ОХУ-ын Чебоксар хотод арванхоёрдугаар сарын 1-2-нд чөлөөт бөхийн эмэгтэйчүүдийн дэлхийн цомын тэмцээн болно. 16 дахь удаагаа  зохиогдож байгаа тус тэмцээнд Монгол, Япон, ОХУ, АНУ, БНХАУ, Азербайжан, Швед, Украин гэсэн найман улсын шигшээ баг өрсөлдөх юм.  “Дэлхийн цом”-ын тэмцээний сугалаагаар манай эмэгтэйчүүдийн шигшээ баг “Дэлхийн цом”-ын зургаан удаагийн аварга БНХАУ болон Азербайжан, дэлхийн аварга Юлия Ткач тэргүүтэй Украйны шигшээ багтай “В” хэсэгт багтжээ. Харин Дэлхийн цомын найман түрүүг авсан япон, нэг удаагийн аварга АНУ, зохион байгуулагч орон ОХУ, Скандинавын хойгийн Шведийн шигшээ баг “А” хэсэгт хуваарилагдсан байна. Энэ тэмцээнд оролцохоор өнгөрсөн долоо хоногт Польшид болсон чөлөөт бөхийн 23 хүртэлх насны ДАШТ-д оролцсон  эмэгтэйчүүдийн шигшээ баг  Чебоксарыг зорьжээ.