Загварын ертөнцийнхнийг “толгой гэж олгой” гэх таагүй тодотгол дагадаг нь нууц биш. Магадгүй, хэлбэрт илүү ач холбогдол өгдөг салбар учраас ийн адлагдахад хүрдэг байж болох. Гэсэн ч энэ бол том салбар. Тэднийг олон нийт хардаг, өсвөр үеийнхэн үлгэрлэн дагадаг гэхчлэн лавшруулж харах ёстой болов уу. Түүнчлэн загварынхны хувийн амьдрал ч олны анхааралд байдаг. Ер нь бол модель бүсгүйчүүдийн тухайд цөөнгүй эрчүүдтэй нэр холбогдчихдог нь үнэн. Тэгвэл загварынхан дотроо ч хайрлан дурлалцаж, хагацаж салж, дахиад шинэ харилцааг эхлүүлсэн нь цөөнгүй байх юм.
Д.Болормаа & Баярсайхан
“Монгол модель” агентлагийн захирал, топ модель Д.Болормааг тайзан дээр аз одтой явж ирснийг хэн үгүйсгэж чадах билээ. Харин хувийн амьдрал, хайр дурлалын асуудал дээр од муутай нэгэн гэдгээ харуулсаар байна. Ганц хүүгийнхээ эцгээс хойш хэд хэдэн залуутай нэр холбогдсон ч, болж бүтсэн амьдралыг цогцлоож чадалгүй өдийг хүрсэн юм. Гэхдээ тэрбээр сэтгэлийг нь хөвсөлзүүлэн догдлуулж чадсан хайртай учирч явснаа ярих үедээ ярьдаг. Тэр нь ерээд оны дунд үеэр өөрөөсөө найм дүү эрлийз төрхтэй загвар өмсөгч Н.Баярсайхантай учир ургуулан нэг жил хамтдаа амьдарсан дурсгалт үе нь гэдэг. Н.Баярсайханы тухайд АНУ-ыг зорьсноор тэдний хайрын романсад цэг тавигдаж, топ модель Д.Болормаа өөртэйгөө нас чацуу эртэй амьдрал зохиосон ч бүтэлгүйтжээ. Тэгээд дараа нь “Raffless” буюу “Hartford institute”-ийн захирал Николь гэх эртэй дурлалцсан ч, тэдний харилцаа нэг их удалгүй төгссөн байдаг.
Ч.Содтуяа & А.Чингүүн
Загварын сайхан хос гэх тодотголыг яах аргагүй дагуулаад байсан А.Чингүүн, Ч.Содтуяа нарын хамтын амьдрал дуулиант салалтаар төгссөн билээ. Хэн хэнийгээ үгүйсгэсэн өнгө аястай ярилцлага хэвлэлээр ээлж дараалан өгч, гомдлын цангаагаа тайлж явсан тэд дундаасаа нэг охинтой. Охиноо өнчрүүлэн байж хөрөнгөлөг айлын хүргэн болсон А.Чингүүн хоёр дахь эхнэрээсээ хүүтэй болсон юм.
Тэгвэл сүүлийн үед Ч.Содтуяа, А.Чингүүн хоёрын салах болсон жинхэнэ шалтгааны тухай тэднийг мэдэх хүмүүс нь ярих болж. Тодруулбал, Ч.Содтуяагийн охины эцэг нь А.Чингүүн биш гэдэгт асуудлын учир байсан гэх. А.Чингүүн тэрийг нь мэдчихээд салсан гэх. Ямартай ч загварын сайхан хосын адармаатай амьдрал төгсгөл болж, тус тусынхаа мөрийг хөөсөн юм.
С.Төгс & С.Эрдэнэцогт
Загварын төгс хосууд хэмээн хүндлэгдсэн загвар өмсөгч С.Эрдэнэцогт, С.Төгс нарын хайрын романс, хамтын амьдрал нэг жилийн настай байсан. Хөөрхөн охинтой болсон хэдий ч төгс хосуудын хайрын түүх богино настай байсан нь харамсалтай. Ер нь загвар өмсөгч С.Төгсөд эгчмэд моделиуд болон топууд тун ч ам муутай байдаг гэнэ лээ. “Торго” шоуны тайзнаа алхахыг нь эс тооцвол Монголын гэх тодотголтой загварын тайз, шоу болгон түүнд “жул” санагддаг мэтээр “тодордог” нь ийн дургүйцэхэд хүргэдэг юм байх. “Гоёл” наадмын тайзнаа сүүдрээ ч тусгаж амжаагүй хэрнээ хормой хотны явдлаараа цахим ертөнцөд од болчихоод юу яриад явдаг бацаан бэ хэмээн уурсах модель эгч нар олон гэнэ лээ. “Амных нь салиа арилаагүй, хэдхэн жил тайзнаа алхчихаад өөрийгөө юу гэж боддог юм бол” хэмээн эгдүүцэж, зэвүүрхдэг загварынхан ээлжит амрагаа солиход нь бүр ч эгдүүцсэн биз. Ямартай ч салалт бол орчин үед асуудал биш гэдгийг утгаар нь харуулсан загвар өмсөгч С.Төгс анхны нөхрөөсөө салаад сар болоогүй байж өөр нэгэн залуутай унтаж буй зургаа цахимаар тарааж хосуудын романс төгссөн гэдэг нь батлагдсан.
Э.Оюун-Эрдэнэ & Ч.Сүбээдэй
Топ модель Урнаагийн залгамж халаагаар нэрлэгддэг загвар өмсөгч Э.Оюун-Эрдэнэ “Super model of Asia Pacific-2011” олон улсын тэмцээнд амжилттай оролцон “Best figure” буюу “Хамгийн сайхан бие галбиртай модель” гэсэн шагналыг гардаж байсан ирээдүйтэй загвар өмсөгчдийн нэг. Олон арван нэртэй компаниудын нүүр царай болж реклам зар сурталчилгаанд даруулдаг тэрээр одоогоос жилийн өмнө загвар өмсөгч Ч.Сүбээдэйтэй үерхэж байсан билээ. Тэднийг загварын сайхан хосууд шинээр мэндэллээ хэмээн загварынхан ч ихээхэн талархаж хүлээж авсан. Харамсалтай нь дундуур нь загвар өмсөгч С.Төгс орж ирснээр тэдний дурлалын романс төгсгөл болсон гэдэг. Найз залуугаа үе тэнгийн загвар өмсөгч бүсгүйд алдсан Э.Оюун-Эрдэнэ Ч.Сүбээдэйд хаягдах биш хаяхаар сайхан бүсгүй хэмээн ойр тойрныхон нь ярилцдаг.
Ч.Сүбээдэй & С.Төгс
Нөгөө л С.Төгс, нөгөө л Ч.Сүбээдэй цэцэг дамждаг эрвээхэй шиг энд дахин гараад ирлээ шүү. Түүнийг загвар өмсөгч Ч.Сүбээдэй гэхээсээ С.Төгсийн “запас” Ч.Сүбээдэй гэдгээр нь олон нийт илүүтэй таньдаг болжээ. Ч.Сүбээдэйн анхны сонголт мөн л загвар өмсөгч бүсгүй байсан гэдгийг дээр дурдсан. Тэрээр загвар өмсөгч Э.Оюун-Эрдэнийг нандин хайрын минь эзэн хэмээн нэрийддэг бөгөөд хэзээ ч салахгүй гэж амлаж байсан ч амлалтандаа хүрээгүй энэ. Өдгөө загвар өмсөгч С.Эрдэнэцогтын “нөхөөс” болон очсоноос хойш хойд эцгийн дүрд чадварлаг тоглож, гурвалжин, дөрвөлжин дурлалын дунд төөрчихсөн яваа эрвээхэй гэгдэж байна. Ямартай ч урлаг, улс төрийнхөн хоорондоо гурвалжин, дөрвөлжин дурлалын романс үүсгэж байхад загварынхан юунаас хоцрох билээ гэмээр л дүр зураг харагдах болж дээ.
Эцэст нь хэлэхэд зөвхөн С.Төгс гэлтгүй эр эмгүй “запас”-тай болчихсон хорвоод төөрч будилахгүй, эндүүрч алдахгүй байхад л болоо гэдэг бичигдээгүй хууль байдаг гэж орчин үед ойлгоход хүрээд буй. Ийнхүү загварын хосуудын гурвалжин, дөрвөлжин хайр, дурлал хаа хүртэл үргэлжлэхийг цаг хугацаа л харуулах байх даа.
Өсвөр үеийнхний харж үлгэрлэн дуурайдаг загварын ертөнцийнхан сошиал медиа хөгжсөн эринд тун бодолтой амьдрахгүй бол дэлгэсэн ном шиг амьдралын хэмнэл нь буруу signal болж буйг анхаарахад илүүдэхгүй биз ээ. Эр эмийн асуудлыг хэн ч зохицуулж эс чадах ч энэ мэт явдлаа өөрсдөө олон нийтэд тайлагнаад байгаа нь хамгаас хачирхалтай байгаа юм.
М.СОНОР
Сэтгэгдэл (21)