Үндэсний томоохон компаниуд нийлээд ХҮҮХДИЙН ПАРК-ийн  газрыг хувь бизнесийнхээ эрх ашигт нийцүүлэн ашиглаад олон жилийн нүүрийг үзэж байна. Нийслэлийн иргэдийн тоо жил жилээр өсч, амралт, чөлөөт цагаа өнгөрөөх газаргүй хүүхдүүдийн тоо нэмэгдсээр байхад “Бодь”, MCS, “Мон-Уран”, “Сөүл” групп, “Шунхлай” зэрэг тэргүүлэгч  компаниуд  Хүүхдийн паркийн газрын ихэнх хэсэгт эзэн суучихаад, элдэв олон бизнесээ цэцэглүүлж байгаа энэ бусармаг явдлыг таслан зогсоох сэтгэл хийгээд шийдэмгий байдал Хотын дарга С.Батболдод, Нийслэлийн Газрын Албаны дарга Э.Болорчулуунд байна уу гэдгийг асуумаар байна! Дарга нарын санах ой сонгуулийн мөчлөгтэй байдаг бол НИЙГМИЙН САНАХ ОЙ гэдэг юм түүхийг тэрчигт нь өөртөө хадгалж, үнэ цэнэтэй үнэн зүйлсээ мартдаггүй билээ. Тэрчлэн Ю.Цэдэнбал агсны гэргий Филатова хатагтай Монголын хүүхэд залуусын ирээдүйн төлөө олон зүйлийг хийж, санаа тавьж байсны нэг нь Хүүхдийн парк байсан билээ. Хуучин нийгмийн тогтолцооны үед Монголын хүүхэд залууст чөлөөт цагаа өнгөрөөх, тоглож наадах Хүүхдийн парк байлаа.

Тэгвэл өнөөдөр юу үлдэв! Хүүхдийн паркийн гэх тодотголтой 35 га газраас ердөө 4.5 га-д нь л чанар муутай, хүүхдийн тоглоом нэртэй зүйлс бий. Жилдээ нэг баярынхаа өдрөөр паркийг зорьсон хүүхдүүд сэтгэл тун дундуур байх болсон нь аргагүй биз ээ. Хамгийн зөв хөрөнгө оруулалт бол  хүүхэд залуус руу чиглэсэн байдаг. Харин манайд хүүхэд залуустаа хэрэгтэй зүйлсийг сүйдлэж, баллаж байгаагийн бодит жишээ нь Хүүхдийн паркийн газрыг булааж, хүүхдүүдээс булаасан энэ явдал юм.

Нийгмийн хариуцлага энэ тэр гэж баахан юм ярьдаг хэрнээ, нидэр дээрээ Хүүхдүүдээс ая тухтай байх орчныг булаасан энэ үйлдлийг эрүүл өнцгөөс харж, шийдэх хэрэгтэй байна. Дээр нэр дурдсан компаниудын хувьд ашиг орлого олох бизнесийн суваг нь том гэдгийг хэн хүнгүй мэдэж буй. Тэгэхэд заавал үе үеийн хүүхдүүдийн хөгжиж, наадаж ирсэн хүүхдийн паркийн газар луу гар дүрцгээсэн нь үнэхээр харамсалтай. Монголын хүүхэд залуучуудад чөлөөт цагаа өнгөрөөх орчин үнэхээр дутагддагийг бүгд л мэднэ. Ямартаа л хүүхдүүдэд интернэт  тоглоомын газраас өөр очих аятайхан газар олдохгүй байхад тэд яах болж байна вэ? Хүүхдийн парк гэх тодотголтой хэрнээ хэрэг дээрээ хэдэн компанийн мэдлийнх болсон тэр газар дээр жилийн дөрвөн улирлын турш хүүхдүүдэд үйлчлэх олон үйлчилгээний газрыг нээж болох шүү дээ. Харамсалтай нь төр биднийг дэмжих ёстой, шулах ёсгүй гэж байнга ярьдаг хувийн хэвшлийнхний топ төлөөллүүд болох дээрх нэр бүхий компаниуд Монголынхоо хүүхдүүдийн ирээдүйг үл тоон, паркийн газрыг нь булаасан.

Нийгмээрээ, нийтээрээ зөв зүйлийн тухай дуугарвал үр дүн гардаг болохыг бид саяхан харсан билээ. Богд хааны ордон музей болон Дондогдулам хатны бунхан, гэрэлт хөшөө бол Монголчуудын хувьд үнэтэй өв соёл болон оршдог. Гэтэл АПУ зэрэг компаниуд Богд хааны ордон музейн орчимд хууль бусаар барилга, байгууламж барьсан талаарх мэдээллийг хэвлэлийнхэн  хэдэн жилийн өмнөөс л бичсэн. Харин сая уг асуудал тодорхой шийдлийг олох эхлэл тавигдаж, Богд хааны ордон музейн  орчимд газар эзэмшиж, үйл ажиллагаа явуулж байсан компанийн эрхийг цуцлах шийдвэрийг хотын дарга гаргасан билээ.

Тэгвэл Хүүхдийн паркийн асуудал ч яг л үүнтэй адил шийдэгдэх ёстой юм. Өнгөрсөнд үлдсэн үүх түүх хийгээд ирээдүйд хүүхэд залуусын бүтээх шинэ түүх Монголчуудад ижил үнэ цэнэтэй. Тиймээс ч одоо хүүхэд залуусынхаа ирээдүйн төлөө Хүүхдийн паркаа авармаар байна.

Хууль зөрчин, нийгмийн эсрэг үйл ажиллагаа явуулж буй этгээдүүдтэй төрийн байгууллага хариуцлага тооцож чадаж байгаа юм чинь Хүүхдийн паркийг зайдагнасан “Бодь”, MCS, “Мон-Уран”, “Сөүл” групп, “Шунхлай” зэрэг компаниудтай ч мөн хариуцлага тооцож Хүүхдийн паркийн газрыг буцааж авахыг Хотын дарга С.Батболд, Нийслэлийн Газрын албаны дарга Э.Болорчулуун нараас шаардаж  байна.

Уг нь МЗХ-ноос Паркийн газрыг чөлөөлөх хөдөлгөөнийг өрнүүлж байсан удаатай. Тэр үед  “Мон-Уран”компанийн эзэн, УИХ-ын гишүүн Б.Наранхүү  “Албан ёсны зөвшөөрөлтэйгээр 1.1 га газрыг манай компани ашиглаж байгаа нь үнэн. Паркийн газрыг эзэмшиж байгаа бусад компани тухайн газраа хүүхдэд зориулсан байгууламж барихад зориулж өгвөл бид ч газраа буцаан өгөх болно” гэж дуугарч байв. Гэсэн ч өнөөдрийг хүрэхэд хэн нь ч буцааж өгөөгүй.

Хүүхдийн парк гэх тодотголтой газарт “MCS Hotel”-ийн  “Шангри Ла” зочид буудал, “Сөүл” ресторан, “Бодь”-ийн бизнес цэцэглэн, тэд хүүхдийн нэрээр түрий барин хэтэвчээ зузаатгасаар байгаа юм. Эргэн санахад, 2010 онд “Үндэсний соёл амралтын хүрээлэн” нийслэлийн өмчит үйлдвэрийн газрыг  татан буулгаж, дэлхийн жишигт нийцсэн “Disney land” барина гэж Япон улсын “Иточу” корпорацтай хамтарсан хөрөнгө оруулалттай компани байгуулан хувьчилж авсан ч, хаа байна тэр нь. Шал худлаа байсан. Хүүхдүүд цөөн хэдэн  тоглоомтой, давчуухан талбайд л  зуны гурван сар тоглосон болж байна.

Харин “Бодь”, MCS, “Мон-Уран”, “Сөүл” групп, “Шунхлай” гэсэн хэдэн “мангас” паркийн талбайг тэрчигт нь шахуу хувааж аваад, зоргоороо талхилцгааж байгаа билээ. “Шунхлай” гэхэд паркийн зүүн өмнөд хэсэгт ШТС ажиллуулдаг. Нийслэлийн Газрын алба  тэрхүү  ШТС-ын газрыг  паркийн  анхны баталгаажсан талбайд ороогүй гэдэг гэх мэдээлэл бий ч, Хүүхдийн парк, хүүхэд олноороо цугладаг газар бол онцгой бүс байх ёстой. Хүүхдүүдийн аюулгүй байдлыг нэн тэргүүнд авч үзэх ёстой. Гэтэл манайд яаж байна. Хүүхэд залуусынхаа чөлөөт цагаа өнгөрөөх газрыг томчууд нь булааж аваад, архи дарс зардаг, үнэтэй үйлчилгээ үзүүлдэг газраар дүүргэчихэж байгаа юм.  Энэ бол яагаад ч зөвтгөж болохгүй  асуудал юм.

“Бодь”-ийн  “Үндэсний соёл амралтын хүрээлэн” ХХК нь хүүхдийн паркийн төслөө Улаанбаатар хотын захиргаатай хамтран хэрэгжүүлдэг гэгддэг. Тэгээд хамтарч хэрэгжүүллээ гээд чухам яг юу сэдэж, хэрэгжүүлээд, хүүхдүүдийг баярлуулаад байна вэ гээд харахаар торох юм байдаггүй. Зүй нь Хүүхдийн парк гэдэг газрыг Хүүхэд, залуус руу л чиглэсэн үйл ажиллагаа явуулдаг, үнэ өртгийн хувьд боломжийн үйлчилгээтэй газруудаар л бүрдүүлэх ёстой. Гэтэл өнөөдрийн байдлаар тэнд нэг гитарчин БААР ажиллуулж байх жишээтэй. Больмоор байна шүү дээ, ийм баларсан шийдвэрүүд гаргах аа. Холбогдох байгууллага зөвшөөрөл өгөөгүй байхад, хүүхдийн парк дотор баар ажиллуулах хүн арай үгүй байх. Тэгэхээр төрийн байгууллага нь зүй зохисгүй үйлдлийг өөгшүүлж байгаа хэрэг юм.

Тиймээс ч Хүүхдийн паркийг хувийн хэвшилтэй хүч нийлж  “хүчирхийлдэг” байдлаа зогсоох цаг болсныг хотын захиргаанаас шаардаж байна. Дахиад хэлье, Хүүхдийн паркийг зайдагнасан “Бодь”, MCS, “Мон-Уран”, “Сөүл” групп, “Шунхлай” зэрэг компаниудтай хариуцлага тооцож, Хүүхдийн паркийн газрыг буцааж авахыг  Хотын дарга С.Батболд, Нийслэлийн Газрын Албаны дарга Э.Болорчулуун нараас шаардаж байна.

Эх сурвалж: Monnews.mn