Өөртөө зориулж дуулдаг

Монгол Улсын гавьяат жүжигчин поп хатагтай Б.Сарантуяаг дуулсан дуу бүрээ хит болгож олны талархлыг хүлээдэг гээд хэлчихэд нэг их хилс болохгүй. Гэвч тэр дуулсан дуу бүрээ хит байлгахыг хүсдэггүй гэнэ лээ. Түүнийхээр бол тун энгийн үгтэй энгийн аялгуутай дуу хит болохдоо амархан байдаг гэнэ. Гэхдээ хит дуу дуучнаа хөгжүүлж чаддаггүй муу талтай юм байх. “Сүүлийн үед залуучууд дуу бүрээ хит болгох гэж тэмүүлэх болж. Энэ нь өөрийнх нь хөгжлийг дараад байгаа юм. Хэрвээ сайн дуучин байя гэвэл хит дууны хойноос хөөцөлдөх биш хоолой шаардсан мэргэжлийн дуучин дуулах хэмжээний дууг сонгох хэрэгтэй” хэмээн Монголын таван дивагийн нэг Сараа хатагтай зөвлөж сууна билээ. Дашрамд дуулгахад дуучин бүсгүй маань хэн нэгэнд зориулж дуулдаггүй, зөвхөн өөрөө өөртөө л дуулдаг гэнэ лээ.