УИХ-ын гишүүн О.Баасанхүү МАХН-ын Их хурлыг хууль ёсны дагуу зохион байгуулж, намын дүрмийг өөрчилж, гишүүдийнхээ олонхийн саналаар намын даргаараа сонгогдсон. Намын гишүүдийнх нь зүгээс ч МАХН өөрчлөгдөж, шинэчлэгдэх ёстой гэж үзэж буйгаа илэрхийлээд буй.  
Улмаар МАХН-ын намын дүрмийн шинэчлэл болон намын даргыг шинээр бүртгүүлэхээр  Улсын дээд шүүхэд хандаад байгаа. Тэгвэл шүүх хуралдаан өнөөдөр болох байсан ч энэ сарын 19 хүртэл хойшилсон юм. 
МАХН-ын зүгээс шүүх хуралдааныг хойшлуулах хүсэлтийг өчигдөр гаргаад байсан бол О.Баасанхүүгийн зүгээс ч  Улсын дээд шүүхээс нааштай шийдвэр гарна гэдэгт эргэлзэж байгаагаа илэрхийлж, мөн нэмэлт баримтуудтай танилцахаар шүүх хуралдааныг хойшлуулах хүсэлт гаргажээ. Гэтэл өнөөдөр Улсын Дээд шүүхийн гадна МАХН-ын ерөнхий нарийн бичгийн дарга Э.Эрдэнэжамъян хэсэг залуусын хамт ирж үймээн дэгдээлээ. Тэд шүүх хуралдаанд ирсэн МАХН-ын нийслэлийн намын дарга Л.Бямбасүрэнгийн биед халдаж, өндөг шидэж асуудал үүсгэсэн нь цагдаагийн алба хаагчдыг түргэн авахуулсан юм. Зодуулсан иргэний хувьд өнөөдөр цагдаагийн байгууллагад гомдол гаргаж байгаа аж.