Уг нь бол Баяраа өөрөө л уначихсан юм байна лээ ш дээ гэдэг шиг “МАКС” Ганбаа хүний толгой дээрээс төмөр шидэж алаагүй л дээ. “Макс өргөө” компанийн захиалгаар барьж байсан “Crown center” төвийн барилга дээрээс төмөр унаж “Ланд-200” маркийн машины жолооч газар дээрээ нас барсан хэрэг нийгмийг хиртхийлгэсэн тэр үеийг хүмүүс мартаагүй. Зүв зүгээр машинаа унаж гэрээс гараад газар дээрээ нас барах тохиолдол байж болох юм гэсэн сургамж. Мэдээж тэр барилга стандартын дагуу баригдаагүй байсныг тавдугаар ангийн хүүхэд ч ойлгохоор хэрэг.
Гэвчиг Мэргэжлийн хяналт нээх гоё олон тоотой үзүүлэлтээ барьж очоод яг юу юу хаанаа зөрчсөнийг нягталсан боловч учрыг нь олоогүй. Олохгүй байх төөрөгдлийг эрхэм Ганбаа хийсэн, нэр цэвэр үлдсэн гэж хүмүүс хардсан. Угаас энэ төрөлдөө гаршсан хүн тул түүний дээр зөвхөн гэрэлт алтан нар л байдаг юм биш үү? Шүүх, хяналт ер нь хаанахынхан ч энэ эрхэмд халдаж чаддаггүй гэсэн. Алганы хонхорхой хазагддаггүй гэдэгтэй л адил. За тэр ч яахав. Мисс гэргийтэй, хурдан морины зэлэн дээр зуны цагтаа бол өнжчихдөг, өнжихдөө хошуу ноёноос тансаг гэр барьж зиндаархдаг Ганбаа Говь-Алтай аймагт нэр дэвших гээд явж байна гэнэ. Шилжсэн утгаараа эрдэнэт хүний аминд хүрэхэд роль гүйцэтгэсэн хүн төрийн түшээ байж болох уу? Мэдээж дээд шатандаа энэ хүнийг хазаарлаж чадахгүй байхад доодчууд бол шонгүй юм байгаа биз. Мөнгөтэй хүн лаагаа иднэ үү, тойрог худалдаж авна уу хамаагүй болсон цаг. Тэр тойрог зардаг хүмүүс нь ч нягталж шалгадаггүй юм шиг байгаа юм.
Дэлгүүрт талх зарж байгаа аятай л худалдчихдаг юм биш үү? Ядаж ард түмнээс уучлал гуйсан уу, ядаж энэ хэрэгт өчүүхэн төдий гэмшсэн царай үзүүлсэн үү, ядаж өөрийнхөө хэмжээ хязгаарыг мэдэх болов уу. Эрхээ биш Их хурлын сэнтий сэрүүн зүүдэлж байгаа хүн толгойгоо тэнцвэрээ олохоос өөр юманд ашигладаг л байж таараа. Нүүрнийхээ урдуур хар хөшиг татчихсан юм шиг мэлрээд өнгөрөөчихөөр ард түмэн мартчих бололтой. Магадгүй мартчихсан ч юм шиг байна. Мөнгөтэй хүний мөрөөдөлд хязгаар үгүй гэж л энэ байх.
Эх сурвалж: www.grandnews.mn
Сэтгэгдэл (11)