Нийслэлийн МАН-ын 2016-2020 оны мөрийн хөтөлбөрт тусгагдсан “Аз жаргалтай Улаанбаатар” хөтөлбөр амжилттай хэрэгжиж байна. Өөрөөр хэлбэл, сая, сая төгрөгөөр хэмжигдэх хөшөө дурсгалаар амжилттай үргэлжилсээр.  

Нийслэлийн удирдлагуудын даапаалсан, нүд хуурсан үйлдлүүдийг  анзаарах сөхөөгүй стресстэй амьдардаг Монголчууд энэ удаад хөшөөг бол олж харж. Сошиал медиагаар нэг стресс дээр стресс.  Эсхүл түгжрэл, утаа, цалин цавуунаас өөр зүйлд сатаарч бухимдаад арай дээр ч юм уу.

Инээд хөөр, баяр баясгалантай алхаж байгаа гэр бүлийг дүрсэлсэн тус хөшөө нь хотын гудамжны хэсэгхэн орчинд өнгө нэмэх хэдий ч шийдлийн хувьд үүнийг арай л нүдээ олоогүй шийдэл гэж үзэх хүмүүс олон гарчээ. Зарим нь бүр уг хөшөөнд утааны маск зүүлгэхгүй бол угаартаад унах вий, хайран мөнгө гэж хошигнож байх жишээний. 

Нөгөөтэйгүүр 27.4 сая төгрөг хэзээ хог дээр хэвтэх бол гэж гайхах. Хөшөөнд зориулах ёстой 50 сая төгрөгний төсвийн ихэнх хагас нь гурван хөшөөнд явжээ. Харин үлдсэнгээр нь хөшөө засварлаад өнгөрөх болов уу даа. 

Ер нь хөшөө гэдэг мөнгө угаах арга бүр гаарч байна. Уг нь төрийн мөнгө гэж байхгүй иргэн, аж ахуй нэгжийн татварын мөнгө л гэж баймаар. Магадгүй ингэж хэлэхээр хөшөө, дурсгал бол хот тохижилтын нэг элемент гэж ам таглах биз. 

За ямартаа ч “Аз жаргалтай Улаанбаатар” хөтөлбөр хэрэгжих биш хөшөө болон мөнхөрлөө. Энэ хөшөө баригдаад төсөв нь гараар нь дамжсан цөөхөн хүн аз жаргалтай болсон байх. 

Д.Дуулим