Цэл залуугаараа МУГЖ цолоор энгэрээ мялааж асан Г.Ариунбаатар анх гарч ирэхдээ л давилуун, сагсуу гэгдэж байв. Сонгодог урлагийн олимп гэгддэг М.Глинкийн нэрэмжит Олон улсын дуурийн дуулаачдын 24 дэх удаагийн тэмцээнээс Гран при хүртэхдээ 21, ОХУ-д болсон 1600 гаруй дуучид оролцсон Муслим Магомаевын нэрэмжит олон улсын дуурийн дуулаачдын наадмын тэргүүн байрыг эзлэхдээ тэр 26 настай байв. “Дуурийн дуучин гээд би Бөхийн өргөөнд дуулахгүй байлтай биш” гэж даруухан загнаж байсан хархүү өдгөө «Мариинский» театрын гоцлол дуучин болохын сацуу өнгөрөгч 9 дүгээр сараас эхлэн дэлхийн хэмжээний аялан тоглолтуудаа хийж буй. Англид тоглох үеэр нь Английн хатан хаан өргөөндөө урьж Букингемийн ордонд хатан хааны гэр бүлтэй оройн зоог хамт барьсан нь жирийн Монгол хүүд заяасан онцгой хувь тавилангийн илэрхийлэл гэлтэй. Ийн 27 насан дээрээ дэлхийд тоогдсон Монгол сонгодог хархүү алдрын оргилд хүрсэн ч хаа очиж даруухан болчихов уу гэлцэх болжээ. Хувийн амьдралын тухайд эхнэрээсээ нэг хэсэг салж сарнихдаа тулсан ч эргэн нийлж элэг бүтэн амьдарч буй. Түүнээс өмнө амьдралтай, үртэй байснаа ч нуудаггүй Г.Ариунбаатарын хувьд урлагийн амжилт ч, хувийн амьдрал ч аль аль нь эрт эхэлжээ. Одоо түүнийг онгирсон ч хэн ч юу ч хэлэхгүй болтол өндөрлөгт тэр нэгэнт хүрчээ. “Чадаж байвал онгирох хэрэгтэй” гэж хэлэх дуртай хархүү цагаа тулсан чинь даруухан юм гэгдэн ард түмэнд хайрлагдах болж.
Сэтгэгдэл (9)