Эгэл иргэдээ харж үзэхгүй бол нэг л нартай өдөр Зайсангийн баячууд руу жирийн иргэд өндөг, чулуу бариад дайрна гэж учир мэдэх улс ярих нь бий. Харин тэдгээр баячууд нь сэтгэлзүйн хувьд MCS-ийн эзэнт гүрэн рүү өндөг, чулуугаар зогсохгүй хүрз зээтүү бариад дайрахад бэлэн байгаагаа илэрхийлэх болжээ. Арга ч үгүй биз ээ. Энэ том группийн гар хөлөө дүрээгүй, оролцоогүй бизнесийн салбар гэж гуравхан сая хүн амтай Монголд байхгүй байх шүү. Эцэс сүүлдээ эх орноо худалдаад авчихсан гэж ил цагаахан хэлэх болсон нь ч үнэний ортой. АСЕМ-ын дээд хэмжээний уулзалтын ихэнх ажлыг мөн л MCS авсан юм байх. За энэ ч яахав, оршил маягийн зүйл.
Группийн тэргүүн хатагтай Д.Батмөнх мичин жилийг ихэд барцадтай угтсан. Оны өмнөхөн түүний удирддаг “Орчлон” сургуулийн цэцэрлэгт 4 настай хүү бассейнд живж амиа алдсан аймшигт хэрэг гарсан. Залуухан аав ээжийн амин эрдэнэ болсон цорын ганц хүү харамсалтайгаар амиа алдсан явдал харуусал, гашуудал дүүрэн байх нь ойлгомжтой. Гэвч хэрэг явдлаас хойш 7 хоногийн дараа хүү амьсгал хураасан бөгөөд хүний алтан амь л болсон хойно ар гэрийнхэн нь гомдол зарга дүүрсэн байсан бол төд удалгүй хэргийн талаар дурсахаа ч больсон юм байх. Ам ангайчихвал амьтан хүн дуулчих вий гэсэн аятай айж ширвээдсэн ар гэрийнхэн нь “чишшш” хэмээн амаа дарах болсон нь тус цэцэрлэгт хүмүүждэг хүүхдүүдийн аав ээжийн гайхашийг барж байгаа гэнэ лээ. Цагдаа хуулийнхнаас авахуулаад ар гэрийнхнийх нь хүртэл амыг барьж, хэргийн нам дарсан нь Д.Батмөнх хатагтайн гайгүй сайн гаршсан арга барил нь хэмээн “Орчлон”-гийн эцэг эхчүүд шивэр авирхийх ажээ.
Ингэхэд дунд боловсролын өртөг гэж ертөнцийн хаа ч байхгүй өндөр болсон цаг дор бид амьдарч байгаа. “Орчлон” сургуулийн жилийн төлбөр гэхэд15 саяас эхэлдэг бөгөөд хүүхдээ цэцэрлэгт нь хүмүүжүүлье гэвэл жилд 12 сая төгрөг төлнө. Тэгсэн атлаа л Д.Батмөнх хатагтайн ааш аяг гэж дийлдэхийн аргагүй болсон, сүүлийн жилүүдэд бүр ч авиргүй болсон нь ийм муу юм дуулгахын дохио байж хэмээх эцэг эхчүүд олон байх юм билээ. Хүүхдээ аль л гайгүй л сургуульд сургачихсан, гайгүй сайн хүн болгочихсон гэсэн орчин цагийн эцэг эхчүүдийн хүслэн, нөгөө талд энэ эрэлтэн дээр эрэмшээд даам гарчихсан хувийн сургуулиудын ёс бус авир нэгэн бяцхан амьтны алтан амиар үнэлэгдэж огтлолцсон харамсалт хэрэг цаашид хэрхэн шийдэгдэхийг харах л үлдлээ. Мөнгөтэй нь засагладаг, хаанчилдаг, хамаг бүгдийг нь худалдаад авчихдаг болсон улс ч гэлээ ядахдаа хүний алтан амины үнэтэй сургамж нь бүү бүдгэрээсэй.
Эх сурвалж: www.grandnews.mn
Сэтгэгдэл (27)