Холливудын жүжигчин Стивен Сигал Оросын төрийн тэргүүн Владимир Путинтай эрхэм анд нөхрийн харилцаатай гэгддэг. Тиймдээ ч дахин зургаан жил их гүрнийг удирдахаар сонгогдсон ноён Путин тангаргийн баяртаа нэрт жүжигчнийг гэргийн хамт урьжээ.

Оросын хэвлэлд мэдээлсэнчлэн Кремлийн хаалгаар хамгийн түрүүнд эртлэн орсон зочдын нэг Сигал эхнэр Б.Эрдэнэтуяагийн хамт тэргүүн эгнээнд зогсож харагдсан юм. Холливудад мандаж явсан жүжигчний “ар тал” гэдэг утгаараа хатагтай Эрдэнэтуяа дэлхийн урлаг, соёлын хүрээний олон арга хэмжээнд очиж явсан. Тэр бүртээ монгол үндэсний дээлээрээ хичээнгүйлэн гоёдог жинхэнэ монгол хатагтай. Энэ удаад ч алдарт Кремлийн ордонд нар мэт гийгүүлсэн алтан шаргал дээлээр гоёж очжээ.

Тангаргийн ёслолд уригдсан 5000 зочдын тоонд багтсан Б.Эрдэнэтуяа энэ тухайгаа сошиал хуудсандаа ийн бичжээ.