл байсан юм.
М.Мөнхжин
Сэтгэгдэл (113)