Өнгөрсөн сарын 14-17-нд Олон улсын хэмжээний 20 гаруй загвар зохион бүтээгчид 5000 гаруй үзэсгэлэн сонирхогчид, дэлхийн 30 гаруй хэвлэл мэдээллийг хамруулсан “Fashion me” үзэсгэлэн худалдаа Арабад болох талаар бид өмнө нь мэдээлж байсан. Тэгвэл загварын ертөнцөд Катя Зол нэрээрээ алдаршсан Г.Золцэцэг тус шоунд эх орноо төлөөлөн анх удаагаа амжилттай оролцоод иржээ. Өвөрмөц дүр төрх биеэ авч яваа байдлаараа эрхгүй ялгардаг залуу загвар зохион бүтээгч бүсгүй маань “Katya Zol” брендийг хүртэл бий болгож дэлхий дахинд өөрийгөө болоод эх орныхоо нэрийг тунхаглаж чадсан гэдгийг мэдэх хүн олон. Монгол брэнд болсон ноолууран бүтээгдэхүүнээ таниулан сурталчилж Арабын том зах зээлд багахан тэсрэлт хийж чадсан тэрээр Араб үндэстэнд зориулж орчин үеийн загварын нэг коллекц гаргаж, бусад материалуудыг ноолууртай хослуулан үнэтэй гоёмсог зүйлсээр чимэглэсэн нь олны анхаарлыг ихэд татсан гэнэ. Монголын цагаан алт гэгддэг ноолуураа сурталчилсан тус шоунд манай урлагийн шинэ залуу үеийн төлөөлөгчдийн нэг “Kиви” хамтлаг ая дуугаа өргөж Монголын урлагийг гадаадад таниулахаас гадна тус хоёр өдрийн шоунд дэлхийн олон орны шилдэг загвар өмсөгчдөөс дутахааргүй загвар өмсөгчид болж тайзнаа загваруудаа амилуулж эх орныхоо нүүр царай болсоныг мөн дуулгах хэрэгтэй. Юутай ч Монголчууд бусад орны загвар зохион бүтээгчдээс олон зүйлээрээ онцгой давуу байж хүмүүсийн анхаарлыг татаж Монголчууд моод эхлүүлдэг болж байгааг мэдрүүлсэн тус арга хэмжээг гадаад явдлын яам, Хас банк ивээн тэтгэж дэмжин ажилласан аж. 
Сэтгэгдэл байхгүй байна