“Монгол тулгатны зуун эрхэм” нэвтрүүлгийн нууц бичлэгүүд алдагдаж, цахим ертөнцөд тарсан хэрэг өнгөрсөн амралтын өдрүүдийн гол шуугиан байлаа. Экс тэргүүн хатагтай О.Цолмонгийн “Би хор найруулах юм бол Ц.Элбэгдорж, С.Баяр, Ц.Нямдорж эд нараас арав дахин илүү хор найруулж чадна”, П.Анужингийн “Аав намайг 2016 оны сонгуульд нэр дэвшихээ л бод ” гэх мэт ноц бүхий үгтэй эл бичлэг цацагдсан даруйдаа ёстой олон нийтийг цочирдуулсан. /бичлэгийг та энд дарж үзнэ үү/.
Энэ их шуугианы дараа өнөөдөр “Херо энтертайнмент”-ын найруулагч Б.Баатар хэвлэлийн хурал хийж, олон нийтэд албан ёсны мэдэгдэл хийсэн. Гэхдээ тэр ганцаараа ирсэн нь анхаарал татахгүй байж чадсангүй. Тус нэвтрүүлгийн хөтлөгчөөр олонд танигдсан, нэвтрүүлгийг санаачлагч, продюссер гэгддэг П.Анужин ядахдаа ирээгүй нь хачирхалтай. Эсвэл тэрбээр нэвтрүүлийг санаачилж, продюссерлэдэг гэдэг нь худлаа байж таарна. Анхнаасаа улс төрд хүч үзэж, нэр дэвших зорилготой, үүний тулд олон нийтэд танигдах шаардлагатай байсан учраас тийнхүү үзэгчдийг хуурсан байж болох талтай.
Ирэх сонгуульд нэр дэвшихээ ч энэ бичлэгэн дээр тэрээр хэлээд авна лээ. МАН-ын Удирдах зөвлөлийн гишүүн энэ бүсгүй энэ нэвтрүүлэг хийх болсноос хойш Б.Баатартай гэр бүлийн харилцаатай болж, улмаар хоёр охиныхоо ааваас салсан, гэвч өнгөрсөн зунаас хойш нэр бүхий баарны эзэн залуутай амраглаж байгаад экс нөхөр, Б.Баатар хоёртоо “гардуулсан”, тэр цагаас хойш Б.Баатар, П.Анужин хоёрын харилцаа хоёр тийш болсон гэх мэтээр үлгэр домог мэт, кино хийвэл адал явдалт adventure драматик кино гарахаар хэмжээний их яриа, худал үнэн нь мэдэгдэхгүй хов жив яригдсаар ирсэн.
Эцэстээ ноц бүхий бичлэг нь цацагдаж хэрэг явдал маш өндрөө авсныг илтгэлээ. Ам л нээвэл хүн чанар, ёс суртахуун ярьдаг бүсгүй камерын ард, хөшигний цаана тун ч увайгүй гэмээр ярьж, үйлддэг нь ийн баримт нотолгоотой дэлгэгдсэнээр эл нэвтрүүлгийн нэр хүнд навс унах нь ойлгомжтой. Энэ бүхнээс илүү чухам хэн, хэзээ, ямар зорилготойгоор эл нууц бичлэгийг авч олон нийтэд цацсан нь хамгаас сонирхол татсан асуудал. Хэдхэн сарын дараа УИХ-н ээлжит сонгууль болно. Ийм үед бичлэг цацагдсан нь яавч цаанаа том учир шалтгаантай байж таарна. МАН-ынхан болоод улс төрийн хүрээнийхэн нь Б.Баатар өөрөө энэ бичлэгийг цацсан гэж ярьцгааж байгаа гэх “шуум” ч бидэнд ирсэн. Зарим нь “Женко” Х.Баттулгыг хардаж буй. Харин Б.Баатарын тухайд албан ёсны хэвлэлийн хурал зарлаж, дээрх таамгуудыг эрс үгүйсгэж, маш нарийн судалгаа, зохион байгууллалттай хулгайн хэрэг хэмээн мэдэгдсэн юм. Ингээд түүний яриаг бүрэн эхээр нь танд хүргэе.
Зуун эрхэмд орохоор 50 хүн хүлээж байна!
Нэвтрүүлгийн явцад манай хоёр хөтлөгч хүмүүсийг ярьсан, эсвэл тэр хүнд хэтэрхий тал зассан маягтай дүрслэл гарсан бол энэ цэвэр найруулагчийн өөрийнх нь тавилт. Би хөтлөгчиддөө яг иймэрхүү байдлаар асуу, энэ талаас нь хэлээтэх гэж хэлдэг. Тийм учраас хөтлөгч нарын өөрийнх нь үнэт зүйл ч юм уу, итгэл үнэмшил маш бүдгэрдэг. Тэд яг хэлснийг хийдэг. Үзэгч та бүхэнд эвгүй сэтгэгдэл төрүүлсэн бол цэвэр, зуун хувь найруулагчийн буруу гэж хэлье.
Би зүгээр ингэж л хэлмээр байна. Би улс төрд орох ч үгүй, улс төрч ч биш. Би өөрөө телевиз, киноны салбарт насан туршдаа ажиллаж байна. Эндээс урваж явахгүй. Тийм учраас санасныхаа зоргоор хасаж нэвтрүүлэг хийхгүй. “Зуун эрхэм”-д орох 50 хүн хүлээж байна. Би өөрөө хүний итгэлийг эвдэж ийм зүйл хийнэ гэдэг хэзээ ч байхгүй зүйл. Тиймээс манайхнаас бичлэгийг цацна гэсэн ойлголт байхгүй. Тэр утгаараа бид энэ хулгайг бол хууль хяналтын байгууллагад өгсөн. Процесс явагдаж, шалгаж байна.
Хэзээ болсон нь тодорхойгүй ч энэ хулгай илэрнэ
Бид хулгайг яг төдийд өдийд болсон гэж мэдэхгүй байна. Ажиллагаа явагдаж байгаа. Бүх юм илрээгүй байгаа үед задалж болохгүй байна. Сошиал ертөнцөөр хийгдсэн бүх хулгай, бүх зүйл өөрөө илэрч байдаг. Яагаад гэвэл бүх юм нь ул мөрөө үлдээж байдаг учраас энэ хэрэг илэрнэ. Монголын цагдаа болоод төр тунгалаг байгаа гэдэгт би итгэж байна.
Улс төрийн хэлбэртэй уран бүтээлийг хулгайлж оюуны маш том хулгай хийж ийм хэлбэрээр цацаж байгаа нь өөрөө маш гутамшигтай зүйл юм. Сэтгүүлчид та бүхэн хулгайлагдсан дүрсэн дээр юу ярьж байгаа нь биш гол нь цацаж байгаа процессын тухай сурвалжилж тэрний тухай илүү шүүмжлэх нь ёс зүйтэй байх гэж бодож байна.
Энэ бичлэгэн дээр ярьсан яриа, сэдвүүд тухайн үеийн байдал найруулагчийн шийдлээс бүтэж бий болдог. Тухайн хөтлөгч ч юм уу редактор өөрийнхөөрөө ярих гэхээсээ илүү найруулагчийн уран сайхны тавилттай нэвтрүүлэг учраас тэр тал руугаа байдаг юм шүү. Тэрийг та бүхэн ойлгож анхаараарай гэж би хүсэж байна.
Бид улс төрийн холбогдолтой ганц л нэвтрүүлэг хийсэн
Улс төрийн хувьд утгагүй байдал үүслээ. Тухайн нэвтрүүлгийг хуулж олон нийтэд цацаж, хүмүүст муухай сэтгэгдэл төрүүлэхээр монтажлаж гаргана гэдэг манай улс төрийн ертөнц доошоо бүр доошоо орсны хамгийн том илэрхийлэл гэж бодож байна. Манайх улс төрийн студи, улс төрийн редакц биш.
Улс төрийн холбогдолтой нэвтрүүлэг бид ганцханыг л хийсэн. Энэ нь Монгол улсын ерөнхийлөгч Цахиагийн Элбэгдоржийн сонгуулийн өмнө хийсэн нэвтрүүлэг. Улс төржүүлж харах юм бол улс төрийн нэвтрүүлэг байх.
Энэ бол маш нарийн судалгаа, зохион байгуулалттай хулгайн хэрэг
Манай архив файл хэлбэрээр хадгалагддаг. Манайдаа л хамгийн баталгаатай, найдвартай серверт хадгалсан. Гэтэл файлууд яг л мэргэжлийн дагуу хуулагдсан байсан. Энэ бол маш нарийн судалгаа. Маш дээр үеэс манайхыг судалж хийсэн ажиллагаа гэж бодож байна. Ганцхан хүний ч юм уу эсвэл хэсэг бүлэг хүмүүсийн хийсэн хэрэг биш. Маш том зохион байгуулалттай хулгай болсон гэдгийг дахин цохон тэмдэглэе. Бид хулгайд юмаа алдсан нь Монголын сэтгүүлзүй, сэтгүүлчдийн байр суурьт нөлөөлсөн үйл ажиллагаа гэж бодож байгаа учраас та бүхнээсээ уучлалт хүсье.
Бид Зориг агсны баримтат кино хийж байгаа. Яг тэр үед серверээс тусад нь тавьчихсан байсан “хаард” бас алга болсон. Үүн дотор юу байсан гэхлээр сонингийн хайчилбарууд, тэр үед хүмүүсийн ярьж байсан сонин дээр байсан зүйлүүдийг скайнердчихсан файлууд байсан.
Н.Энхбаярт биш Ц.Элбэгдоржид тэгж долигносон бол бид ёс зүйгүй байж магадгүй
Ерөнхийдөө “Херо энтертайнмент” Намбарын Энхбаярын нэвтрүүлгийг эхлэхээс авахуулаад дуусах хүртэл маш их дарамтанд байсан. Бүх л уран бүтээлчид, тэр дундаа хоёр хөтлөгчид. Янз бүрийн хүмүүс нэлээн нэр бүхий хүмүүс ч над руу ярьж янз бүрээр дарамталж байсан тохиолдлууд зөндөө.
Та бүхэн ойлгож байгаа байх. Намбарын Энхбаяр гэж хүн дээр мандан бадарч байх үед нь, хаан шиг байх үед нь очсонгүй. Хамгийн хэцүү ганцаардсан байх үед нь очсон. Тийм учраас тэр хүний сэтгэл зүрх рүү илүү ойртохыг хичээсэн. Зовлонгоос нь нимгэлэхийг хичээсэн. Тэр процессын хамгийн эвгүй сценүүдийг гаргаж тавьсан нь харамсалтай байна. Магадгүй нэг хүн рүү хэтэрхий долигносон байна гэхээр дүрслэл ярианууд гарсан л даа. Бид мандан бадарч яваа, яг ид үе нь оргилж яваа удирдагч ч юм уу эсвэл Монгол улсын ерөнхийлөгчөөр яг одоо ажиллаж байгаа Элбэгдоржид ингэж долигнож ярьсан ярианы бичлэг байх юм бол ёс зүйгүй зүйл байж магадгүй. Монгол улсын түүхийг бид Намбарын Энхбаяр гэж хүний түүхэн дүрслэл, түүхэн яриагүйгээр бичиж болохгүй. Тэр утгаараа нэвтрүүлэг хийх хэрэгтэй байсан. Бид Монгол улсын бүх ерөнхийлөгчид санал тавьсан. Багабанди гуай тодорхой шалтгаанаар одоохондоо орж чадахгүй гэсэн хариу өгсөн учраас одоо гурвынх нь нэвтрүүлгийг хийчихсэн байгаа.
Цолмонг мундаг хаттай хүүхэн гэж боддог
Нэвтрүүлэгт ашиглагдаагүй дүрс гарсан нь энэ бас уран бүтээлийн эрэл хайгуулын нэг хэлбэр. Камераа асаачихсан байсан, урд нь яриа авч байсан. Зураг авалт явж байна гэдгийг хэн ч гэсэн мэднэ. Өөр зураг авалт хийж байгаад урт зураг авалтын үеэр хүн өөрөө камераа мартчихдаг. Ярьсан процессууд байсан. Тэрийг устгаагүй нь бид нарын буруу. Гэхдээ үүнийг бас зөвөөр ойлгох хэрэгтэй. Би бол Цолмон гэж хүний талд байгаа. Яагаад гэхлээр тэр хүн амьдралыг нь тийм болгочихсон, хамт хажууд нь байсан хүмүүс нь яаж урваж шарвахыг харсан. Амьдрал нь ингэж их эргэж, улс төр ингэж их савалж байгаа үед хэн ч гэсэн тийм үйлдэл хийнэ. Харин ч хаттай мундаг хүүхэн гэж би боддог. Тэр дүрснээс амьдралын үнэнийг нь харах нь бас зөв байсан болов уу гэж бодож байна. Гэхдээ энэ бол буруу зүйл. Би сая хэлсэн, хүнийг яриулахын тулд тайвшруулж камерыг мартуулдаг. Энэ бол миний л техник.
Намбарын Энхбаяр гэдэг хүн түүний гэр бүлийнхэн миний хувьд маш өөр төрлийн, маш ухаалаг, ухамсрын хувьд өөр төвшинд хөгжчихсөн хүмүүс юм уу даа гэж надад бодогдсон. Ингээд хэлэхээр намайг бас Намбарын Энхбаяртай холбоод ярих байх. Үнэндээ би Намбарын Энхбаяр гэдэг хүнийг хайрлаж хүндэтгэж энэ нэвтрүүлгээс хойш илүү дотно болсон. Урд нь би сайн таньдаггүй, мэддэг ч үгүй байсан.
Х.Баттулга энэ хэргийг хийгээгүй
Баттулга гишүүн бид хоёр адилхан зураачид. Дээр үеийн найзууд, ахан дүүс. Энэ бичлэг алдагдсан асуудал дээр ямар ч холбоо байхгүй. Яагаад гэвэл хар бичлэгэн дээр ч гэсэн гарчихсан байна лээ. Тулга хэрвээ нөлөөлдөг байсан бол тодорхой нэр бүхий хүмүүсийг оруулахгүй байсан биз дээ гэсэн яриа байна лээ ш дээ. Тэр бол тодорхой. Ямар нэгэн юм, мөнгө төгрөг бизнесийн холбоо байхгүй.
Тулга гэж хүн дээр би дахиад нэмээд хэлэхэд энэ хүнтэй яагаад холбогдоод байдаг юм бэ гэвэл мөнгө төгрөг гэхээсээ илүү итгэл үнэмшил гэдэг зүйл байдаг. Тэр дундаа уран бүтээлч хүн нээх мөнгөнд яваад мөнгөөр онгод ороод сэтгүүлчид ч гэсэн мөнгө өгөхөөр сайн юм бичих хүсэл төрөөд байдаггүй ш дээ. Торхой хэмжээгээр үнэт зүйл дээр дөрөөлсөн, нөхөрлөсөн андын нөхөрлөл бат бөх байдаг. Магадгүй Баттулга гэдэг гишүүн Монгол улсыг хөгжүүлэх тодорхой хэмжээнд өндөр албан тушаалд хүрээд цаашаа улсыг хөгжүүлэх хэмжээнд хүрээд явах юм бол би хажууд нь байхгүй. Харин сөрөг хүчин шиг байж өмнөөс нь сөрж ажиллаж чадна гэж би бодож байгаа. Тэгнэ гэдэгтээ ч итгэлтэй байгаа. Энэ цаг үед бол би найз нөхөр нь байж бүхий л зүйлд нь тусална гэж боддог. Энэ хугацаанд маш олон улс төрчтэй хамтарч ажилласан. Монголоо гэсэн, Монгол улсаа хөгжүүлье гэсэн улс төрч маш цөөхөн байдаг гэдгийг бас энд хэлмээр байна.
Сэтгэгдэл (31)