ХЗДХ-ийн сайд Ц.Нямдоржийн араас төсвийн мөнгөөр үнэтэй жийп авч, “тансагласан” хүнээр БСШУС-ын сайд Ц.Цогзолмаагийн нөхөр Ч.Саранжавыг тодруулж, хэсэг шуугисан. Харин “Өдрийн сонин” сайдын нөхөр, Эрчим хүчний хөгжлийн төвийн дарга Ч.Саранжавтай холбогдож, энэ талаар тодруулга авсан байна.

Тэрбээр салбарын яамнаас нь хэрэгжүүлж буй “Baganuur power” төсөл, мөн БНХАУ-ын хөрөнгөөр дамжуулах шугам сүлжээ барих төсөлд зориулж, тус тус нэг жийп авсан гэдгээ тайлбарласан байна. Өөрөөр хэлбэл, төслийн хүрээнд албан хэрэгцээнд, шилэн тендерийн дагуу 2 машин худалдаж авсан ажээ. Өмнө нь төслийн шугамаар машин авчихаад дараа нь зарж үрэгдүүлэх асуудал гарч байсан учраас энэ удаад Төрийн өмчийн бодлогын хороо нэгтгэж, дээрх төслүүдийг Эрчим хүчний хөгжлийн төв дээр зангидан, шаардлагатай тендерийг зарлах эрхийг өгсөн байна.

Энэ дагуу тендерт үнээ ирүүлсэн “Таван богд”, “Мөнххада” компаниас арай хямд үнийн санал ирүүлсэн “Мөнххада” компанийг сонгож, “Ланд круйзер” маркийн 2 автомашин авсан ба нийт үнийн дүн нь 365 сая төгрөг болжээ. Шилэн тендерт худалдан авалтын бүх мэдээлэл нь ил тод байгаа гэдгийг тэрбээр тайлбарласан байв. Товчхондоо сайдын нөхөр Ч.Саранжав хувийн хэрэгцээндээ биш албан хэрэгцээнд, тодруулбал шинээр хэрэгжиж эхэлж буй 2 төсөлд зориулж дээрх машинуудыг авсан гэх мэдээллийг “Өдрийн сонин” онцолжээ.

С.ҮЖИН