Муу нүүрт хэмээх Гал бичин жил өнгөтэй сайхан гарч шидрүү мөнгөн өвлийг өнтэй давсны баяр Сар шинэ өргөн дэлгэр боллоо. Мэндийн цэнхэр хадаг юугаа дэлгэн барьсан зон олондоо “Гранд” хавар урин дуудсан шинэхэн дугаараа өргөн барьж байна.
Энэ дугаарын зочноор “Оргил”-ын Ж.Ганбаатар уригдлаа. Налайхын Ганбаа найрсаг, хөдөлмөрч шаргуу чанараараа ихийг босгосон ч “Би түмний өмнө сэлэм эргүүлж явдаг баатрын дүрд тохирохгүй. Харин зүгээр л арын албаны тасралтгүй хөдөлмөрлөдөг дүр” гэж зөөлөн дуугарах. Арван найман насандаа ганзагачдын эгнээнд хөл тавьсан дэлхийн хэмжээнд наймаа “ярьдаг” түүний ертөнц сонихон байлаа. Жинхэнэ баатрууд магад арын эгнээнд байдаг юм биш биз?
Чих дэлдийхгүй хачирхахгүй байх арга үнэхээр алгаа. Цаана чинь 53 насандаа таяг тулах бүү хэл Алдарт эхийн одонгийн болзол хангаж байна. Тэр хатагтай чухам хэн болохыг бид анхлан дуулгаж байна. Монголын сор болсон хурдан удамт хүлгийн эзэн байх заяанд төрсөн уяач эрхмүүдийн түүх, Поп хэмээх шинэ нэр томьёо хүч түрэн нийгмийн үзэгдэл болж буйн цаад ньюанс, чухам хэн хэн Монгол Поп дэлгэрүүлэгчид болох, аав хөвгүүдийн сонирхолтой амжилтын түүх гэхчлэн сонирхолтой нийтлэлүүд энэ дугаарт мөн багтсан.
Харин таны алжаал тайлж мэлмий баясгах фото мэдээг бид цагаан сарчдын “арми” хэрхэн шинэлсэнээс бэлтгэлээ. Жил бүр энэ үед трэнд дэлгэрдэг. Монголчууд бид хямралаа гээд гундаггүй, зунтай гээд зутардаггүй тийм л амны хишигтэй ард түмэн.
Цас ханзарч яргуй дэлгэрэх, төл малын дуу цангинах урин хавар удахгүй ирнэ. “Гранд”-ын шинэхэн дугаар ийнхүү таны өмнө дэлгэгдэж байна.
Сэтгэгдэл (8)