“Хүн хүндээ нандин” хэмээх үгнээсээ ч содон, үйлээсээ ч тод уриатай сэтгүүлч Н.Нандинцэцэгийн “Нандин” ном нээлтээ хийж уншигчдад бэлэг болон хүрлээ. Түүний сэтгүүл зүйн салбарт ажилласан хугацаа нь түүнийг хэн болох, хэр их чадвартайг шүүн тунгаасан гэж хэлэхэд болно.
Сургуулиа төгсөж сэтгүүлчийн гараагаа МҮОНТ-ээс эхлэн редакц, нэвтрүүлэгт хөтлөгч, сэтгүүлчээр ажиллаж байгаад NTV телевизэд орж “Нандиагийн ток шоу” нэвтрүүлгийг хөтөлдөг байсан тэрээр эргэн МҮОНТ-д орж продюсер, сэтгүүлчээр ажиллаж байгаа билээ. Өөрийн нэртэй нэвтрүүлгээ бэлтгэн гаргасан таван жилийн хугацаанд улс төр, урлаг соёл, тамирчид, эрдэмтэд болоод эгэл жирийн 800 гаруй хүнтэй ярилцаж, 200 гаруй дугаарыг үзэгчдэд хүргэн 2010 онд Монголын Телевизүүдийн Холбооны шилдгийн шилдэг шалгаруулах “Алтан шонхор” наадмаас “Шилдэг хөтлөгч”-ийн шагнал хүртэж байжээ.
Түүний эл номонд “Нандиагийн ток шоу” нэвтрүүлэгт оролцож байсан зочидтой хийсэн ярилцлаганы түүвэр 19 ярилцлага байгаагаас гадна сэтгүүл зүй хэмээх ертөнцөд хөл тавьсан 15 жилийн түүхийг өгүүлэх ажээ. Хүн хүндээ нандин “Нандин” ном телевизийн ярилцлагыг зурагт ном хэлбэрт буулгасан ахны бүтээл хэмээх тодотголоороо онцлог болж чаджээ.
Эх сурвалж: www.grandnews.mn
Сэтгэгдэл (6)