Солонгост хараар ажиллахаар очоод дуучин болж орхисон аз нь шовойсон залуу С.Гантогоо эх орондоо охидын шүтээн болсон гэнэ лээ. “Яг түүн шиг” шоунд бараг л трансжендер болох шахтлаа эмэгтэй дүрд хувирч тэр нь ч догь зохиж байгаа тэрбээр авьяаслаг төдий зэрэг. Саяхан “Cinema Awards” нэр хүндтэй наадмын тайзнаа ая дуугаа өргөх боломжоос ч шүүрээд авсан тэрээр “Камертон”-ы “Харууслын аяз” дууг англи хэл дээр хөрвүүлэн ковер дуулсан нь сэргэлэн сонголт байлаа.
МУБИС-ийг Газарзүйн багш мэргэжлээр төгссөн тэс хөндлөн хүн урлагийн од болно гэдэг сонин. Гэвч одоогоор тэр будаа идэж байна. Сайн будаа идэх ч бас муу хувилбар биш. Сайн хуулж сурахаас л бүх зүйл эхэлдэг дээ. Дуулах хүсэлдээ хөтлөгдөн караокед дуулсаар байгаад эзнээс нь үнэгүй дуулах зөвшөөрөл авч байсан нь түүний хэр тууштайг илтгэх нэг нотолгоо. Магадгүй сайн ковер дуулаад байвал хамтлагууд түүнд санал тавих ч юм билүү хэн эс мэдлээ.
Сэтгэгдэл (2)