Экс Ерөнхий сайд Ч.Сайханбилэгийн гэргий О.Байгаль тэртээ 2000-аад оны эхээр хүүхнүүдийн хумс, арьсыг арчлан хамгаалах жижигхэн салоноор бизнесийн гараагаа эхлүүлж байв. Эр нөхөр нь Америкт суралцаж байхад угийн дайчин хөдөлмөрч бүсгүй ийм эрдэмд суралцаж, эх орондоо ирмэгцээ хэрэгжүүлсэн нь энэ байв. Удаа ч үгүй “Голомт” хотхонд “Байгаль бьюти” салон нээлтээ хийж, фронтын давшилт хийснээр тэрээр гоо сайхны бизнест эргэлт буцалтгүй хөл тавьж, тэр цагаас хойш эр нөхрийнхөө гар харсан эрх муужгайхан байхаа больсон.
Ийн гоо сайхны бизнест баттай хөл дээрээ зогссоныхоо дараа үнэт эдлэлийн бизнест “гар дүрж”, өөрийн нэрээр нэрийдсэн брэнд гаргасан нь Ч.Сайханбилэг ноёнтон засаг толгойлж байх үетэй бараг давхацдаг байх шүү. Нэг бүр нь дунджаар 10-20 саяар үнэлэгдэх цагаан алт, байгалийн цэвэр шүр, номин зэрэг үнэт эрдэнийн чулуугаар урлах “Baigal” брэндээр чухамдаа баячуудын охид, эхнэрүүд л гоёж гооддог. Тэгвэл хатагтай энэ удаад Valentino брэндийг албан ёсоор оруулж ирснээр бизнесийн хүрээгээ тэллээ. Шангри-ла моллын А зэрэглэлд үүд хаалгаа нээсэн тус брэнд дэлгүүрийн нээлт өнгөрсөн долоо хоногт болж, эзэгтэй өөрөө 3,300 ам.долларын үнэтэй Valentino гал улаан даашинзаар гоёсон нь олон нийтийн сүлжээнд нэлээдгүй хэл ам дагуулсан сэдэв байлаа. Эр нөхөр нь төрийн өндөр албан тушаал хашсаар ирсэн учраас эхнэрийнх нь энэ мэт өндөр үнэтэй хувцас сэлт олон нийтийн нүд чихэнд ердийн биш тансаглал мэтээр хүрдэг нь ч бас аргагүй. Хэрэв тэр жирийн нэг хүний эхнэр, жирийн нэг Байгаль байсан бол энэ мэт хэл ам дагуулахгүй байсан биз ээ.
Сэтгэгдэл (18)