Юу юугүй УИХ-ын гишүүн болохоор дээл хувцсаа зэхэж суусан эрхэм банкир Б.Мэдрээгийн догдлол түр дарагдаж. Уг нь Р.Бурмаа албаа өгвөл түүний нэр яг ард нь дурайж байгаа юм л даа. Ер нь жагсаалттай эс жагсаалттай тэр гишүүн болбол болох л хүн. Тэртээ 1977 оноос хойш банк санхүүгийн салбарын хөгжил дэвшлийн төлөө алд биеэ алдартал зүтгэсэн. Гавьяат эдийн засагч цолыг ч гуйж биш гуядаж авлаа. Банкны салбарт 23 жил тасралтгүй ажилласан хүн зүгээр гарын арван хуруу шигээ мэдэхээр барахгүй толгой гэж компьютер, амьд архив болоо биз.
Хөөрхий зээлэн дөрөөн дээр дэнжигнэж амьдардаг улс төрчид банкны луухгар эр орж ирнэ гэхээр өмссөн костюм, унасан машин, амьдардаг хаус нь бүгд зээлийнх тул аягүйцдэг л биз. Энэ ч яахав баярхуу хийрхүү монгол араншин. Яадаг юм, зээлтэй болохоос хулгайлсан биш, зээл төлөх нь үнэн, үхэх нь үнэн. Ингэхэд түүний гэргийг манайхан хөгжмийн зохиолч Г.Бирваагийн охин гэж таасаар ирсэн. Төгөлдөр хуурч Б.Мөнхшүр хэмээх бүсгүйтэй эхнэрийнх нь нэр адил байсан юмуу даа. Угтаа бол гэргий нь химич мэргэжилтэй, ханьдаа хүү охин хоёр төрүүлж өгсөн жирийн монгол бүсгүй. Химич-төгөлдөр хуурч байж болох эсэх бас дараагийн шатны асуудал л даа. Жүжигчин-улс төрч л манай парламентад дутаад байгаа шиг анагаахт төгөлдөр хуурын хичээл нээрээ дутаж байж мэдэх. Улаанбаатарын уугуул хүү Б.Мэдрээ улс төрийн рингэнд гарсан ч, эс гарсан ч яах вэ гэсэн шиг ханьтайгаа зугаалж ганц нэг папарацидуулах сургууль хийж буй нь энэ. Дараагийн удаад зураг даруулахдаа гэргийгээ хажуудаа авахгүй бол та өөрөө том биетэй болохоор ардаас чинь сайн харагдахгүй байна шүү, Мэдрээ дарга аа!
Эх сурвалж.www.grandnews.mn
Сэтгэгдэл (9)