Уг нь бол Ц.Хүсэлбаатар найруулагч гэргийгээсээ яг 10 см өндөр юм гэнэ лээ. СУИС-т сурч байхдаа хичээл заадаг Драмын театрын жүжигчин хархүүд дурлан болзож яваад багшдаа баригдаж л дээ. “Өлзийхүү, чи өөрөөсөө есөн хуруу өндөр залуутай явж байхаар хичээлдээ анхаарвал зүгээр байх шүү” гэхэд их л ичсэн гэдэг. Дурласан үедээ хичээлдээ муудсан охин өөртөө гомдон уйлж хор шар нь буцлан мэрийсээр тэр жилээ онц төгсөж 300 төгрөгийн стипенд авч байжээ. Харин одоо бол тэд урлагийн ертөнцийн сайхан хосуудын тоонд зүй ёсоор бичигдэнэ. Мэргэжлийн загварын ертөнцийн акулууд тэр бүр тогтсон амьдралгүй, ихэвчлэн хүүтэй байдгаас ч тэр үү хожим охиноо тайзнаа алхахыг хардаггүй гэж хэлж болно.
Харин С.Өлзийхүү, Ц.Хүсэлбаатар хоёр Дэлхийн миссийн тайзнаа охиноо гунхаж явахыг харсан азтай аав, ээж хоёр. Өндөр нуруу, типаж сайтай дүр төрх эдний гэр бүлийн удмын гялбаа л даа. Охин Х.Баярмаа олны нүдэнд танил болж муухан одоос тод гялалзсан бол хүү нь харин “гэрэлд цохиулаагүй” байгаа. Эдний гэр бүлийн 90 хувь нь урлагийн хүмүүс тул хүүгээ яасан ч урлагийн хүн болгохгүй гэж ээж нь хатуу шийдсэн юм билээ. Дэлгэцээр бол дүүхэлзсэн хямсгар хээнцэр бүсгүй гардаг ч бодитоороо их л амар амгалан дөлгөөн тайван хүн гэж С.Өлзийхүүг магтдаг хүн олон юм билээ. Тиймдээ өнөө хүртэл гавьяатын одон тэмдэггүй тууж яваа биз. Ингэхэд түүнийг гавьяат аваагүй гэхэд олон хүн итгэж яддаг. Хэзээ цагийн “Цахилж яваа гөрөө” киноны Должин билээ дээ, хичнэн ч жил тайзнаа амьдрав, гавьяатгүй гэхээр сонин л доо, ер нь.
Эх сурвалж: www.grandnews.mn
Сэтгэгдэл (10)