Япон Улсад суух элчин сайдад өмнөх Засгийн газраас Г.Тэнгэрийг томилох санал оруулсан ч Ерөнхийлөгч Х.Баттулга татгалзсан хариуг өгөөд байгаа билээ.

Ерөнхийлөгчийн зүгээс нэр дэвшигч Г.Тэнгэр тухайн албыг хаших насны шалгуурыг хангаагүй, мөн түүнийг томилохдоо төрийн албаны мерит зарчмыг зөрчсөн, Монгол Улсын гуравдагч хөрш оронд суух Элчин сайдын өндөр хариуцлагатай албыг зохих түвшинд хашиж чадахгүй гэж үзэж байгаагаа албан бичгээр уламжлан, тохоон томилох тухай зарлиг болон Итгэмжлэх жуух бичгийг гаргах боломжгүй хэмээн мэдэгдсэн юм.

Тэгвэл зарим хэвлэлээр Ерөнхийлөгч Х.Баттулга Японд суух элчин сайдаар Ерөнхийлөгч өөрийн бие төлөөлөгч Д.Дагвадоржийг томилно гэх мэдээлэл цацагдаад байна. Уг асуудлаар Ерөнхийлөгчийн Тамгын газар, “Одоогоор Засгийн газраас элчин сайдыг танилцуулаагүй байна. Д.Дагвадоржийг томилно гэсэн нь албан бус мэдээлэл” гэх тодруулгыг хэвлэлд өгчээ.

Тэгвэл баттай эх сурвалжаас авсан мэдээллээр Япон Улсад суух бүрэн эрхэт элчин сайдад Д.Дагвадорж бус УИХ-ын гишүүн асан Д.Кёкшюзан Батбаярын нэр яригдаж байгаа юм байна. Тун удахгүй Гадаад харилцааны яамнаас Д.Кёкшюзан Батбаярыг элчин сайдад нэр дэвшүүлэх асуудлыг Засгийн газрын хуралдаанд оруулж, танилцуулахаар зэхэж байгаа гэх мэдээллийг ч өгөв.

Д.Кёкшюзан Батбаярын тухайд 2008-2012 онд УИХ-ын гишүүнээр, 2012-2014 онд Ерөнхий сайд Н.Алтанхуягийн орон тооны зөвлөхөөр тус тус ажиллаж байсан улстөрийн туршлагатай. Мөн тэрбээр 2017 оны долоодугаар сараас саяхныг хүртэл Ерөнхийлөгч Х.Баттулгын орон тооны бус ахлах зөвлөхөөр ажиллаж байгаад өөрийн хүсэлтээр ажлаа өгөөд байгаа юм.

Д.Дуулим