Үндэсний их баяр наадмын өмнөхөн төр засаг хишгээ хүртээдэг уламжлал энэ жил нижгэр сайхан болж өнгөрөв. Чингисийн талбайд баярын шуугиан хадаж шагналтнууд тодорлоо.
Б.Зангад гуай Хөдөлмөрийн баатар цол, Төрийн их хан хуурч Ц.Цэрэндорж гуай Ардын жүжигчин цол хүртсэн нь цаг үеэ олсон хэрэг байв. Энэ хоёр эрхэмд шагнал нь одоо л ирж буй болохоос аль хэдийнэ өндөр их хүндлэл хүлээхүйц дайны уран бүтээлчид байлаа.
Мөн Дорнод аймгийн Дашбалбар сумын малчин Д.Долгор, Ховд аймгийн Чандмань сумын малчин Ж.Дулам нар Гавъяат малчин цол хүртсэн. Харин Гавъяат тамирчин цолоор “Хүч спорт хороо”-ны тамирчин С.Мияарагчаа, Соёлын Гавъяат зүтгэлтэн цолоор орчуулагч, яруу найрагч, Ж.Нэргүй, Гавъяат жүжигчин цолоор дуучин Л.Болдбаатарыг тус, тус шагналаа. С.Мияарагчаа Х.Цагаанбаатар нарын хоорондох тулаан олон жилийн турш өрнөж чухам хэн нь шилдэг талаар маргасаар ирсэн. Боломж зөвхөн Цагаанаагийн өмнө нээгдэж С.Мияарагчаа олон ч удаа ард нь даруухан үлдсэн. Гэвч тамирчин хүний хичээл зүтгэл, итгэл тэвчээрээр сая төрд үнэлэгдлээ.
Олон нийт хамгийн их хүсэн хүлээж байсан шагналыг саяхан дуурийн урлагаар дэлхийд эх орныхоо нэрийг гаргасан хоёр залуус хүртэх байв. Тэдэнд Хөдөлмөрийн баатар ч өгөх ёстой гэж олон нийт уриалсан. П.И.Чайковскийн нэрэмжит олон улсын дуурийн дуулаачдын уралдаанаас Гранпри шагнал хүртсэн Г.Ариунбаатарыг 80 сая төгрөгөөр, Английн BBC агентлагаас зохион байгуулсан “Gardiff singer of the world” уралдаанд Данн Иохаан Сатерландын нэрэмжит буюу үзэгчдийн нэрэмжит шагнал хүртсэн дуучин Э.Амартүвшинд 20 сая төгрөг урамшуулал болгов.
Мөн л энэ зуны дуулиан болох Авъяаслаг Азичууд шоу нэвтрүүлгийн хоёрдугаар байрын шагнал хүртсэн Хөсөгтөн хамтлаг 24 сая төгрөгийн урамшуулал хүртэн төр засагтаа үнэлүүлэв. Эдийн засаг хямарсан ч гэсэн төр эрдэнэсийн сангаа нээх үедээ нээлгүй л яахав. Хошин урлагийн дунд үеийн чадварлаг жүжигчдийн нэг Ааяа буюу Ш.Алтанцэцэг МУГЖ хэмээх эрхэм алдрыг хүртэв. Түүний хувьд Багшийн дээдийн Кино драмын ангийн төгсөгчдөөс төрсөн 5 дахь гавъяат нь болж буй юм.
Ямартай ч энэ жилийн шагналтнууд дунд “Тоон дотор үсэг” гэгчээр ялихгүй шалихгүй дэл сул хүмүүс байсангүйд олон нийт олзуурхав.
Эх сурвалж: www.grandnews.mn
Сэтгэгдэл (13)